"Vətənim, soy-köküm, ailəm, sənətim, gələcək arzularım barədə danışmaq mənim üçün həmişə fəxrdir. Atam Ramil Kazımov köklü şuşalıdır. İşğaldan əvvəl heç cür inana bilməyiblər ki, tac-şəhərimizdəki son anlarıdır və həmin əsrarəngiz məkanı tərk edərək, 30 il ərzində Şuşasız yaşamaq məcburiyyətində qalacaqlar. Nənəm orada məktəb direktoru vəzifəsində çalışırdı və babamla birgə son günədək doğma yurd-yuvadan çıxmaq niyyətində olmayıblar. Özlərinin dediyinə görə, vəziyyət elə gərginləşibmiş ki, artıq qalmaq mümkün deyilmiş. Əlbəttə, bütün həyatı Şuşa ilə bağlı insanların belə uzun müddət onunla ünsiyyəti itirmələri xeyli ağır və ağrılıdır. İndi isə Vətən müharibəsində qazandığımız möhtəşəm Zəfər zəminində Qarabağın tam azadlığı hər bir azərbaycanlı kimi biz də çox sevindirir. Buna görə də cənab Prezident, Müzəffər Ali Baş Komandan İlham Əliyevə ailəmiz, bütün şuşalılar adından minnətdarlığımı bildirirəm!"
Bu sözləri gənc və istedadlı həmyerlimiz, N.A.Rimski-Korsakov adına Sankt-Peterburq Dövlət Konservatoriyasının "Akademik vokal" şöbəsinin II kurs tələbəsi Teymur Kazımov deyib. Hələ 19 yaşında olmasına baxmayaraq, Azərbaycan mədəniyyətinin, musiqisinin səsini bütün dünyaya çatdıran, ölkə daxilində və xaricdə çoxsaylı nüfuzlu tədbirlərə qatılan vokalçı 27 beynəlxalq və respublika musiqi müsabiqələrinin laureatıdır. Onlardan iyirmisində birinci yeri tutub, ikisində Qran-Priyə layiq görülüb. Ötən ilin martında ABŞ-nin Florida şəhərində baş tutan Cövdət Hacıyev adına "Florida Keys" VIII beynəlxalq onlayn musiqi müsabiqəsi (Vokal Pro nominasiyasında Qran-Pri və Heydər Əliyev mükafatı), 30 oktyabrda Sankt-Peterburqda keçirilən "Nevski solovey" Ümumrusiya uşaq vətənpərvərlik mahnı konkursu (Müslüm Maqomayevin "Baharlı yurdum - Azərbaycan" mahnısını ifasına görə 1-ci yer), 2021-ci ilin 2-14 yanvarında Türkiyədə Caspi Art Competitions "New Year’s Stars" beynəlxalq festivalı (1-ci yer), 18 fevralda Moskvada "Qara Qarayev adına açıq internet müsabiqəsi" (1-ci yer və Peşəkar mükəmməlliyə və sənətkarlığa görə Xüsusi Diplom), 26-28 martda "Yelena Obraztsova Mədəniyyət Mərkəzinin mükafatı uğrunda III Vokal və instrumental sənət müsabiqəsi" (1-ci yer), 25-30 mayda Tbilisidə Nodar Andquladze adına IV Beynəlxalq vokal müsabiqəsi (Akademik vokal üzrə 1-ci yer), 12 iyunda "Florida Keys" VI beynəlxalq onlayn musiqi müsabiqəsi (1-ci yer və Fikrət Əmirovun əsərinin ən yaxşı ifasına və xaricdə Azərbaycan musiqisini təbliğə görə xüsusi pul mükafatı), yenə də həmin ilin 10-21 avqustunda ABŞ-nin Klivlend şəhəribdə "The Stars of Summer" Vokalçıların və pianoçuların II Beynəlxalq festivalı (Qran-Pri mükafatı), 1-10 oktyabrda Londonda reallaşan "Stars of the Albion" beynəlxalq yarışması (1-ci yer və Akademik vokal nominasiyasında "Xalqın seçimi" mükafatı), 2020-ci il oktyabrında Bakıda BMA məktəb-studiyasının 40 illiyinə həsr olunmuş "Akademik, Xalq və Caz Musiqisi İfaçilarinin Birinci Beynəlxalq Müsabiqəsi" (1-ci yer), noyabrın 8-də Praqada Çexiya Respublikası Mədəniyyət Nazirliyinin dəstəyi ilə "Gold World and Gold Europe Festivals" çərçivəsində "Jiskra 2020 - Praha" onlayn müsabiqəsi (1-ci yer), 1-5 iyulda Gürcüstanın Borjomi şəhərində "The 1st International competition Harmonia" beynəlxalq yarışması (1-ci yer), 27 aprel-4 may 2018-ci ildə Türkiyədə keçirilən "Harmony" beynəlxalq müsabiqəsi (1-ci yer) və digər ünlü festivallar bu qəbildəndir.
