15 sentyabr - Bilik günü Nəsimi rayonunun bütün orta təhsil müəssisələrində böyük təntənə ilə qeyd olunub.
Nəsimi rayon İcra Hakimiyyətindən “Bakı Xəbər”ə verilən məlumata görə, rayondakı İ.Əfəndiyev adına Elitar Gimnaziyada yeni dərs ilinin başlanmasına həsr olunmuş tədbir Azərbaycan Dövlət himninin ifası ilə başlanıb. Tədbiri açıq elan edən Gimnaziyanın direktoru, əməkdar müəllim Sevda Quliyeva məktəbin tarixi barədə məlumat verərək qeyd edib ki, Prezident İlham Əliyevin tapşırığına əsasən 2009-cu ildə Gimnaziya əsaslı təmir edilib və burada müasir təhsil üçün hər cür şərait yaradılıb. Onun sözlərinə görə, 2016-2017-cı tədris ilində Gimnaziyanı 63 şagird bitirib ki, bunlardan 25 məzun 500-dən, 14 nəfər isə 600-dən yuxarı bal toplayıb. Sevda Quliyeva deyib ki, 2017-2018-ci tədris ilində məktəbin 1-ci siniflərində 260 şagird təhsil alacaq.
Nəsimi rayonundakı 1 saylı tam orta məktəbdə də “Bilik günü”nə həsr edilmiş tədbir keçirilib. Tədbirdə çıxış edən məktəbin direktoru, Qabaqcil təhsil işçisi Elida Rzayeva məktəb haqqında məlumat verdikdən sonra təhsil ocağının əsaslı təmir ediməsinə görə ölkə rəhbərliyinə təşəkkür edib.
Tədbirlərdə iştirak edən Nəsimi rayon İcra Hakimiyyətinin başçısı Asif Əsgərov məktəblərin kollektivlərini, şagirdləri və onların valideynlərini yeni dərs ilinin başlanması münasibətilə təbrik edərək, onlara təhsildə uğurlar arzulayıb
Asif Əsgərov xatırladıb ki, sentyabrın 11-də Prezident İlham Əliyev xüsusi qayğıya ehtiyacı olan uşaqların təhsil aldığı 268 nömrəli xüsusi məktəbdə əsaslı təmirdən sonra yaradılan şəraitlə tanış olub. O qeyd edib ki, 1927-ci ildən fəaliyyət göstərən məktəbdə əsaslı təmir işləri Prezident İlham Əliyevin 2014-cü ildə imzaladığı Sərəncamla təsdiq edilmiş Dövlət Proqramının tədbirlər planının icrası ilə əlaqədar aparılıb.
Daha sonra sentyabrın 11-də Azərbaycan Respublikasının Birinci vitse-prezidenti Mehriban Əliyevanın Nəsimi rayonunda yerləşən “Qərənfil” körpələr evi-uşaq bağçasında əsaslı təmirdən sonra yaradılan şəraitlə tanış olmasına diqqət çəkən icra başçısı görülən işlərlə bağlı məlumat verib.
Asif Əsgərov rayon məktəblilərinin keçən tədris ilində qazandığı uğurlardan da danışaraq bildirib ki, 2016-2017-ci tədris ilində rayonun orta məktəblərini 1685 nəfər şagird bitirib, onlardan 1206 nəfəri tələbə adını qazanıb. Qəbul imtahanlarında abituriyentlərdən 327 nəfəri 500-dən, 82 nəfəri 600-dən, 24 nəfəri isə 650-dən çox bal toplayıb. Məzunlardan 234 nəfəri xarici ölkələrin müxtəlif ali məktəblərinə qəbul olunub. 111 saylı tam orta məktəbin məzunu Hüseynova İlhamə Ramil qızı 700 bal toplayaraq Bakı Dövlət Universitetinə qəbul olunub. 2016-2017-ci təhsil ilinin yekununa görə Nəsimi rayonu üzrə 2 məzun qızıl medala, 2 nəfər tələbə adını qazanmış məzun isə Prezident təqaüdünə layiq görülüb.
