Noyabrın 8-də Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi parad keçirildi. Bütün dünyanın diqqət və həyəcanla izlədiyi bu hadisənin çağdaş tariximizdə ayrıca yeri var.
Qeyd edək ki, Azərbaycan ordusunun Xankəndidə ilk paradı 1919-cu il iyulun 29-da olub. "Azərbaycan" qəzetində dərc edilən məqalədə paradın 29-30 iyul tarixlərində baş tutduğu bildirilir. "Bu günlərdə Qarabağ özünün ən əziz və sevimli qonaqlarını − Gəncə qubernatoru Rəfibəyovun müşaiyət etdiyi Baş nazir N.Yusifbəylini və Hərbi nazir S.Mehmandarovu qəbul etmək sevincini yaşadı. Qonaqlar iyulun 29-da Xankəndiyə gəldilər, orada qoşunların paradı oldu"-deyə nəşr yazıb. Məlumata görə, paradı Baş nazir Nəsib bəy Yusifbəyli qəbul edib.
104 il əvvəl də Xankəndidə hərbi paradın keçirilməsi çox maraqlı faktdır. Amma o dövrün Azərbaycanı ilə müasir Azərbaycan bir-birindən çox fərqlənir. Cumhuriyyət dönəmində Azərbaycanın müstəqilliyi dünyada heç əməlli-başlı qəbul olunmurdu, amma bu gün müstəqil Azərbaycanın dünyada çox böyük mövqeyi, nüfuzu var. Bu baxımdan, Xankəndidə keçirilən 8 Noybar paradının əhəmiyyətli mesajları kifayət qədərdir.
Noyabrın 8-də Xankəndidə keçirilən paradın əhəmyyəti və dünyaya mesajları nədən ibarət oldu?
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi icmalçı Faiq Ələkbərli baki-xeber.com-a şərhində "Şübhəsiz, noyabrın 8-də Xankəndidə keçirilən hərbi parad möhtəşəm idi. Dövlətçilik tariximiz üçün bu paradın əhəmiyyəti misilsizdir. Bu paradla dünyaya mesaj verildi ki, Azərbaycan əvvəlki Azərbaycan deyil, inkişaf etmiş, güclü bir dövlətdir və heç kəs onun iradəsi qarşısında dura bilməz. Bu həm də dünyadakı antiazərbaycan qüvvələrə mesaj oldu ki, Azərbaycanı sizin hansısa hədələriniz öz məqsədindən çəkindirə bilmədi, biz istəyimizə nail olduq. Ermənistan da, məlum Qərb dövlətləri də bu hərbi paraddan öz paylarını götürmüş oldular"-deyə bildirdi.
104 il əvvəl Azərbaycan Xalq Cumhuriyyətinin Xankəndidə keçirdiyi paradı xatırladan F.Ələkbərli qeyd etdi ki, bu hadisə bizim şanlı tariximizin bir parçasıdır və nəsillərin yaddaşında yaşayır. "8 Noyabr paradı bizim üçün daha böyük uğurların açarı olacaq. Xankəndidən səslənən mesajlar onu göstərir ki, Azərbaycan həm bölgədə, həm də dünyada yeni bir gücə, qüvvəyə çevrilib. Türk Dövlətləri Təşkilatı sırasında Azərbaycan daha güclü olacaq. Müstəqil Azərbaycan 55-60 milyonluq bir xalqın gücüdür, bütövlüyüdür. Əsas mesajlardan biri də budur ki, Azərbaycan Xankəndidə, Qarabağda keçirdiyi bu paradla gələcək hədəflərimizi müəyyənləşdirib"-deyə F.Ələkbərli əlavə etdi.
İradə SARIYEVA
