Cavanşir Əliyev: “Uşaq müəssisələrində xidmət keyfiyyətinə nəzarətin artması təqdir olunmalıdır”
Dövlət və qeyri-dövlət uşaq müəssisələrində göstərilən xidmətlərin keyfiyyətinə dair tələblər təsdiqlənib. Bu barədə Baş nazir Əli Əsədov qərar imzalayıb. Qərar həmin müəssisələrdə göstərilən xidmətlərin keyfiyyətinə dair tələbləri müəyyən edir.
Qeyd edək ki, qərarda xidmətlərin təşkili istiqaməti üzrə müəssisələrdə uşaqların əqli, fiziki və psixoloji inkişafının təmin edilməsi üçün uyğun şəraitin yaradılması, müəssisələrdə çalışan işçilərin icbari tibbi müayinədən keçirilməsi, uşaqlara dair fərdi məlumatların toplanılması, işlənilməsi, mühafizəsi və digər zəruri tələblər öz əksini tapır.
Eyni zamanda uşaq müəssisələrində yaşayış şəraiti, (təhlükəsizliyin təşkili, yanğından mühafizə, sanitariya-gigiyena və əksepidemik rejimin norma və qaydalarına riayət edilməsi) habelə qidalanmanın qida təhlükəsizliyi sahəsində texniki normativ hüquqi aktlara uyğun təşkilinə dair tələblər müəyyən edilir.
Bundan əlavə, tələblər uşaq müəssisələrində sağlamlığın mühafizəsi istiqamətində uşaqların tibb müəssisəsində uçota götürülməsinin təmin olunması, immunizasiyaya cəlb edilməsi, lazımi profilaktik tədbirlərin görülməsi, müəssisələrdə lazımi dərman və tibb vasitələri ilə təchiz olunmuş tibb otaqlarının təşkil edilməsi, uşaqlarla fərdi-psixoloji işin aparılması məsələlərini də əhatə edir.
Həmçinin tələblərdə uşaqların təlim-tərbiyəsi və asudə vaxtlarının səmərəli təşkili üzrə öyrədici mühitin, eləcə də sağlamlıq imkanları məhdud olan uşaqların təhsil hüququnun həyata keçirilməsi üçün şəraitin yaradılması, uşaqların mədəni-maarifləndirici tədbirlərə və idman fəaliyyətinə cəlb olunması məsələləri də əks olunur.
Maraqlıdır, tələblər arasında yeni nəsə varmı? Yoxsa qeyd edilənlərin hamısı əvvəl necə idisə indi də eynidir?
“İndiki təcrübələr və mövcud sistem beynəlxalq təcrübə ilə müqayisədə bəzi əhəmiyyətli çatışmazlıqlara malikdir”
Təhsil eksperti Cavanşir Əliyev “Bakı-Xəbər”ə şərhində bildirdi ki, uşaq müəssisələrində xidmət keyfiyyətinə nəzarətin artması təqdir olunmalıdır: “Uşaq müəssisələrində xidmət dedikdə bir sıra amillər nəzərə alınır. Qeyd edim ki, dövlət və ya qeyri-dövlət uşaq müəssisələri ilə bağlı bir sıra tələblər var. Bu günlərdə baş nazir tərəfindən uşaq müəssisələrində xidmətə dair yeni tələblər müəyyənləşib. Bu qərar yeni qərardır və uşaq müəssisələrində keyfiyyətə dair bütün xidmətlər nəzərə alınıb. Nəzərə almaq lazımdır ki, uşaq müəssisələri yalnız ailələrin deyil, həm də cəmiyyətin gələcəyinə bir sərmayədir. Bu sahəyə diqqət yetirmək Azərbaycanın gələcək inkişafı üçün əsas şərtlərdən biridir. Məktəbəqədər təhsildə yeni keyfiyyət standartlarının tətbiqi artıq qaçılmazdır. İndiki təcrübələr və mövcud sistem beynəlxalq təcrübə ilə müqayisədə bəzi əhəmiyyətli çatışmazlıqlara malikdir”.
Günel CƏLİLOVA
