İlqar Orucov: “Təhsil kreditinin faizsiz verilməsi o deməkdir ki, dövlət öz gələcəyinə investisiya yatırır”
Xəbər verildiyi kimi, “Maarifçi” Tələbə Kredit Fondunun aztəminatlı ailələrdən olan tələbələrə verdiyi təhsil haqqı üzrə kreditlər faizsiz olub. Fondun yaydığı məlumata əsasən, kredit almaq istəyənlər üçün müraciətlərin qəbuluna başlanıb. Krediti almaq istəyənlər oktyabrın 13-dək müraciət edə bilər.
Bu, sayca 4-cü elan sessiyası olacaq. Budəfəki elan sessiyasında təqdim olunacaq təhsil kreditləri 2017-2018-ci tədris ili üzrə təhsil alan, aztəminatlı ailələrdən olan tələbələrin təhsil haqqı borcu üçün nəzərdə tutulub.
Kreditin alınması şərtləri və tələbələrin seçim meyarları bu elan sessiyasında da dəyişməz olaraq qalıb. Təşəbbüsün ən üstün cəhəti isə faizsiz kreditin köhnə təhsil krediti müqavilələrinə də şamil olunmasındadır.
“Maarifçi” Tələbə Kredit Fondu fəaliyyətə başladığı vaxtdan indiyədək 3 elan sessiyası keçirib. Bu müddət ərzində fonda daxil olan 212 elektron müraciət əsasında universitetlər tərəfindən təqdim edilən yerlərin sayına əsasən seçim meyarlarına uyğun gələn 118 tələbə ilə ümumilikdə 135 təhsil krediti müqaviləsi imzalanıb.
Tələbələr üçün təhsil kreditinin faizsiz olması ekspertlər tərəfindən müsbət qarşılanır.
Məsələ ilə bağlı fikir bildirən Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov “Bakı-Xəbər”ə açıqlamasında qeyd etdi ki, tələbələrə faizsiz təhsil kreditinin verilməsi sevindiricidir: “Ölkə vətəndaşlarının təhsil alması ilə bağlı dövlət tərəfindən nə qədər çox sosial layihə həyata keçirilsə, yenə də azdır. Nəzərə almaq lazımdır ki, Azərbaycan islam ölkəsidir. Buna baxmayaraq, Azərbaycan digər islam ölkələrindən xeyli fərqlənir. Ölkə əhalisinin mədəni, etnik, iqtisadi və sosial inkişafı baxımından təhsilin rolu böyükdür. Bu səbəbdən də növbəti mərhələlərdə də tələbələrə faizsiz kreditin verilişi davam etdirilməlidir. Azərbaycan əhalisi təhsilli olarsa, bu, ölkənin uğurlu inkişafı deməkdir. Bu istiqamətdə həyata keçirilən istənilən sosial layihə inkişafa aparan yollardan biridir”.
Həmsöhbətimizin sözlərinə görə, tələbələrə faizsiz kreditin verilməsi olduqca vacibdir: “Təhsil kreditinin faizsiz verilməsi o deməkdir ki, dövlət öz gələcəyinə investisiya yatırır. Ali məktəbi bitirən gənc gələcəkdə hardasa çalışsa, təhsil kreditini faizsiz qaytaracaq. Kreditin faizsiz qaytarılması həmin gəncin büdcəsinə müsbət təsir edəcək”.
İ.Orucov hesab edir ki, təhsil kreditinin faizsiz olması Azərbaycan dövlətinin xeyrinə olan addımlardan biridir. Nəzərə almaq lazımdır ki, bu dövlət gənclərindir. Gənclərə qayğı nə qədər çox olarsa, onlar öz dövlətlərini bir o qədər çox sevəcəklər.
Günel CƏLİLOVA
