Beynəlxalq Avrasiya Mətbuat Fondunun ABŞ-ın Azərbaycandakı Səfirliyinin dəstəyilə həyata keçirdiyi "Regionlarda Məcburi Köçkün Gənclərinin Vətəndaş Cəmiyyəti Quruculuğunda İştirakının dəstəklənməsi" və "Qadınlar, İcma və Sosial Ədalət: Məcburi Köçkün İcmalarında Gender əsaslı zorakılığın həlli" layihələri çərçivəsində Bərdə, Tərtər, Ağdam, Füzuli rayonlarının icra hakimiyyətləri, maraqlı tərəflər və aidiyyəti qurumlarla görüşlər keçirilib. Görüşlər zamanı layihələrin fəaliyyət planı müzakirə olunub, layihələrin keçiriləcəyi məkanlar, hədəf kütləsi müəyyənləşdirilib və digər təkliflər dəyərləndirilib.
Hədəf rayonlarda - Tərtər, Ağdam və Füzulidə məcburi köçkünlərin kompakt yaşadığı qəsəbələrdə layihədən faydalananları təyin etmək üçün hər bir rayondan 100 olmaqla 300 AGDM sorğu keçirilib. Hər rayonda qadın hədəf qrupları formalaşdırılıb və mərkəzi Tərtər rayonunda olmaqla Qadın Resurs Mərkəzi yaradılıb.
Qeyd edək ki aprel-may ayları ərzində hədəf rayonlarda "Regionlarda Məcburi Köçkün Gənclərinin Vətəndaş Cəmiyyəti Quruculuğunda İştirakının dəstəklənməsi" layihəsi çərçivəsində Bərdə, Tərtər və Ağdam rayonlarından seçilmiş məcburi köçkün gənclərə yeni media bacarıqları, neyro-linqvistik proqramlaşdırma, fərdi inkişaf, icmalar üçün maliyyə axtarışı, layihələrin yazılışı və idarə olunması kimi mövzularda təlimlər keçiləcək.
"Qadınlar, İcma və Sosial Ədalət: Məcburi Köçkün İcmalarında Gender əsaslı zorakılığın həlli" layihəsi çərçivəsində Tərtər, Füzuli, Ağdam rayonlarındakı məcburi köçkün qadın və kişilər, icra hakimiyyəti orqanlarının əməkdaşları üçün qadın hüquqları, məişət zorakılığı, gender əsaslı zorakılıq, beynəlxalq hüquqi normalar erkən evliliyin fəsadları və s. istiqamətində təlimlər keçiriləcək. Bundan başqa, layihə çərçivəsində hədəf rayonların qadın qrupları ilə icra hakimiyyəti strukturlarının birgə şəhər görüşləri təşkil olunacaq və müzakirələr aparılacaq. Eyni zamanda qadınları gücləndirmək, müasir texnologiyadan istifadə etmək və informasiya bazasına çıxış əldə etmələri üçün 2 ay boyunca kompyuter kursları tədris ediləcək.
Baki-xeber.com
