Mərkəzi Bankın qərarı ilə uçot faiz dərəcəsi oktyabrın 29-da 6,5%-dən 7%-ə qaldırılıb. Məlumdur ki, uçot dərəcəsinin qaldırılmasında əsas məqsədlərdən biri inflyasiya səviyyəsini nizamlamaqdan ibarətdir.
Bu ilin ilk 9 ayında Azərbaycanda istehlak qiymətləri (inflyasiya) əvvəlki ilin eyni dövrü ilə müqayisədə 5,2%, o cümlədən ərzaq məhsullarının qiyməti 6% artıb.
Qeyd edək ki, bu, son 4 ildə qeydə alınan ən yüksək göstəricidir. Uçot dərəcəsinin qaldırılmasının inflyasiya səviyyəsini aşağı salacağı nəzəri baxımdan mümkündür və bunun belə olduğunu heç kim inkar etmir.
Onu da bildirək ki, uçot faiz dərəcəsinin artırılmasının səbəblərindən biri də manatın dollar qarşısında zəifləməsinin qarşısını almaqdır.
Qeyd edək ki, son günlər ölkədə dollara tələbat kəskin şəkildə artmağa başlayıb. Təkcə son bir həftə ərzində dollara tələbat 74% artıb. Iki gün öncə keçirilən sonuncu valyuta hərracında Mərkəzi Bank (Neft Fondu ilə birgə) 88 milyon dollar satıb. Bu həm də 14 yanvar tarixindən sonra qeydə alınan ən yüksək göstəricidir. Maraqlıdır, uçot faiz dərəcəsinin artırılması dolların bahalaşmasına təsir edə bilərmi?
Iqtisadçı ekspert Natiq Cəfərli bildirdi ki, Mərkəzi Bankın uçot dərəcəsini artırması təkcə kredit faizlərini yüksəldəcək: “Danılmaz faktdır ki, ölkədə kredit faizləri yüksəkdir. Biznes üçün yüksələn faizlər, tam tərsi, onların satdığı malların, göstərdiyi xidmətlərin bahalaşmasına səbəb olacaq”.
Həmsöhbətimiz onu da əlavə etdi ki, yaxın aylarda məzənnə dəyişikliyi olmayacaq. Nə qədər ki, neftin qiyməti bahadır, bu risk yoxdur: “Amma Elman Rüstəmov da bilir ki, uzun zaman sabit və inzibati məzənnə rejimini saxlamaq mümkün deyil, günün birində mütləq məzənnəni dəyişəcəklər. Yəni manat heç vaxt dollar qarşısında bahalaşmayacaq, amma bir gün mütləq ucuzlaşacaq”.
Günel CƏLİLOVA
