Azərbaycan beynəlxalq arenada sözün əsl mənasında nüfuz çəkisini, təsir imkanlarını və iqtisadi gücünü növbəti dəfə ortaya qoydu. Bu həm də dövlət olaraq siyasi-diplomatik zəfər hesab olunmalıdır. Azərbaycan Prezidentinin keçirdiyi görüşlərdə bir məqam çox diqqətedicidir: görüşlərin əksəriyyəti qarşı tərəfin müraciəti əsasında baş tutub. Prezident İlham Əliyevin Münxen Təhlükəsizlik Konfransı çərçivəsində keçirdiyi görüşlər beynəlxalq rezonans yaradıb. Ən təsirli Avropa KİV-ləri bu görüşlərə geniş yer veriblər. Bu, beynəlxalq ictimai rəyin formalaşmasında rol almış transmilli media subyektlərinin səhifələrindən daha aydın görünür. Azərbaycan Prezidentinin ABŞ-ın Dövlət katibi Antoni Blinken, Almaniya Kansleri Olaf Şolts, Ermənistanın baş naziri Nikol Paşinyan, ATƏT-in fəaliyyətdə olan sədri İan Borqun və digər şəxslərlə keçirdiyi görüşlər barədə xarici mediada çoxsaylı məqalələr dərc olunub. İnternet axtarış sistemləri göstərir ki, bu məqalələrin sayı 100-lərlədir. Bu kontekstdə diqqət çəkən məqam təkcə dövlətimizin başçısının keçirdiyi görüşlər barədə informasiya yayan media subyektlərinin kəmiyyəti ilə bağlı deyil. Ənənəvi yanaşmadan fərqli olaraq bu dəfə Avropadan yayımlanan transmilli media ilə yanaşı, Asiya və Afrikanın da nüfuzlu qurumları mövzunu gündəmdə saxlayıblar. Çin, Hindistan, Yaponiya, Səudiyyə Ərəbistanı, Qətər və digər 10-larla ölkədə fəaliyyət göstərən media subyektləri də mövzuya diqqət yetiriblər.
Bir məqama diqqət yetirək: konfransın açılışından 2 gün əvvəl - fevralın 14-də Azərbaycan Prezidenti İlham Əliyevin inauqurasiya mərasimi keçirilmişdi və xarici media subyektləri də həmin mövzuya da eyni həssaslıqla yanaşmışdılar. Növbədənkənar prezident seçkiləri günü və 14 fevral andiçmə mərasimi barədə də 100-lərlə məqalələr dərc edilmişdi. Bütün bunlar onu deməyə əsas verir ki, son dövrlərdə dövlətimizin adının çəkildiyi bütün proseslər ciddi şəkildə beynəlxalq reaksiya doğurur və xarici media subyektləri Azərbaycan mövzusunu diqqətdə saxlayırlar. Bu da təsadüfi deyil.
Azərbaycan iqtidarının uzun müddət ərzində apardığı müstəqil və balanslı xarici siyasət kursu öz bəhrəsini verməkdədir. Belə ki, Azərbaycan dünyanın bütün qitələrində, fərqli qütblərdə yerləşən ölkələrində eyni dərəcədə diqqətlə izlənilir. Azərbaycanın həmmüəllifi olduğu regional və beynəlxalq layihələr onu dünya üçün əvəzedilməz ölkəyə çevirir. Bundan əlavə, dövlətimiz Qərb ölkələri üçün əhəmiyyətli enerji qaynaqlarından biri, həmçinin Avropa ilə Asiya arasında ən mühüm nəqliyyat qovşağıdır. İki qitəni birləşdirən ən sərfəli nəqliyyat dəhlizləri Azərbaycan ərazisində layihələndirilib. Bu dəhliz Avropa və Asiya ilə yanaşı, bütövlükdə dünya üçün də əhəmiyyət daşıyır.
Diqqət edin, dünyanın nüfuzlu siyasətçiləri, dövlət və hökumət rəsmiləri Azərbaycan Prezidenti ilə görüşə özləri can atırdılar, yəni, görüş üçün özləri təşəbbüs göstərirdilər. Bu, ölkəmizin və onun Liderinin nüfuzunun göstəricisidir. Artıq hər kəs Azərbaycanın böyük bir gücə çevrildiyini qəbul edir. Azərbaycan təkcə regionda deyil, dünya miqyasında da özünü orta güc kimi nümayiş etdirməkdədir. Biz dünyaya sübut etdik ki, ərazi bütövlüyümüzü də, suverenliyimizi də özümüz bərpa etməyə qadirik. Təbii ki, bu reallığı bütün dünya başa düşür. Anlayır ki, Azərbaycana kifayət qədər təcrübəli, peşəkar, təcrübəli diplomat, siyasi xadim rəhbərlik edir. Bu da şübhəsiz ki, özü-özlüyündə bir sıra qərarların qəbulunda öz təsirini göstərir.
