Martın 10 - da R . Behbudov adına Mahnı Teatrında Azərbaycan Jurnalistlərinin VII qurultayı keçirilib.
Qurultay Azərbaycan Respublikasının dövlət himninin səsləndirilməsi ilə başladı. Əvvəlcə 1 dəqiqəlik sükutla Azərbaycanın ərazi bütövlüyü uğrunda canından keçmiş şəhidlərimizin xatirəsi anıldı.
Sonra prezidentin ictiami-siyasi məsələlər üzrə köməkçisi Əli Həsənov Azərbaycan Prezidenti İlham Əliyevinin qurultay iştirakçılarına ünvanladığı məktubu oxudu.
Azərbaycan Mətbuat Şurası sədri Əflatun Amaşov son illər MŞ-nın həyata keçirdiyi işlərlə bağlı hesabat verdi. O bildirdi ki, 15 il əvvəl Azərbaycan Jurnalistlərinin I Qurultayında Mətbuat Şurası yaradılıb. Ə.Amaşov vurğuladı ki, MŞ-nın daşıdığı funksiya media -ictimaiyyət, media -hakimiyyət münasibətlərinin tənzimlənməsi ona digər qütblərin dəstəyini qazandırıb. "Biz bunu bütövlükdə ölkə mediasının, Mətbuat Şurasının inkişafında, hər bir qurultayin spesifik vəzifələrin daşıyıcısı kimi xarakterizə olunmasında, yaddaqalan olmasında, yadda qalmasında görür və qiymətləndiririk".
Sonra isə Nəzarət-Təftiş Komissiyasının sədri Qadir İbrahimlinin hesabatı dinlənildi.
Onu da bildirək ki, qurultayda Mandat komissiyasının sədri Elçin Mirzəbəyli də çıxış etdi.
Qurultayın aparıcısı Rəşad Məcid məlumat verdi ki, qurultayda Mətbuat Şurasına üzv 166 təşkilatdan 241 nümayəndə iştirak edir. Həmçinin Şuranın İdarə Heyətinin tərkibi Təşkilat Komitəsi kimi fəaliyyət göstərdiyindən qurumun üzvləri də qurultay nümayəndəsi qismində təmsil olunurlar.
Naxçıvan MŞ-nın Mətbuat Şurasının sədri Rövşən Hüseynov çıxış edərək Naxçıvanda KİV-in inkişafından danışdı.
Millət vəkili Aqil Abbas isə bildirdi ki, Mətbuat Şurasının fəaliyyətindən razıdır. Reket jurnalistika ilə mübarizəni önə çəkən A.Abbas bildirdi ki, peşəkar jurnalist fəaliyyəti ilə məşğul olan media təmsilçilərinə xüsusi vahid vəsiqə verilməlidir. O, həmçinin təklif etdi ki, Naxçıvan TV peyk vasitəsi ilə Bakıda da yayılsın, "Şərq qapısı " və "Gəncə" qəzetləri Bakıda da satılsın.
Qurultayda həmçinin bölgə qəzetlərinin rəhbərləri də iştirak edirdi. Əsas diqqəti region qəzetlərinə dövlət tərəfindən maliyə ayrılmasına yönəldən bölgə qəzetləri rəhbərləri ümid etdilər ki, aidiyyatı qurumlar bu sahədə onlara dəstək göstərəcək.
Sonra isə "Azərbaycan " qəzetinin baş redaktoru, millət vəkili Bəxtiyar Sadıqov çıxış edərək Heydər Əliyevin mətbuata dəstəyindən danışdı. O, həmçinin qeyd etdi ki, ölkə başçısı Ilham Əliyev də mətbuatın inkişafına ciddi dəstək göstərir.
Çıxış edənlər Azərbaycan mətbuatının son illər keçdiyi yoldan qazandığı dövlət dəstəyindən söz açdılar.
Çıxışlar bitdikdən sonra yenidən çıxış edən Əli Həsənov qeyd etdi:" Azərbaycan dövlətini heç kim, heç zaman məğlub edə bilməz. Heç kim Azərbaycan dövlətini aşağılaya bilməz, dövləti milli prinsiplərdən, ideyalardan çəkindirə bilməz. Biz Azərbaycanın dövlət başçısı və onun iradəsi ilə güclüyük. Dövlətimizin təhlükəsizliyini təmin edən milli ordumuzla güclüyük".
Qurultayda, həmçinin Azərbaycan Mətbuat Şurasının İdarə Heyətinin tərkibinin genişləndirilməsi məsələsi müzakirə olunaraq qəbul edildi. Qurultayda Azərbaycan Mətbuat Şurasının İdarə Heyətinin tərkibinin genişləndirilməsi qərara alındı.
Təşkilat Komitəsinin qurultaya təklifində İdarə Heyətinin üzvlərinin sayının 17-dən 23-ə çatdırılması yer alıb. Məsələ ilə əlaqədar qurultay iştirakçıları Şuranın Nizamnaməsində dəyişiklik aparılmasına münasibətlərini bildiriblər və təklif qəbul olunub.
Qeyd edək ki, MŞ-nin 11 jurnalistdən (Əflatun Amaşov, Vüqar Rəhimzadə, Umud Rəhimoğlu, Rəşad Məcid, Aydın Quliyev, Akif Aşırlı, Rauf Arifoğlu, Elçin Mirzəbəyli, Aynur Camalqızı, Bəxtiyar Sadıqov, Bahəddin Həziyev), 7 ictimaiyyət nümayəndəsindən (Vüqar Səfərli, Müşfiq Ələsgərli, Aqil Abbas, Cavanşir Feyziyev, Hikmət Babaoğlu, İlham İsmayılov, Yadigar Məmmədli) və 5 internet informasiya resursu təmsilçisindən (Vüsalə Mahirqızı, Azər Həsrət, Niyaz Niftiyev, Rəhman Hacıyev, Anar İmanov) ibarət İdarə Heyəti formalaşdı.
Xəbər Xidməti