Bir məqamı da vurğulayaq ki, Teymur incəsənətimizi təbliğ edən vətənpərvər sənətçi kimi yalnız müsabiqələrlə kifayətlənmir, Azərbaycan diasporunun sərhədlərimizdən kənarda, əsasən də Rusiyada təşkil etdiyi mərasimlərə mütəmadi şəkildə qatılır. Rusiya-Azərbaycan Parlamentlərarası Dostluq Qrupunun rəhbəri, Rusiya Dövlət Dumasının deputatı Dmitri Savelyev KİV-ə müsahibəsində ölkələrimiz arasında yeni humanitar, mədəni və təhsil layihələrindən bəhs edərkən fəal və talantlı həmyerlimizin də adını çəkir: "Belə proyektlərdə bizim ortaq mədəni irsimizə aid olan gələcək ulduzlar da diqqətdən kənarda qalmır. Belə ki, mötəbər münsiflər heyətimiz "Neva bülbülü" Ümumrusiya Vətənpərvərlik Uşaq Mahnı Müsabiqəsində iştirak edən 118 istedadlı uşaq və yeniyetmələr arasında birinci yerə məhz Müslüm Maqomayevin "Azərbaycan - baharlı yurdum" mahnısını ifa edən Bakı Musiqi Akademiyasının musiqi məktəb-studiyasının məzunu Teymur Kazımovu layiq görüb. O, hazırda Sankt-Peterburq Dövlət Konservatoriyasında təhsilini davam etdirir və ikitərəfli mədəni əlaqələrə öz layiqli töhfələrini verir".
Kazımov Teymur Ramil oğlu 2005-ci il aprelin 15-də Bakı şəhərində doğulub. 2019-cü ildə Qara Qarayev adına Mərkəzi İncəsənət Məktəbinin "Fortepiano" ixtisası üzrə tam kursunu Fərqlənmə Diplom ilə bitirib. 2022-ci ildə Bakı şəhəri Nərimanov rayonunda yerləşən "ERUDİT" tam orta təhsilı məktəbini əla qiymətlərlə başa vurub. Eyni zamanda Üzeyir Hacıbəyli adına BMA-nın Orta ixtisas musiqi məktəb-studiyasında "Akademik vokal" ixtisası üzrə təhsil alıb.
Vokal ifaçısı respublikamızda istedadlı, yaradıcı gənclərə dövlət qayğısından çox razıdır: "Keçmiş sovetlər ittifaqı dövrünü görməsəm də, oxuyub-eşidib öyrəndiklərimdən ötən əsrin 60-80-ci illərində Ulu Öndər Heydər Əliyevin Azərbaycan mədəniyyətinə, incəsənətinə, ədəbiyyatına qayğısından, bəstəkarları, xanəndələri, şair və yazıçılarımızı himayəsindən xəbərdaram. Çox şadam ki, cənab Prezident, Müzəffər Ali Baş Komandan İlham Əliyev də atasının – Ümummilli Liderimizin yolunun sədaqətli davamçısı, müstəqil respublikamızın yetirdiyi, yaradıcılıqları ilə xalqın xidmətində dayanan fikir, sənət adamlarının dayağıdır, ümid, inam yeridir. Mənə də göstərilən etimadı doğrultmağa, mədəniyyət nümunələrimizin dünyada tanıdılması üçün bilik və bacarığımı əsirgəməməyə çalışacağam".
Məktəb-studiyanın direktor müavini, sənətşünaslıq üzrə fəlsəfə doktoru Aytən İbrahimova sevimli tələbələri haqqında danışır:
Teymur Kazımov çox istedadlı musiqiçidir. Bakı Musiqi Akademiyası nəzdində Orta ixtisas musiqi məktəb-studiyasının parlaq məzunlarındandır. Oxuduğu illərdə özünü məsuliyyətli, səliqəli və çalışqan şagird kimi göstərib. Gözəl səsə malik olması ilə yanaşı, özünü pianoçu, bəstəkar kimi də sınayır və gözəl nəticələr təqdim edə bilir. Bunları nəzəriyyə fənlərindən ona dərs deyərkən aşkarlamışam. Görkəmli macar bəstəkarı Ferens Listi - onun da fəaliyyəti çoxşaxəlidir, bəstəkar, pianoçu, dirijor, həm də pedaqoq idi - özünə nümunə seçməsi məni çox sevindirir. Teymurun uğurları qürurvericidir. Onunla iki yaradıcı işimiz olub. İlk təqdim etdiyimiz, 44 günlük Vətən savaşımızdakı Qələbə münasibətilə Gülər Əlvanqızının sözlərinə yazdığım "Zəfər nəğməsi" əsərimin uğurlu ifasıdır. Daha sonra məktəb-studiyanın 40 illiyinə həsr etdiyim himni özünəməxsus tərzdə ifa etdi. Teymurun nailiyyətləri bizi sevindirir, xüsusən də ixtisas fənnindən illərdir dərs deyən, onun hər müvəffəqiyyətini böyük məmnunluqla qarşılayan Ofeliya Axundovanı... Teymura daim öz üzərində işləməyi və yeni uğurlara imza atmağı diləyirəm! Hər zaman yalnız irəli!!!
Teymur Kazımov Vətənimizin bir parçası və sənət məbədi olan Qarabağımızdan səsləri havalanan, yaddaşlarda əbədi yaşayacaq Xan Şuşinskinin, Bülbülün, digər korifeylərimizin layiqli davamçısıdır. Yağı düşmənin ata-baba torpaqlarını işğalı səbəbindən "Qafqaz Konservatoriyası"nda təhsil ala bilməsə də, tale onu Qarabağ zənguləsindən, Şuşa oxusundan, səs vergisindən məhrum eləmədi... Uğurlar olsun!
Qurban CƏBRAYIL
"Mədəniyyət" jurnalının redaktoru
