Azərbaycan Respublikasının Türkmənistandakı Səfirliyində 20 Yanvar faciəsinin 28-ci ildönümü ilə bağlı tədbir keçirilib. Tədbirdə Səfirliyin əməkdaşları, Türkmənistanda yaşayan həmvətənlərimiz və ictimaiyyət nümayəndələri iştirak edib. Tədbir şəhidlərin xatirəsinin bir dəqiqəlik sükutla anılması ilə başlayıb.
Tədbirdə çıxış edən səfir Həsən Zeynalov 1990-cı ilin yanvar ayının 19-dan 20-nə keçən gecə Bakıda dinc əhaliyə qarşı sovet qoşunlarının törətdiyi qətliam haqqında məlumat verərək, Azərbaycan xalqının müstəqillik tarixindəki bu günün əhəmiyyəti barədə danışıb. Azərbaycanın müstəqilliyi və ərazi bütövlüyü üçün xalqımızın haqlı tələbinə qarşı törədilən bu qətliamın məqsədinin xalqın milli azadlıq iradəsini qırmaq, xalqı başına gətirilənlərlə barışmağa məcbur etmək olduğunu bildirən çıxışçı bu hadisənin sovet rejiminin xislətini, onun məqsədinin xalqları müstəmləkədə saxlamaq olduğunu ortaya çıxardığını bildirib. Həmin dövrdə respublika rəhbərliyinin xəyanətkarlığının heç də sovet rejimindən geri qalmadığı diqqətə çatdırılıb. Mülki əhaliyə qarşı həyata keçirilən bu amansız qətliamı dünya ictimaiyyətinə çatdıran, onun təqsirkarlarını açıq şəkildə ifşa edənin məhz ümummilli lider Heydər Əliyev olduğunu bildirən çıxışçı onun qətliamdan bilavasitə sonra ailəsi ilə birlikdə Azərbaycanın Moskvadakı nümayəndəliyinə gələrək keçirdiyi mətbuat konfransı barədə məlumat verib, dünya ictimaiyyətinin faciəni və onun mahiyyətini bu mətbuat konfransı vasitəsilə öyrəndiyini qeyd edib. 20 Yanvar faciəsinə yalnız Heydər Əliyev hakimiyyətə qayıtdıqdan sonra siyasi-hüquqi qiymət verildiyini, şəhidlərin xatirəsinin əbədiləşdirildiyini diqqətə çatdıran səfir şəhidlərin əziz xatirəsinin xalqımızın yaddaşında daim yaşayacağını qeyd edib. Şəhidlərin ruhunun şad olması üçün müstəqil dövlətimizin güclənməsi naminə hər bir azərbaycanlının əlindən gələni etməli olduğunu bildirən səfir bu gün Prezident İlham Əliyevin rəhbərliyi ilə görülən işlərin buna ən yaxşı nümunə olduğunu diqqətə çatdırıb.
Tədbir iştirakçıları da çıxış edərək, bu günün yalnız 1990-cı ilin 20 yanvar tarixində deyil, həm də dövlətimizin müstəqilliyi və ərazi bütövlüyü uğrunda həlak olmuş bütün şəhidlərin xatirə günü kimi çox dəyərli olduğunu, hər bir azərbaycanlının ürəyində yaşadığını qeyd ediblər. Bu gün də vətənimizin ərazi bütövlüyü uğrunda şəhid verdiyimizi qeyd edən çıxışçılar xalqımızın azadlıq və dövlətçilik mübarizəsində əzminin heç bir zaman qırılmayacağını, əksinə, daha da güclənəcəyini bəyan ediblər.
Çıxışlardan sonra tədbir iştirakçıları 20 Yanvar faciəsinə həsr olunmuş foto-sərgiyə və sənədli filmə tamaşa ediblər.
Namiq QULİYEV
