Xarici işlər naziri Elmar Məmmədyarov Azərbaycanda rəsmi səfərdə olan Mərakeş Krallığının Xarici işlər və beynəlxalq əməkdaşlıq naziri Nasser Bouritanın başçılıq etdiyi nümayəndə heyətini qəbul edib. APA-nın məlumatına görə, görüşdə nazirlər tarixən dini və mədəni köklərlə bağlı olan Azərbaycan və Mərakeş arasında siyasi dialoqun və dostluğun inkişafından razılıqlarını ifadə ediblər. Təməli Heydər Əliyev və Mərakeş Kralı II Həsən tərəfindən qoyulan ikitərəfli dostluq münasibətlərinin prezident İlham Əliyev və Kral VI Məhəmməd tərəfindən uğurla davam etdirildiyi qeyd olunub.
İki ölkə arasında iqtisadi-ticarət əlaqələrinin inkişafı üçün geniş potensialın mövcud olduğunu qeyd edən tərəflər səfər çərçivəsində Azərbaycan-Mərakeş Hökumətlərarası Birgə Komissiyanın ilk iclasının keçirilməsinin iki ölkə arasında iqtisadi əlaqələrin inkişafına əsaslı təkan verəcəyinə inam ifadə ediblər. Nazirlər iqtisadi-ticarət əlaqələrinin təşviq edilməsi üçün iki ölkənin biznes dairələri arasında birbaşa təmasların yaradılmasının vacibliyini vurğulayıb, enerji, kənd-təsərrüfatı, turizm, nəqliyyat və digər qarşılıqlı maraq doğuran sahələrdə əməkdaşlıq üçün əlverişli imkanların olduğunu qeyd ediblər.
İki ölkə arasında mütəmadi olaraq Xarici İşlər nazirlikləri səviyyəsində siyasi məsləhətləşmələrin və diplomatik akademiyalar arasında tələbə-müəllim mübadiləsinin aparılmasının vacibliyi də qeyd olunub.
Azərbaycan və Mərakeş arasında mədəni əlaqələrin inkişaf səviyyəsindən razılıq ifadə edən tərəflər hər iki ölkədə keçiriləcək Mədəniyyət günlərinin xalqlarımız arasında dostluq əlaqələrinin gücləndirilməsinə və qarşılıqlı turizm axınına töhfə verəcəyinə əminliklərini vurğulayıblar.
Tərəflər beynəlxalq gündəlikdə duran məsələlər ətrafında fikir mübadiləsi aparıb, beynəlxalq təşkilatlar çərçivəsində əməkdaşlıq məsələlərinə toxunublar.
Elmar Məmmədyarov ölkəmizin Expo-2025-ə ev sahibliyi etmək üçün müraciət etdiyini qeyd edib. O həmçinin, həmkarına bu ilin aprelində Bakıda keçiriləcək Qoşulmama Hərəkatı nazirlər toplantısı haqqında məlumat verib. Eyni zamanda Azərbaycan və Mərakeşin beynəlxalq səviyyədə dinlər və mədəniyyətlərarası dialoq prosesinə və qarşılıqlı anlaşmaya yaxından töhfə verdiyi vurğulanıb.
Görüş əsnasında nazir Elmar Məmmədyarov Ermənistan-Azərbaycan Dağlıq Qarabağ münaqişəsinin həlli üzrə danışıqlar prosesi, Azərbaycanın haqlı və ədalətli mövqeyi, habelə Ermənistanın Azərbaycanın işğal olunmuş ərazilərində Azərbaycan xalqına və İslam dininə aid maddi-mədəni və dini irsin talan və məhv edilməsi siyasəti haqqında məlumat verib. Nazir Məmmədyarov Mərakeşin Ermənistanın Azərbaycana qarşı təcavüzünə dair yaradılmış İƏT Kontakt Qrupuna daxil olmasına və ölkəmizin BMT Təhlükəsizlik Şurasının müvafiq qətnamələrinə uyğun olaraq ədalətli mövqeyini dəstəkləməsinə görə minnətdarlığını bildirib.
Azərbaycan-Mərakeş Hökumətlərarası Birgə Komissiyanın ilk iclası çərçivəsində bir sıra sazişlər də imzalanıb.