Digər bir baxımdan unutmayaq ki, qərb ölkələri Azərbaycana qarşı Ermənistanın təxribat oyunlarına heç də yumşaq münasibət göstərmirlər. Çünki strateji baxımdan Azərbaycanın ticarət dövriyyəsinin 50 faizdən çoxu Qərb dövlətlərinin üzərinə düşür. Qərbin özünün enerji təhlükəsizliyi Azərbaycan enerjisinə bağlıdır. Ayrı- ayrı Qərb dövlətləri ilə strateji müttəfiqliyimiz var. Xüsusilə də bunun 9 dövlətlə olduğunu qeyd etmək istəyirəm. Bizi hər zaman çox ciddi məqamlarda müdafiə edən İtaliya, İngiltərə kimi dövlətlər mövcuddur. Hesab edirəm ki, Azərbaycan Prezidentinin Münhendə olan son görüşü onu göstərdi ki, bu dövlətlərdə məsələyə çox ciddi baxırlar. Azərbaycanla Qərb təsisatları arasında münasibətlərin üstün səviyyədə qalmasında maraqlıdırlar.
Münxen Təhlükəsizlik Konfransında Prezident İlham Əliyevə olan diqqət bir daha onu deməyə əsas verir ki, Azərbaycan dünyanın müxtəlif bölgələrində fəal tərəfdaşlığı təşviq edən, etibarlı tərəfdaş kimi qəbul olunan, dünyada qlobal problemlərin həllində fəal iştirak edən, bu prosesə əməli töhfələr verən ölkə kimi qəbul olunur. Bu barədə dövlət başçımız inaqurasiya mərasimində də bəyan etmişdi. Biz MTK-da bunun real təzahürünü gördük. Azərbaycan bu illər ərzində Qoşulmama Hərəkatının sədri kimi böyük nüfuz qazanıb. COP 29-a ev sahibliyi ilə bağlı dəstək isə bu nüfuzun daha da artdığını göstərdi. Azərbaycan illərdir, çoxtərəfli danışıqlar aparmaq, dünyanın ayrı-ayrı regionlarında hətta bir-birilə əks mövqedə olan tərəfləri bir araya gətirmək bacarığı sərgiləyib. Dünya ictimaiyyəti də Azərbaycanı qlobal təşəbbüskar kimi qəbul edir.
Təsadüfi deyil ki, dünyanın ən mötəbər, strateji baxımdan olduqca əhəmiyyətli tədbirlərinə ev sahibliyi məhz Azərbyacana etibar edilir. Belə ki, dünya birliyi BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının - COP29-un indiyə qədər bir sıra beynəlxalq tədbirlərə ev sahibliyi etmiş, bu sahədə kifayət qədər təcrübə toplamış Bakıda keçirilməsi ilə bağlı qərar qəbul edib. Bu isə o deməkdir ki, dünya birliyinin Azərbaycana olan etimadı tamdır və güvənlidir. Şübhəsiz, rəsmi Bakının həmin tədbirə ev sahibliyinin dünya ölkələri tərəfindən dəstəklənməsi Azərbaycanın effektiv, çoxtərəfli danışıqlar aparmasının, dünyanın ayrı-ayrı regionlarındakı fərqli baxışları bir araya gətirməsinin, qlobal problemlərin həllinə töhfə verməsinin, bir sözlə, güclü potensiala malik olmasının nəticəsidir. Bəli, Cənubi Qafqaz, Xəzər dənizi, Qara dəniz, Mərkəzi Asiya, Yaxın Şərq, postsovet məkanı, Avropa və digər regionlarla geniş əlaqələri olan ölkəmiz bu gün belə inam və etimad sahibidir. Bütün bunlar Azərbaycanın qlobal səviyyədə öz siyasətini həyata keçirməyi bacaran etibarlı tərəfdaş imicini qazanmasından, müstəqil dövlət kimi dünya xəritəsində öz layiqli yerini tutmasından, ölkəmizin xarici siyasətinin artıq qlobal xarakter daşıdığıdan xəbər verir.Ölkəmiz təmsil olunduğu platformalarda bütün tərəfdaşlarla geniş əlaqələr qurub, səmərəli qarşılıqlı əməkdaşlığa nail olub. Bu səbəbdən Azərbaycan qlobal səviyyədə öz siyasətini həyata keçirməyi bacaran etibarlı tərəfdaş kimi dəvət olunur. 60-cı Münxen Təhlükəsizlik Konfransı da bunu bir daha təsdiqləmiş oldu. Etibarlı və səmərəli tərəfdaş kimi bu gün Azərbaycan dünya birliyinin ehtiramla yanaşdığı lider ölkədir!.
Mətləb Salahov
