ABŞ prezidenti Donald Tramp, Rusiyanın ABŞ-ın Demokratlar Partiyasının serverlərinə müdaxilə etmədiyini bəyan edərsə, Vikileaks portalının yaradıcısı Julian Assanjın əfv ediləcəyini deyib.
Baki-xeber.com-un xəbərinə görə, bu barədə fevralın 19-da Britaniya KİV-i Assanjın vəkili Cennifer Robinson məhkəmədə çıxışına istinadən məlumat verib.
Xatırladaq ki, 2016-cı ildə hakerlər ABŞ Demokratlar Partiyasının Milli Komitəsinin serverini qırmışdı. Tezliklə Vikileaks portalı komitə rəsmiləri tərəfindən yazılmış və alınmış təxminən 20 min e-poçtu dərc etdi. Amerika Birləşmiş Ştatlarının xüsusi xidmət orqanları kiberhücumların Rusiya hakerləri tərəfindən həyata keçirildiyini bildirdi. Robinsonun sözlərinə görə, bu təklif ifşaçıya 2017-ci ilin avqustunda o zaman ABŞ Konqresinin Nümayəndələr Palatasının üzvü, respublikaçı Dana pPrabaher tərəfindən təqdim olunub. Amerikan siyasətçi Assanja deyib ki, “ABŞ prezidentinin iradəsi ilə hərəkət edir” və ifşaçıya, təklifi yerinə yetirərsə əfv olunacağını vəd edib.
“Deutsche Welle” nəşrinin xəbərinə görə isə, eks-konqresmen vasitəçi rolu oynaması barədə deyilənləri təkzib edib. Porabaher məsələ ilə bağlı açıqlamasında bildirib ki, nə Ağ Ev rəhbəri, nə də onunla əlaqəli şəxslərdən ifşaçı ilə bağlı hər hansı təlimat almayıb. “Mən heç vaxt prezident Trampla Julian Assanj barəsində danışmamışam” o deyib. Lakin bildirib ki, şəxsi təşəbbüsü ilə Assanja, məktubları ona kimin verdiyini deyərsə, Trampdan əfvini xahiş edə biləcəyini deyib.
Öz növbəsində, Ağ Evdən də Tramp barəsində deyilənləri “təxəyyül məhsulu və ağ yalan” adlandırıblar. CNBC telekanalına açıqlamasında Ağ Evin mətbuat katibi Stefani Qrişem Trampın Porabaheri tanımadığını və bu mövzuda aralarında hər hansı dialoqun olmadığını bildirib.
Xatırladaq ki, Julian Assanj 2012-ci ildə İsveç məhkəməsinin barəsində cinsi təcavüz maddəsilə həbs hökmü çıxarmasının ardından Londondakı Ekvador səfirliyinə sığınıb. WikiLeaks yaradığısı İsveç hökumətinin onu ABŞ-a ekstradisiya etməsindən ehtiyat edirdi, çünki ABŞ-ın İraq və Əfqanıstanda keçirdiyi əməliyyatlarla bağlı yüz minlərlə məxfi hərbi sənədi açıqlayıb. Lakin çox keçmədən İsveç ədliyyəsi Assanj məsələsilə bağlı cinayət təqibinə xitam verib. 2019-cu ildə isə Britaniya polisi 2012-ci ildə verilən həbs orderini təqdim edərək onu Ekvador səfirliyində gözaltına alıb, çünki bu arada Cənubi Amerika dövləti beynəlxalq konvensiyaların tələblərini pozduğunu əsas gətirərək onu sığınacaq alma hüququndan məhrum edib. Ardınca London məhkəməsi Assanj barəsində 50 həftəlik həbs qərarı çıxarıb.