"Azərbaycan və Ermənistan arasında danışıqlar seçkilərdən sonra intensiv davam etdiriləcək"
"Azərbaycan və Mərakeş arasında əlaqələr 1992-ci ildə qurulub. Ölkələrimiz arasında strateji səviyyədə əməkdaşlıq da ola bilər, çünki hər iki dövlət beynəlxalq təşkilatlarda bir-birinə dəstək verir. Bu ilin sonu və ya gələn ilin əvvəllərində konkret layihələr üzrə hökumətlərarası komissiyanın ikinci iclasını keçirmək qərarına gəldik. Biznes-forum da keçiriləcək". Bu sözləri Azərbaycanın xarici işlər naziri Elmar Məmmədyarov Bakıda mərakeşli həmkarı Nasser Bourita ilə görüşdən sonra keçirilən birgə mətbuat konfransında deyib.
E. Məmmədyarov qonağa Dağlıq Qarabağ münaqişəsinin həlli ilə bağlı məlumat verdiyini bildirib: "Tərəflər prezident seçkilərindən sonra daha intensiv şəkildə müzakirələri davam etdirmək qərarına gəlib. Hər iki ölkədə yeni hökumət qurulduqdan sonra danışıqları intensiv şəkildə davam etdirəcəyik".
“İƏT-də Azərbaycanın lehinə sənəd qəbul edən bəzi ölkələr başqa təşkilatlarda bitərəf qalır”
"İslamofobiyanın süni şəkildə ortaya atıldığını hiss edirik. May ayında İslam Əməkdaşlıq Təşkilatı ölkələri xarici işlər nazirlərinin konfransı keçiriləcək. Biz o iclasda İƏT-in islam dünyasının əsas təşkilatı olmasını təsdiq etmək barədə müzakirələr aparacağıq”. Bunu da Elmar Məmmədyarov deyib.
E. Məmmədyarov bildirib ki, İƏT-in və onun fəaliyyətini həmrəylik və qətnamələrin həyata keçirilməsi əsasında qurmaq lazımdır: “Məsələn, İƏT-də Azərbaycanın lehinə sənəd qəbul edən bəzi ölkələr bəzən başqa təşkilatlarda eyni məsələ ilə bağlı bitərəf qalırlar. Biz həmrəy olmalıyıq”.
"Mərakeş və Azərbaycan hər ikisi təcavüzlə üzləşib"
"Azərbaycana səfərim siyasi məsləhətləşmələrin davam etdirilməsi üçün böyük imkan yaratdı. Bir sıra məsələyə münasibətdə oxşar mövqedən çıxış edirik. Münasibətlərimizin əsası güclüdür. Regional və beynəlxalq səviyyədə əlaqələrimizi koordinasiya edirik". Bunu isə Mərakeşin xarici işlər və beynəlxalq əməkdaşlıq naziri Nasser Bourita deyib.
O bildirib ki, terrorizmə qarşı mübarizə müasir islamın inkişafı və islamafobiyaya qarşı mübarizə sahəsində hər iki ölkə geniş təcrübəyə malikdir: "Bir sıra sahədə üzrə bu proseslərdə öndə gedirik. Danışıqlar zamanı razılığa gəldik ki, ikitərəfli məsləhətləşmələr davam etdirilməlidir. İstəyirik ki, siyasi əlaqələr iqtisadi əlaqələr qədər güclü olsun. Bunun üçün isə hüquqi çərçivə olmalıdır. Çoxsaylı sazişlər də imzalanmalıdır ki, ikitərəfli əlaqələri gücləndirək".
Nazir əlavə edib ki, Azərbaycanla münasibətlər həmrəylik, qarşılıqlı dəstək əsasında formalaşır: "Bu, həm də münaqişələrə aiddir. Marakeş və Azərbaycan hər ikisi təcavüzlə üzləşib. Hər iki ölkə üçün bu, vacib məsələsidir. Bizim münasibətimiz BMT qətnamələrinə əsaslanır. Mövqeyimiz isə ərazi bütövlüyünün qorunmasına sadiqliyi ifadə edir".
