Nizami RPİ-də Xocalı soyqırımının 26-cı ildönümünə həsr olunmuş tədbirdə idarənin rəisi, polis polkovniki Ədalət Abbasov bildirib ki, dünyada baş verən bütun müharibələr, kütləvi qırğınlar öz xarakteri, nəticələri ilə bəşəriyyətə həm maddi, həm də mənəvi zərbə vurub.
Ermənistanın millətçi rejiminin Xocalıda törətdiyi qeyri-insani hərəkətlər isə bütün əxlaq, mənəviyyat normalarına ziddir. Körpələri, uşaqları, qadınları, qocaları, yaralı döyüşçüləri faşist üsulları ilə qətlə yetirmək, dinc, əliyalın insanları yalnız azərbaycanlı olduqları üçün işgəncələrə məruz qoymaq bütün sivil dəyərlərə həyasızcasına meydan oxumaqdır.
Milli Məclisin deputatı Aydın Mirzəzadə qeyd edib ki, Azərbaycan xalqı 200 il ərzində erməni şovinistləri tərəfindən davamlı olaraq etnik təmizləməyə, soyqırıma məruz qalıb. 1988-ci ildə isə öz tarixi torpaqlarında yaşayan yüz minlərlə soydaşımız tarixi torpaqlarından qovulmuş, bununla da Ermənistan monoetnik dövlətə çevrilib. 1988-ci ildən Dağlıq Qarabağ ətrafında başlayan hadisələr növbəti dəfə kəndlərin, şəhərlərin dağılması, on minlərə günahsız insanın ölümü, Xocalı adlı bir şəhərin xəritədən silinməsi ilə tarixin qan yaddaşına yazılıb.
Hadisələrin canlı şahidi, “Xocalı Soyqırımı Tanıtma” İctimai Birliyinin sədri Şamil Sabiroğlu, Nizami RPİ-nin Təşkilati inspektor qrupunun baş inspektoru Rəhman İsmayılov o qanlı gecədə baş verənləri, polis əməkdaşlarının şəhəri, dinc əhalini qorumaq, düşməni daha çox itkiyə məruz qoymaq üçün göstərdikləri qəhrəmanlıqlar barədə xatirələrini danışıblar.
Sonra hücum zamanı erməni faşistlərinə əsir düşmüş Dürdanə əsirlikdə onların başına açılan müsibətlərdən danışıb.
Həmin vaxt Xocalı Telefon Qovşağında operator işləyən 20 yaşlı Dürdanə Ağayeva qardaşıyla birlikdə əsr düşüb. Onun danışdıqlarına ürək ağrısız qulaq asmaq mümkün deyildi. Dürdanə xanım gördüklərini və yaşadıqlarını qələmə alaraq “Erməni zindanında səkkiz gün” adlı kitabını Türkiyədə çap etdirib. Sonra həmin kitab Heydər Əliyev Fondunun köməkliyi ilə rus dilinə tərcümə olunub.
Anım mərasiminə yekun vuran polis polkovniki Ədalət Abbasov Azərbaycan dövlətinin Xocalı soyqırımının dünya ictimaiyyətinə çatdırılması üçün davamlı və ardıcıl siyasət həyata keçirdiyini qeyd edib, bunun nəticəsi olaraq, dünyanın onlarla parlamentinin Xocalı qətliamını soyqırım aktı kimi tanıdığını, 6 ölkədə şəhid şəhərin xatirəsinə 9 abidə ucaldıldığını diqqətə çatdırıb.
Çingiz Şıxverdiyev, DİN Mətbuat Xidmətinin əməkdaşı
