Bu gün Dini Qurumlarla İş üzrə Dövlət Komitəsi (DQİDK), Mətbuat Şurası və Bakı şəhəri “Məşədi Dadaş” məscidi dini icmasının təşkilatçılığı ilə “Söz azadlığı və dini icmalar” mövzusunda konfrans keçirilib. Trend-in məlumatına görə, konfransda çıxış edən DQİDK sədri Mübariz Qurbanlı bildirib ki, bu gün Azərbaycanda dövlət-din modeli mövcuddur və bu modelin təbliğinə ehtiyac var.
Komitə sədri vurğulayıb ki, Azərbaycanda söz və mətbuat azadlığı yüksək səviyyədədir.
M.Qurbanlı vurğulayıb ki, din həssas mövzu olduğundan bu mövzuda yazan jurnalistlər din haqqında, dünyada gedən dini proseslər haqqında geniş biliyə malik olmalıdırlar: "Azərbaycanda din mövzusunda yazan jurnalistlərlə mütəmadi iş aparılır, dini mövzuda seminarlar təşkil olunur və bu iş növbəti ildə də davam etdiriləcək".
Tədbirdə çıxış edən Mətbuat Şurasının sədri, Milli Məclisin deputatı Əflatun Amaşov da jurnalistlərin dini biliklərinin artırılmasının vacibliyini vurğulayıb. O qeyd edib ki, növbəti ildə də jurnalistlərin dini biliklərinin artırılması istiqamətində tədbirlər davam etdiriləcək.
Daha sonra DQİDK-nin Mətbuat xidmətinin rəhbəri Yaqut Əliyeva ölkədə dini vəziyyət haqqında hesabat təqdim edib.
Tədbirdə çıxış edən Milli Məclisin deputatı Hikmət Babaoğlu bildirib ki, din həssas mövzu olduğu üçün bu istiqamətdə maarifləndirmə işlərinə həmişə ehtiyac var. O qeyd edib ki, din ailədən başlayır.
H.Babaoğlu vurğulayıb ki, dini maarifləndirmə işlərinin aparılması dini manipulyasıyanın qarşısını almağa imkan verir. Bu baxımdan H.Babaoğlu bu cür tədbirlərin keçirilməsinin əhəmiyyətini və vacibiyini vurğulayıb.
Tədbirin sonunda KİV nümayəndələri arasında keçirilən “İslam həmrəyliyi və media” mövzusunda keçirilən müsabiqənin qalibləri mükafatlandırılıb.
“Azərbaycan dinlərarası dialoqa, İslam həmrəyliyinə böyük töhfə baxımından unikal ölkədir”. Bunu da M.Qurbanlı deyib.
M.Qurbanlı qeyd edib ki, bu gün dünyada dindən sui-istifadə halları müşahidə olunur: "Dindən sui-istifadə edərək dünyanın ayrı-ayrı regionlarında radikal qruplar yaratmaqla faciələrə gətirib çıxaran hadisələr törədilir".
O bildirib ki, bu cür hadisələrin qarşısını almaq üçün dinlərarası dialoqa, İslam dünyasının daxilində həmrəyliyə böyük ehtiyac var: "Azərbaycan bu baxımdan nümunəvi ölkədir. Ölkəmizdə dövlət-din modeli mövcuddur".
Komitə sədri əlavə edib ki, Azərbaycan dinlərarası dialoqa, İslam həmrəyliyinə böyük töhfə verməkdədir.
