“Ağ Yol” Vətəndaş Hərəkatı facebookda özünün “Ağ Yol” səhifəsi və eyniadlı qrupunda yenə də həftənin ən çox diqqət çəkən müzakirələri ilə çıxış edib. Bildiyimiz kimi, bu həftə ölkə daxilində və xaricində əsasən Xocalı soyqırımı ilə bağlı mühüm tədbirlər keçirilib.
İctimaiyyətin xüsusi diqqətinə səbəb olan digər mühüm tədbir isə Niderland Krallığının paytaxtı Amsterdamda Avropa Azərbaycanlıları Konqresinin (növbədənkənar) VI qurultayı idi. Azərbaycan Xalq Cumhuriyyətinin 100 illiyi münasibətilə Avropa ölkələrində kütləvi tədbirlərin keçirilməsi, o cümlədən 31 Mart soyqırımının 100 illiyi ilə bağlı qitədə təbliğat işlərinə start verilməsi ilə bağlı mövzular ətrafında aparılan müzakirələr zamanı bir sıra vacib məsələlərə toxunulub.
Qurultayda Azərbaycan Prezidentinin İctimai-siyasi məsələlər üzrə köməkçisi Əli Həsənov çıxışı zamanı: “Təhlükəsizlik bizim dövlət siyasətinin mühüm hissəsini təşkil edir” deyə vurğulayıb.
Prezident Administrasiyası rəsmisinin bu sensasion açıqlamasını sosial mediyada gündəmə gətirən “Ağ Yol” Vətəndaş Hərəkatı yenə də facebookda çoxsaylı aktivləri bir araya toplayıb.
“Təhlükəsizlik Azərbaycanın dövlət siyasəti üçün prioritet istiqamətdir” başlıqlı post paylaşımda Əli Həsənovun açıqlamasındakı vacib məqamlar qeyd olunub.
Facebookda beş yüz mindən artıq üzvü olan “Ağ Yol” səhifəsində statusla bağlı bildirilən rəylərdə vətəndaşların birlik və millilik mövqeyi özünü göstərib. Prezidentin köməkçisinin çıxışını alqışlayan sosial şəbəkə istifadəçiləri dövlətin təhlükəsizlik istqamətində apardığı mühüm islahatlara nəzər yetiriblər.
Müzakirələrdə əsasən dövlət tərəfindən ordunun gücləndirilməsinə göstərilən diqqət, Azərbaycan vətəndaşının tam sabitlik və rifah halında yaşamasına verilən dəyər, eyni zamanda 1 milyon qaçqınımızın öz doğma yurdlarına qaytarılması üçün bütün gücün səfərbər edilməsi vurğulanıb.
“Ağ Yol” səhifəsi və qruplarında paralel aparılan fikir mübadiləsində bildirilib ki,
bu gün dövlətimizin işğal olunmuş torpaqlarının geri qaytarması məsələsi ilə bağlı siyasət tam düzgün istiqamətdə aparılır. Vurğulanıb ki, bu siyasətə mane olan olmasa, ordumuzun müdafiə və hazırlıq imkanları Dağlıq Qarabağ və ətraf rayonların bir neçə gündə geri qaytarılmasını mümkün edəcək.
Şərhlərdə o da xüsusi vurğulanıb ki, Azərbaycan öz torpağının müdafiəsinə qalxır. Düşünülmüş siyasətə, qüdrətli orduya sahib olan bir dövlətdə ata-baba yurdundan didərgin düşmüş qaçqın və məcburi köçkünlərin bir gün öz evlərinə qayıdacaqlarına əminlik ifadə olunub.
Aysel Abbasova “Ağ Yol” İnformasiya Agentliyinin Mətbuat katibi
