Məhərrəm Zülfüqarlı: "Hələ ki, sadalanan problemlər üzündən islamyönümlü ali məktəblərə maraq aşağıdır"
Ali məktəblərə və AMEA-nın magistraturalarına qəbulun nəticələri haqqında statistik məlumat açıqlanıb. Açıqlamadan məlum olub ki, ən zəif nəticə Bakı İslam Universitetinə aiddir. Belə ki, Dövlət İmtahan Mərkəzindən (DİM) verilən məlumata görə, 2017/2018-ci tədris ilində magistraturaya qəbul imtahanında iştirak etmək üçün ümumilikdə 13081 (ötən il 24110) bakalavr qeydiyyatdan keçib. Bu il daha hazırlıqlı və aydın məqsədi olan namizədlərin ərizə qəbulunda iştirakı gözlənilirdi və müsabiqənin nəticələri də gözləntilərin doğrulduğunu bir daha sübut edir.
Bu il ali təhsil müəssisələrinin magistratura səviyyəsinə 7703 plan yeri ayrılıb və müsabiqənin nəticələrinə əsasən, 6361 bakalavr (Azərbaycan bölməsi üzrə 5826, rus bölməsi üzrə 535) magistratura səviyyəsinə qəbul olunub. Onlardan 2358 nəfəri dövlət sifarişi əsasında təhsil almaq hüququ əldə edib. Ali təhsil müəssisələrinə qəbul planı 82.58 % dolub. 1342 plan yeri (17.42 %) boş qalıb. Xatırladaq ki, 2016/2017-ci tədris ilində plan yerlərinin dolma faizi 63.39 % olub. Bu il bu göstərici daha da yaxşılaşıb və plan yerlərinin dolma faizi ötən illə müqayisədə ərizə verənlərin sayının az olmasına baxmayaraq, təqribən 19 % artıb.
Magistraturaya qəbulda plan yerlərinin dolma göstəricisi üzrə ən zəif nəticə Bakı İslam Universitetinə (8.33 %) aiddir.
Maraqlıdır, bunun kökündə nə dayanır? İslam Universitetinin magistratura pilləsində oxumaq istəyənlərin sayı niyə aşağıdır?
Məsələyə münasibət bildirən təhsil sahəsi üzrə ekspert Məhərrəm Zülfüqarlının fikrincə, bunun müxtəlif səbəbləri ola bilər: "Azərbaycan 1991-ci ildə dövlət müstəqilliyini bərpa edəndən sonra dinə axın güclü idi. Bir növ, dinə qayıdış başlamışdı. Ancaq sonrakı dövrdə vəziyyət dəyişməyə başladı. Bəzi radikal qruplaşmalar, təriqətlər, Suriyada baş verən hadisələr müəyyən ailələri bu məsələdə bir qədər çəkindirdi. Digər tərəfdən, Bakı İslam Universiteti dövlət ali məktəbi olmadığına görə Azərbaycanda gənclər əsasən dövlət universitetlərinə üstünlük verirlər. Yəni özəl ali məktəb olduğuna görə İslam Universitetinə az meyl var. İnşallah, gələcəkdə sadalanan problemlər aradan qalxarsa, dini maarifçilik işi güclənərsə, yəqin ki, bu problem də qalmaz. Hələ ki, sadalanan problemlər üzündən islamyönümlü ali məktəblərə maraq aşağıdır". Vidadi ORDAHALLI
