2018-ci il mayın 23-də Azərbaycan Respublikasının Qırğızıstandakı Səfirliyi Azərbaycan Xalq Cumhuriyyətinin (AXC) 100 illiyi münasibətilə Bişkekin möhtəşəm “Damas” mehmanxanasının ziyafət salonunda təntənəli mərasim keçirib.
Qonaqları milli geyimlərmizdə olan gənclər qarşılayıb.
Tədbir başlamadan öncə qonaqlar Azərbaycan həqiqətlərini əks etdirən sərgi - kitab, buklet və jurnallarla tanış olublar.
Gecədə Qırğız Respublikasının Prezident Aparatının rəsmiləri, hökumət üzvləri, digər yüksək vəzifəli şəxslər, Joqorku Keneşin (Parlamentin) deputatları, Qırğızıstanda akkreditə olunmuş diplomatik nümayəndəliklərin başçıları və əməkdaşları, ziyalılar, diaspora fəalları, KİV rəhbərləri və əməkdaşları iştirak edib.
Azərbaycanın və Qırğızıstanın dövlət himnləri səsləndirildikdən sonra tədbir iştirakçılarını salamlayan səfir Hidayət Orucov AXC-nin 100 illik yubileyinin müqəddəs Ramazan ayına təsadüf etdiyini vurğulayaraq, bu münasiətlə onları təbrik edib.
Səfir Azərbaycan Prezidenti İlham Əliyevin 2018-ci ilin Azərbaycanda “Azərbaycan Xalq Cumhuriyyəti İli” elan edilməsi ilə bağlı Sərəncam imzaladığını tədbir iştirakçılarının diqqətinə çatdırıb. O, 100 il əvvəl yaranmış və cəmi 23 ay mövcud olmuş müsəlman şərqinin ilk demokratik parlamentli respublikası olan AXC-nin müsəlman dünyasında ilk dünyəvi respublika olduğunu bildirərək, onun Azərbaycan xalqının və bütün müsəlman dünyasının salnaməsinə qızıl hərflərlə yazıldığını qeyd edib.
Diplomat AXC-nin Azərbaycanın müstəqillik əzminin, xalqımızın öz dövlətçilik ənənələrinə sədaqətinin və azadlıq mücadiləsinin nəticəsi olduğunu qonaqların diqqətinə çatdıraraq bildirib ki, AXC-nin siyasi sisteminə, həyata keçirildiyi islahatlara, demokratik dövlət quruluşuna, eləcə də təyin etdiyi məqsəd və vəzifələrinə görə Avropanın ənənəvi demokratik dövlətlərindən geridə qalmırdı. Qeyd edib ki, Azərbaycan müsəlman dünyasında qadınlara seçki hüququ verən ilk ölkə oldu və hətta bu baxımdan bir sıra Avropa və Amerikanın ənənəvi demokratik dövlətlərini qabağlayıb.
Səfir müstəqil Azərbaycan Respublikasının AXC-nin siyasi və mənəvi varisi olduğunu və 100 il əvvəl olduğu kimi, torpaqlarımızın erməni təcavüzü ilə üzləşməsi, nəticədə ərazimizin 20% işğal edildiyini və 1 milyon insanın öz doğma torpağından qaçqın və məcburi köçkün vəziyyətinə düşdüyünə diqqət çəkərək, BMT Təhlükəsizlik Şurasının işğala son qoyılması, zəbt edilmiş torpaqların qeyd-şərtsiz azad olunması barədə 1993-cu ildə qəbul etdiyi dörd qətnaməsinin hələ də yerinə yetirilmədiyini iştirakçıların diqqətinə çatdırıb.
Çağdaş Azərbaycanın tərəqqisindən, qitələrarası layihələrin həyata keçirilməsində iştrakından, dünya birliyində yerindən və müqeyindən söz açan diplomat ölkəmizin Qırğızstanla əlaqələrindən danışaraq bildirib ki, bizim xalqlarımız etnik və tarixi əlaqələr, mədəniyyət, adət-ənənələr və dil ilə bağlıdır, bu da öz növbəsində yaxın və effektiv əməkdaşlıq üçün böyük imkanlar açır.O qeyd edib ki, ulu öndər Heydər Əliyev deyirdi: “Biz kökü bir, dili bir olan xalqlarıq. “Manas”-ın dili bizim ümumi dilimizdir.”.
Sonra çıxış edən Qırğız Respublikasının Xarici işlər nazirinin müavini Nurlan Abdrahmanov AXC-nin 100 iliyi münasibətilə Azərbaycan xalqını təbrik edib. Eyni zamanda bu il ikitərəfli diplomatik münasibətlərin 25 illiyinin qeyd edildiyini, həmin dövrdə ikitərəfli əlaqələrin inkişafı və intensivləşməsi yolunu keçərək bütün səviyyələrdə əlaqələrin sıxlaşması, beynəlxalq arenada qarışıqlı etimadın artması, mədəni, humanitar, ticarət, iqtisadi və digər sahədə əməkdaşlığın genişlənməsinin və dərinləşməsinin davam etdiyini bildirib.
Tədbir ziyafətlə davam etdirilib və qonaqlara zəngin mətbəximizin nümunələri təqdim olunub.
Qonaqlara Azərbaycan tarixini və həqiqətlərini əks etdirən jurnallar hədiyə olunub.
Tədbir boyu Azərbaycana dair təbliğat videosu nümayiş olunub və xalq, klassik, estrada musiqiləri səsləndirilib. Qırğızstanın əməkdar artisti Bakıt İbıkeyev dahi mügənni-bəstəkarımız Müslüm Maqomayevin ölməz mahnılarını yüksək peşəkarlıqla ifa edib.
