Son günlər ümumtəhsil məktəblərində baş verənlərlə bağlı sosial şəbəkələrdə, digər ictimai platformalarda qızğın müzakirələr aparılır. Bir çoxları şagirdlərin intizamsız hərəkətlərinə görə birbaşa məktəb rəhbərliyini ittiham edir, bəziləri isə valideynlərin məsuliyyətsizliyi barədə danışırlar. "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində bu barədə yazıb. A.Quliyev daha sonra yazır: "Elə edəcəklər ki, axırda məktəblərdə direktor qalmayacaq, işləmək istəməyəcəklər...
Şagird oxumursa, günahkar direktordu. Repetitorluq yayılırsa, direktor günahkardı. Məktəbdə dava düşdü, yenə günah direktorundu. Şagirdlər sinifdə qeyri- etik hərəkətlər edirsə, suç direktorundur və sair. Bunlar məlum.Hansı məktəbdə bu tip şeylər varsa, direktorlar yaxalarını kənara çəkməsinlər, qəbul etsinlər ki, bu sayaq neqativlərdə əsas məsuliyyət daşıyanlardan biri onlardı.
Ancaq daha hər türlü hadisədə direktorları " qanlı qovmaq" düzdürmü? ...Qeyri - dərs saatlarında, məktəbdən kənarda şagird( lər) in iştirakı ilə baş vermiş hadisəyə görə məktəb direktorunu bir nömrəli məsul tutmaq doğru deyil axı...Direktorlar məktəbdən çıxıb gedən şagirdin hərəkətlərinə sonadək necə nəzarət edə bilər? Məşhur kinodakı " Əhmədlə Leylanın atası kimi " gecə " çəpər dibində" yeniyetmə qızına nişan üzüyü qəbul edən valideynə görə direktorun nə günahı var? Yuxarı başı, hadisəni biləndən sonra hüquq mühafizə orqanlarına məlumat verə bilər,vəssalam.Ancaq bununla erkən nigahın qarşısı alınacaqmı? Hələ bəzi " ağzında çullu dovşan gəzdirənlər" yekə- yekə iddia edir ki, direktor hara baxır, atasının 12 yaşında ərə verdiyi həmin qızı niyə çağırıb müəllimlər otağında qızartmayıb, niyə " məktəb töhmətinə " hədəf etməyib və sair...Direktorun sərt təhqir və ifşa etdiyi həmin şagird sabah gedib özünü " Qız qalasından" atsa, bu dəfə yenə düşürlər direktorun üstünə ki, qatildi, uşağı intihara sövq elədi....
156 saylı məktəbin şagirdinin məlum hoqqabazlığı üzərində təmkinli düşünmək lazımdır.Direktor nə etsin ki, dərsdən qeyri saatlarda onun şagirdi hansı məktəbə məxsusluğu bilinməyən başqa şagirdə qarşı nəsə edib, bazarda adam döyüb ,ya oğurluq edib.....hansısa nazirin bir işçisi işdən sonra evində ailəsi ilə uyğunsuz davranırsa, buna nazir nə etsin? Məktəb direktoru da onun kimi..
Məktəblərin əsaslı və üstün funksiyası şagirdə təhsil verməkdir.Təlim- tərbiyə isə tək məktəblik deyil axı.Uşaq məktəbə savadsız, tupoy, anlayışsız gəlibsə, onu hansısa səviyyədə maarifləndirmək məktəbin və direktorun birbaşa borcudur.Təbii ki, uşağı məktəbdə təlim- tərbiyəyə cəlb etmək də vacib funksiyadır.Ancaq köntöy, heç bir tərbiyə almadan ,aqressiv davranışlarla silahlanmış uşağı məktəbə göndərən valideynlərin , ailələrin böyük məsuliyyət daşıdığını niyə demirik? Ailələrimizin məktəbə təhvil verdiyi belə uşaqlar təhsilin də, cəmiyyətin də altına qoyulan bombalardı .Ailədən məktəbə tərbiyəsiz və pozğun halda göndərilən uşağı sonradan bir yox, beş direktor da tərbiyə edə bilmir.Tək istisnalardan başqa.Məktəbin əsas işi islah- tərbiyə deyil ,təhsil , bilik, savad verməkdir.
Uşaqlar ilk olaraq ailədə tərbiyəsini, sonra isə məktəbdə təhsilini almalıdır. Əks halda müəllimlər , direktorlar o cür şagirdi islah və tərbiyə edincə, belə şagirdlər direktorun " anasını ağladırlar""
Bir yandan da hər şeyə görə məktəbi və məktəb direktorunu ittiham edənlərin tənəsi...Yazıq direktor, indi gəl duruş gətir bu ikiqat ittihamların, tənələrin qabağında..
Uşaqların təlim- tədris və təhsil prosesində Ailə- məktəb tandemini deyilişi gözəl söz birləşməsi kimi yox, mahiyyətini başa düşüb qəbul etmək lazımdır.Onlar bir - birinin davamıdır.Məktəb ailənin davamıdır, müəllim valideynlərin davamıdır.Tərbiyənin bazası əvvəlcə ailədə qoyulmalıdır ki, sonra onun üstündə məktəb direktorları tərbiyəni təkmilləşdirə və tədrisin- təhsilin bazasını qura bilsinlər. Başqa mexanizm yoxdur.
Prezidentin 14 fevralda inauqurasiya nitqinə bir daha baxmağı tövsiyyə edirəm. "Gənc nəslin formalaşması yalnız ailə - məktəb vəhdətində mümkündür."....
Məncə Təhsil nazirliyi ilə Ailə ........Komitəsi arasında işlək bir əməkdaşlıq sazişinin imzalanmasından başlamaq pis olmazdı....Ancaq işlək saziş, ictimaiyyətin və dövlət başçısının qarşısında icrası daim şəffaf hesabatlı saziş....
Bir də uşaqlarda aqressivlik, milli dəyərlərə hörmətsizlik və mənəvi pozğunluq yaradan sosial şəbəkə aludəçiliyinə qarşı nələrsə düşünmək lazımdır.Belə getsə , dövlətimizə vətəndaş, xalqımıza yaddaş daşıyıcıları yox, olsa- olsa " sosial şəbəkə uşaqları" yetişdirəcəyik..
Sovet dövrünün " tin uşaqları" belələrinin yanında şükürlü olacaq.."
Mətləb
