Milli Məclisin iclasında sədr Oqtay Əsədov deyib ki, Azərbaycanın neft strategiyası üçün uğurlu şərait yaradılıb. TANAP və TAP layihəsi uğurla davam etdirilir: "2017-ci ildə qeyri-neft sektorunda 2,7 faiz artım baş verib. Həyata keçirilən düşünülmüş tədbirlər Azərbaycanın investiya cəlbediciliyini qoruyub saxlayıb. Həmişə olduğu kimi, Milli Məclis tərəfindən irəli sürülən təkliflər hökumət tərəfindən nəzərə alınıb".
O.Əsədov deyib ki, Bakı-Tbili-Qars dəmir yolu xətti Avropa ilə Şərqi birləşdirən məsafəni iki dəfəyə qədər azaldır.
Dağlıq Qarabağ münaqişəsinin nizamlanmamasının əsas səbəbi Ermənistanın öz havadarlarına arxalanan cinayətkar rəhbərliyinin qeyri-konstruktiv mövqeyidir. “Trend”in məlumatına görə, bunu Azərbaycanın Baş naziri Artur Rəsi-zadə Milli Məclisdə hökumətin hesabatını təqdim edərkən deyib.
O qeyd edib: "Dərin təəssüf hissi ilə qeyd etməliyəm ki, Ermənistan-Azərbaycan Dağlıq Qarabağ münaqişəsinin həllində ciddi bir dönüşə nail olunmayıb".
A.Rasi-zadə bildirib ki, bunun əsas səbəbi Ermənistanın öz havadarlarına arxalanan cinayətkar rəhbərliyinin qeyri-konstruktiv mövqeyi, problemin həllini hər cəhdlə uzatmağa çalışmasıdır.
Baş nazir vurğulayıb ki, dövlət başçısı hamımızın ağrılı yeri olan bu məsələni gündəlik nəzarətdə saxlayır, bütün beynəlxalq tədbirlərdə və görüşlərdə problemin hüquqi müstəvidə və ölkəmizin ərazi bütövlüyü çərçivəsində həllini tələb edir: “Münaqişənin həllinin sülh danışıqları ilə yanaşı, hərb variantının mümkünlüyünü də nəzərə alaraq Ali Baş Komandanın rəhbərliyi ilə biz hərbi gücümüzü durmadan artırır, ordunun maddi-texniki bazasını möhkəmləndirir, müasir silah və sursatla təminatına xüsusi diqqət yetiririk”.
A.Rəsi-zadə qeyd edib ki, 2016-cı ilin aprel döyüşlərində erməni təxribatının qarşısının qəhrəmanlıqla alınması ordunun hərbi hazırlığının ildən-ilə artdığını bir daha əyani nümayiş etdirdi: “Bu illərdə ölkəmizin müdafiə qabiliyyətinin yüksəldilməsində böyük əhəmiyyət kəsb edən müdafiə sənayesi kompleksi yaradılıb və müdafiə sənayesinə ayrılan vəsaitin məbləği 13.5 dəfə artırılıb. Müdafiə Sənayesi Nazirliyinin müəssisələrində 1200-dən çox məhsulun, o cümlədən zirehli texnikanın, pilotsuz uçuş aparatlarının, müxtəlif növ atıcı silahların və digər silah-sursatın istehsalı təşkil olunub. Bu gün Azərbaycanda istehsal olunan hərbi təyinatlı məhsullar artıq xarici ölkələrə də ixrac edilir”.
A.Rəsi-zadə bildirib ki, ölkədə aparılan düşünülmüş tədbirlər nəticəsində yoxsulluq 5.4 faizə enib, yaşama müddəti 72.4-dən 75.4-ə yüksəlib.
Baş nazir vurğulayıb ki, ölkənin strateji valyuta ehtiyatları 26.6 dəfə artaraq ötən ilin sonuna 42 milyard ABŞ dolları təşkil edib.
A.Rəsi-zadə qeyd edib ki, sadalanan uğurların qazanılmasına ölkədə dayanıqlı ictimai-siyasi sabitliyin yaradılması, Prezidentin siyasətinin xalq tərəfindən dəstəklənməsi səbəb olub.
Zahid Oruc şeyxi də mübarizəyə qoşulmağa səslədi
“Prezident seçkiləri ərəfəsində ölkədə sabitliyin ölçüsü hamını qane edir. Lakin sakitliklə bağlı məsələ məni narahat edir”. Bunu Milli Məclisin plenar iclasında deputat Zahid Oruc deyib.
O qeyd edib ki, xaricdəki kəşfiyyat təşkilatları tərəfindən himayə edilən qüvvələr Azərbaycan əleyhinə kampaniya aparır: “Mən dövlətimizin möhkəmliyinə xələl gətirmək istəyənlərə cavab vermək istəyirəm. Hesab edirəm ki, bu, tək dövlətə qarşı deyil, Azərbaycanın hər bir insanına qarşıdır. İlk növbədə, QMİ sədri Allahşükür Paşazadəyə müraciət edirəm. Şeyx hər zaman Azərbaycan dövlətçiliyinə xidmət edib. Ona görə, şeyx başda olmaqla hər kəsi, ziyalıları, mədəniyyət xadimlərini mübarizə aparmağa çağırıram. Biz ölkə əleyhinə kampaniya aparanlara etirazımızı bildirməliyik”.
Bakının mərkəzində çoxmərtəbəli binaların tikintisinə qadağa…
Bakıda şəhər mərkəzində çoxmərtəbli binaların tikintisinə qadağa qoyulmalıdır. Bu təkliflə deputat Azər Badamov Milli Məclisin iclasında çıxış edib.
O bildirib ki, belə bir hal beynəlxalq praktikada da mövcuddur: “Çoxmərtəbəli binaların şəhərin mərkəzində tikintisi həm tıxacların yaranmasına gətirib çıxarır, həm də digər problemlərə yol açır. Odur ki, belə binaların tikintisinə qadağa qoyulsa, daha yaxşı olar”.
Deputat hesab edir ki, bunun əvəzində şəhərin kənarında yeni yaşayış massivləri salına bilər: “Bu, eyni zamanda tıxacların aradan qaldırlmasına kömək edər”.
Baki-xeber.com
