Türkiyənin Koceli vilayətinin İzmit şəhərində Xocalı soyqırımının 26-cı ildönümü ilə bağlı anım tədbiri təşkil olunub. Xocalı faciəsi ilə bağlı təşkil olunan tədbirdə İzmit bələdiyyəsinin sədri Nevzat Doğan, Türkiyə Azərbaycan Dərnəkləri Federasiyasının sədri Bilal Dündar, Nəsimi rayon İcra Hakimiyyəti başçısının birinci müavini Gülarə Verdiyeva, Nəsimi rayon bələdiyyəsinin sədri Nazim Qaraxanov və Qarabağ müharibəsi veteranları, əlilləri və şəhid ailələri ictimai birliyinin Nəsimi rayon şöbəsinin sədri Azər Quliyev, həmçinin, Türkiyədə təhsil alan azərbaycanlı və digər türkdilli dövlətlərin gəncləri iştirak edib.
Tədbirdə çıxış edən İzmit bələdiyyəsinin sədri Nevzat Doğan bildirib ki, Azərbaycan xalqının ayağına dəyən daş Türkiyənin ürəyini ağrıdır. Xocalı faciəsi türk xalqının da sağalmaz yarasıdır. Xocalı soyqırımını heç bir zaman unutmayacaqlarını deyən bələdiyyə sədri şəhidlərimizin ruhuna daim dualar etdiklərini bildirib. Xocalı soyqırımı abidəsinin Türkiyədə ilk dəfə İzmitdə yaradıldığını deyən Nevzat Doğan vurğulayıb ki, bu gün ölkəsinin hər bir şəhər və rayonunda şəhidlərimizin xatirəsinə anım abidəsi ucaldılır.
Nəsimi rayon icra hakimiyyəti başçısının birinci müavini Gülara Verdiyeva isə çıxışında qeyd edib ki, erməni terrorçularının törətdiyi bu soyqırım heç bir zaman insanların yaddaşından silinməyəcək. Gülarə Verdiyeva tədbir iştirakçılarının diqqətinə çatdırıb ki, qardaş Türkiyə də bu dərdi Azərbaycanla birlikdə yaşayır. Erməni terrorunun acı nəticələrini istər Azərbaycan, istərsə də Türkiyə gələcək nəslə ötürməli olduğunu deyən RİH başçısının müavini İzmit bələdiyyəsinin Xocalı şəhidlərinin xatirəsinə inşa etdirdiyi xatirə abidəsinin gənclər üçün önəmli olduğunu bildirib.
Türkiyə Azərbaycan Dərnəkləri Federasiyasının sədri Bilal Dündar isə ermənilərin uşaq-böyük demədən Xocalı şəhərində amansız qətliam törətməsinə baxmayaraq, beynəlxalq təşkilatların və dünya dövlətlərinin bu amansız soyqırımın səbəbkarlarını cəzalandırmağa tələsmədiyinə diqqət çəkib. Bilal Dündar qeyd edib ki, bu səbəbdən bütün Türk dövlətləri bir araya gəlib Xocalı soyqırımını dünyaya qəbul etdirməlidir.
Daha sonra Türkiyə Azərbaycan Dərnəkləri Federasiyasının təşkilatçılığı ilə Nəsimi Rayon İcra Hakimiyyəti başçısının birinci müavini Gülarə Verdiyeva, Nəsimi rayon bələdiyyəsinin sədri Nazim Qaraxanov və rayon 54 nömrəli orta məktəbin direktoru Sahibə Abbasova İzmit şəhər Peşə və Texniki Anadolu Liseyinin şagirdləri ilə görüş keçiriblər. Görüşdə Nəsimi Rayon İcra Hakimiyyəti başçısının birinci müavini Gülarə Verdiyeva bildirib ki, Xocalı faciəsi nəinki Azərbaycan xalqına, bütün bəşəriyyətə qarşı törədilmiş dəhşətli cinayətdir. Xocalı faciəsi ilə bağlı faktları eşidən şagirdlər bu cür hadisələri yalnız filmlərdə gördüklərini bildiriblər. İnsanlıq tarixində belə faciənin törədilməsini təsəvvürlərinə belə gətirmədiklərini deyən şagirdlər bu dəhşətli cinayət barədə həmyaşıdlarına məlumat verəcəklərini deyiblər.
Nəsimi rayon 54 nömrəli orta məktəbin direktoru Sahibə Abbasova isə rəhbərlik etdiyi təhsil ocağının şagirdlərinin Xocalı faciəsi ilə bağlı hazırladığı əl işlərini türkiyəli şagirdlərə təqdim edib. Liseyin rəhbərliyi faciəni xatırladan bu əl işlərinin təhsil ocağının muzeyində saxlanılacağını bildirib.
Xocalı soyqırımının 26-cı ildönümü ilə əlaqədar Türkiyədə təşkil olunan silsilə tədbirlərdə iştirak etmək üçün qardaş ölkədə səfərdə olan nümayəndə heyəti Kocaeli şəhər valisi Hüseyn Aksoy və Körfəz bələdiyyəsinin sədri İsmayıl Baranla da görüşüb. Görüşdə vali Hüseyn Aksoy bildirib ki, Azərbaycanın üzləşdiyi Dağlıq Qarabağ problemi qardaş Türkiyəni də narahat edir. O, Xocalı soyqırımından danışaraq bildirib ki, Qərb ölkələri bu faciəyə biganə yanaşır və beynəlxalq təşkilatlar tezliklə ermənilərin törətdiyi bu soyqırımına düzgün hüquqi qiymət verməlidir.
Körfəz bələdiyyəsinin sədri İsmail Baran isə bildirib ki, Xocalı soyqırımı Türkiyənin də ağrı-acısıdır. Azərbaycanı narahat edən Ermənistan-Azərbaycan Dağlıq Qarabağ münaqişəsi Türkiyəni də narahat edir. O vurğulayıb ki, tarixən ermənilərin türk xalqlarına qarşı törətdiyi vəhşiliklər 1992-ci il fevralın 26-da Xocalı şəhərində təkrarlanıb. Ermənilərin Xocalıda törətdiyi vəhşiliyin soyqırımı olduğunu vurğulayan bələdiyyə sədri dünya ictimaiyyətini bu qətliama laqeyd qalmamağa çağırıb.
Nümayəndə heyətinin Xocalı soyqırımının 26-cı ildönümünün ilə əlaqədar tədbir və görüşləri davam edir.
Baki-xeber.com
