Dekabrın 17-də qoşunların təmas xəttində düşmənlə döyüş toqquşmasında Silahlı Qüvvələrimizin hərbi qulluqçusu əsgər Kərimov Taleh Saleh oğlu həlak olub. Baki-xeber.com-un xəbərinə görə, bu barədə Müdafiə nazirliyinin mətbuat xidməti məlumat yayıb. Məlumatda o da bildirilir ki, Müdafiə Nazirliyinin rəhbərliyi şəhidin yaxınlarına, əzizlərinə dərin hüznlə baş sağlığı verir və səbr diləyir! Müdafiə Nazirliyi , həmçinin, qoşunların təmas xəttində vəziyyətin gərginləşdirilməsinə görə məsuliyyətin bütünlüklə Ermənistanın cinayətkar hərbi-siyasi rəhbərliyinin üzərinə düşdüyünü bəyan edir.
Bu arada virtualaz.org saytı Ermənistan Müdafiə Nazirliyinin rəsmisi Artsurun Ovanisyana istinadən bu gecə qoşunların təmas xəttinin Qarabağ istiqamətində "şiddətli döyüşlərin” getdiyinə dair məlumat yayıb. Xəbərə görə, Ovansisyan ötən gecənin "çox gərgin keçdiyini”, təfərrüatların qondarma "DQR müdafiə nazirliyi” tərəfindən açıqlanacağını deyib.
Daha sonra Dağlıq Qarabağdakı qondarma erməni rejiminin "müdafiə nazirliyi” bildirib ki, dekabrın 17-dən 18-nə keçən gecə Azərbaycan silahlı qüvvələrinin bölmələri təmas xəttinin cənub, şərq və şimal-şərq istiqamətlərində "növbəti diversiya həmlələri” edib.
Bu döyüşlər zamanı Ermənistan silahlı qüvvələrinin hərbi qulluqçuları Aqasi Qriqoryan (1996) və Ruben Aleksanyan (1996) öldürülüblər. Bundan əlavə dekabrın 17-də təmas xəttinin şimal hissəsindəki erməni mövqelərindən birində 1992-ci ildə anadan olmuş Qor Ohanyan "naməlum şəraitdə aldığı odlu silah yarasından” ölüb.
