Noyabrın 3-də “Azərbaycan” nəşriyyatında “Mən fəxr edirəm ki, azərbaycanlıyam” adlı layihənin təqdimatı keçirilib. Təqdimat mərasimində layihənin rəhbəri Qərib Azadxanoğlu gələcəkdə görəcəkləri işlərdən geniş bəhs edib.
Layihənin mətnində bildirilir ki, məqsəd Azərbaycanımızı həmsərhəd ölkələrlə, Asiya, Avropa, Afrikada, yəni, bir sözlə, bütün dünyada tanıtmaq, ölkəmizdə gedən uğurlu inkişafı daha da parlaq şəkildə nümayiş etdirmək, Ümummilli liderimiz Heydər Əliyevin təməlini qoyduğu siyasətin layiqli davamçısı cənab İlham Əliyevin nəinki Azərbaycan xalqına, o cümlədən ölkəmizdə yaşayan azsaylı xalqların nümayəndələrinə göstərdiyi hörmət və ehtiramı, onlara verilən din və dil sərbəstliyini, habelə özlərinin qoruyub saxladıqları milli adət-ənənələrə yaxından göstərdiyi dəstəyi, ölkəmizdə keçirilən müxtəlif idman oyunlarını, yüksək məramlı konfransları, digər xalqların ölkəmizdə öz mədəni irsini təbliğ etməsini və s. mühüm məsələlərin uğur və inkişafını yerli və xarici tamaşaçılara ətraflı təbliğ etməkdən ibarətdir: “Azərbaycan xalqının tarixi keçmişi, adət-ənənələri, dili, mədəniyyəti, dini münasibətləri dünya xalqları içərisində həmişə fərqlənib. Bu fərqləri digər xalqların diqqət mərkəzinə yönəltmək, onları daha da geniş işıqlandırmaq vacibdir.
Azərbaycan tarixi, coğrafi baxımdan Asiya ilə Avropa arasında siyasi, mədəni və iqtisadi keçid rolunu şərəflə yerinə yetirdiyi üçün, həmsərhəd ölkələrlə və bütün dünya ölkələri ilə sıx əlaqə saxlamağa həmişə üstünlük verib. Bu da bizim həmin ölkələrlə iqtisadi, siyasi və mədəni münasibətlərimizin möhkəmlənməsində mühüm rol oynayır. Qədim İpək Yolu məhz ulu öndərin təşəbbüsü ilə bərpa olunub və bu yoldan Asiya və Avropa ölkələri yüksək səviyyədə bəhrələnirlər. Bu ümumi fikirlərin ətrafında geniş diskussiya xarakterli verilişlər təşkil olunacaq. Həmin verilişlərdə respublikanın ən görkəmli alimləri, tarix, coğrafiya, mədəniyyət, incəsənət xadimləri iştirak edəcəklər və həmin insanlar verilişin proqramına uyğun olaraq öz fikirlərini geniş şəkildə şərh edərək tamaşaçılara çatdıracaqlar”.
Sonra tədbirdə çıxış edən natiqlər bildiriblər ki, layihə çərçivəsində televiziyalarda proqramların hazırlanması, azsaylı xalqların nümayəndələrindən ibarət bədii ansamblın fəaliyyəti və “Mən fəxr edirəm ki, azərbaycanlıyam” adlı jurnalın buraxılması nəzərdə tutulub. Artıq sözügedən adda jurnalın ilk nömrəsi nəfis tərtibatda işıq üzü görüb.
Məhəmmədəli QƏRİBLİ
