“Azərbaycanda dövlət rüsumlarının dəyişdirilməsi insanların həyatına heç bir mənfi təsir göstərməyəcək”. Bunu Milli Məclisin İqtisadi siyasət, sənaye və sahibkarlıq komitəsinin iclasında “Dövlət rüsumu haqqında” Qanuna dəyişikliyin müzakirəsi zamanı komitənin sədri Tahir Mirkişili deyib.
Komitə sədri bunu onunla əsaslandırıb ki, Azərbaycanda hər bir vətəndaşın ödədiyi dövlət rüsumunun orta illik məbləği 35 manat təşkil edir. Bu da vətəndaşın gəlirlərinin təqribən 0.5 faizini təşkil edir. T.Mirkişili bildirib ki, bəzi ölkələrdə bu məbləğ 8 faizdən yuxarıdır. Komitə sədri fikrini onunla əsaslandırmağa çalışıb ki, Azərbaycanda rüsumlar 15 il bundan əvvəl müəyyən edilib. 15 il ərzində inflyasiya baş verib və bu rüsumların məbləği maya dəyərindən aşağı düşüb. Bu baxımdan indiki halda rüsumların məbləğinin dəyişdirilməsi insanların həyatına mənfi təsir etməyəcək.
Qeyd edək ki, "Dövlət rüsumu haqqında" Qanuna edilən dəyişikliklərə əsasən bəzi dövlət rüsumlarının məbləği dəyişdirilir və yeni dövlət rüsumları müəyyən edilir.
Maraqlıdır, rüsumların qalxmasının insanların həyatına heç bir mənfi təsir göstərmədiyinin əsası varmı? Ümumən tək rüsumlar qalxmayıb axı...
“Onlar bu tipli açıqlamalar verdikcə insanlar daha da qıcıqlanır”
Məsələyə münasibət bldirən iqtisadçı-ekspert Natiq Cəfərlinin fikrincə, belə yanaşmanın heç bir əsası yoxdur: “Bu tamamilə absurd bir yanaşmadır və hansısa məntiqə sığmır. Çünki rüsumların artımı vətəndaşın büdcəsinə bu və ya digər formada təsir edir. İnsanların ödədiyi rüsumlar cibindən çıxırsa və bu rüsumlar artırılırsa, artıq vətəndaşın ziyanınadır. Ona görə ki, vətəndaş bu rüsumları ödəmək üçün əlavə vəsait xərcləyəcək. Bu, artıq vətəndaşın dolanışığına təsir göstərən amilə çevrilib. Məsələn, bir şəxs həftə ərzində şəxsiyyət vəsiqəsini, xarici pasportunu, sürücülük vəsiqəsini və digər bu kimi sənədlərini dəyişir. Bunların hamısında rüsumlar artırılıb. Belə olan halda necə ola bilər ki, sözügedən rüsumlara görə əlavə odəniş edən şəxsə ziyan dəyməsin? Bu hansı məntiqə əsaslanır? Belə fikirlər bəzi deputatlar tərəfindən rüsumların artımının cəmiyyətə təsirini yumuşaltmaq üçün deyilmiş sözlərdir. Ancaq belə fikirlər tam əks effekt yaradır. Onlar bu tipli açıqlamalar verdikcə insanlar daha da qıcıqlanır. Bu da insanların narazılığının artmasına rəvac verir. Ona görə də bəzi deputatlar açıqlamalarında daha korrekt olsalar, o zaman bunun faydası olar”.
Əks təqdirdə iqtisadçı-ekspert hesab edir ki, bu, zərərli tendnsiyalara yol aça bilər.
Vidadi ORDAHALLI
