Azərbaycan Tibb Universitetində (ATU) dünya azərbaycanlılarının soyqırımına həsr edilmiş "Yara" sənədli filminin təqdimatı olub.
"Xocalı Soyqırımını Tanıtma" İctimai Birliyinin üzvü, jurnalist Emil Lətifoğlunun layihəsi əsasında soyqırım qurbanlarına həsr edilən "Yara" sənədli filmi universitetin professor-müəllim heyəti, xarici və yerli tələbələr, həm də dəvət olunmuş qonaqlar üçün nümayiş etdirilib. Dövlət himninin səsləndirilməsi ilə başlayan tədbirdə Azərbaycanın ərazi bütövlüyü uğrunda şəhid olmuş həmvətənlərimizin xatirəsi bir dəqiqəlik sükutla yad edilib.
"Xocalı Soyqırımını Tanıtma" İctimai Birliyinin Binəqədi rayon şöbəsinin sədri, Xocalıdan olan məcburi köçkün Ayna Allahyarqızı bir Xocalı sakini olaraq yaddaşına həkk olunan hadisələrdən danışıb.
Daha sonra ATU-nun tədris işləri üzrə prorektoru, professor Sabir Əliyev çıxış edərək, Azərbaycana qarşı törədilən soyqırımlar haqqında ümumi məlumat verib. "Azərbaycan xalqı çox zülmlərə dözüb. Bu gün bizim üçün ən ağır günlərdən biridir. XX əsrdə Azərbaycan xalqının yaşadığı faciələri, soyqırımları, qətliamları, demək olar ki, heç bir xalq yaşamayıb. Əgər biz keçən əsrin əvvəllərindən danışmağa başlasaq, 18-ci illərdə Azərbaycan xalqı soyqırıma, 48-ci ildə deportasiyaya məruz qalıb. 88-ci ildə xalqımız yenidən həm deportasiya, həm də faciəli günlər yaşayıb".
"Xocalı Soyqırımını Tanıtma" İctimai Birliyinin sədri Şamil Sabiroğlu da həmin faciəli günlərlə bağlı yaşadıqlarını bölüşüb. Bildirib ki, bu cür filmlərin çəkilməsi və nümayişi çox önəmlidir, xüsusən də gənclər belə filmərə baxmalı, faciə haqqında məlumatlı olmalıdır.
"Yara" sənədli filminin layihə rəhbəri, Azərbaycan Respublikası Gənclər və İdman Nazirliyinin sektor müdiri Elşən Hüseynov bir çox faktlara dayanaraq ermənilərin Azərbaycan xalqına qarşı törətdiyi amansızlıqlardan söz açıb. Filmin ssenari müəllifi və rejissoru Emil Lətifov qeyd edib ki, bu sənədli filmi çəkərkən, sanki yenidən o faciələri yaşayıb, ürək ağrısı ilə qəlblərinin süzgəcindən keçiriblər.
Tədbirdə ATU-nun insan anatomiyası kafedranın professoru, tibb üzrə elmlər doktoru Mübariz Allahverdiyev də çıxış edərək, bütövlükdə Azərbaycan xalqına və bütün bəşəriyyətə qarşı yönəldilmiş Xocalı soyqırımını öz ağlasığmaz qəddarlığı və qeyri-insani cəza üsulları ilə bəşər tarixində bir vəhşilik aktı adlandırıb. Hamını bu soyqırım aktlarını unutmamağa və işğal altında olan torpaqlarımızın azad edilməsi yolunda əllərindən gələni etməyə səsləyib.
Sonra "Qafqaz media" İctimai Birliyinin və eyni adlı saytın rəhbəri Hacı Azadə Taleh çıxış edərək erməni vandalizmini lənətləyib və soyqırıma həsr etdiyi şeiri diqqətə çatdırıb. Ardınca ATU-nun tələbələri, II müalicə-profilaktika fakültəsinin I kurs 363a qrupu tələbəsi Nuranə Mənsimzadənin ifasında xalq şairi Cabir Novruzun "Sevin Azərbaycanı" şeiri, tibbi-profilaktika fakültəsinin II kurs 627b qrupu tələbəsi Taleh Qasımovun ifasında xalq şairi Məmməd Arazın "Ayağa dur, Azərbaycan!" şeiri səsləndirilib.
Baki-xeber.com
