Son zamanlar müxtəlif məqsədlər üçün xarici ölkələrə üz tutan azərbaycanlıların sayında artım müşahidə olunur. Bu sıraya daxil olanlar əsasən təhsil səviyyəsini artırmaq istəyənlər, fərqli yaşam tərzi axtaranlar və ya işlə təmin olunmaq arzusunda olanlardır…
Bu gün xaricə müalicə almaq üçün gedən xəstələrlə yanaşı, işləmək üçün müraciət edən həkimlərin də sayı az deyil. Məsələn, Almaniyada işləmək üçün müraciət edənlərin siyahısında azərbaycanlı həkimlərin də az olmadığı aşkara çıxıb.
Almaniya Tibb Assosiasiyasının məlumatına görə, 2022-ci ildə 1359 həkim işləmək üçün bu ölkəyə üz tutub. 2019-cu ildə bu rəqəm 877, 2021-ci ildə isə 1028 nəfər təşkil edib.
Almaniyada yaşayan “Helios Klinikum Siegburg”da həkim olaraq işləyən Elvin Hüseynov da bununla bağlı sosial şəbəkə hesabından paylaşım edib.
Bildirib ki, çalışdığı klinikanın rəhbərliyinə iş üçün Azərbaycandan çoxlu sayda həkim müraciət edir: “Yaxın on-on beş il ərzində Azərbaycanda tibb sektorunda faciəvi şəkildə kadr çatışmazlığı olacaq. Əsasən də regionlarda. Dövlətimiz və xalqımız son illərdəki beyin axınının fəsadını ödəyəcək”.
Həkimlərin xarici ölkələrə üz tutmasının səbəblərinə gəlincə, mütəxəssislər bunu daha çox maaşların azlığı ilə əlaqələndirirlər.
Onu da qeyd edək ki, Azərbaycandan xaricə həkim axını ölkəmizdə bir sıra sahələrdə ixtisaslı həkim qıtlığı yaradıb. Bu özünü daha çox regionlarda göstərir.
Adil Qeybulla: "Xarici ölkədə işləmək və yaşamaq məqsədilə qalanlar üçün Azərbaycanda lazımi şərait yaratmalıyıq ki, onlar ölkəmizə qayıtsın"
Professor, tibb üzrə ekspert Adil Qeybulla "Bakı-Xəbər" ə açıqlamasında bildirib ki, tibb təhsilinin ən yüksək mərhələsi rezidentura hesab edilir. Rezidentura sistemi yalnız icbari tibbi sığortanın kifayət qədər təşəkkül tapdığı ölkələrdə, xəstə bazasının çox olduğu yerlərdə effektiv olur.
Onun sözlərinə görə, tələbələr daha çox xəstə görməlidir ki, işləri də effektiv olsun: "Hazırda ölkədə səhiyyə sektorunda müxtəlif islahatlar aparılır. Amma təəssüflər olsun ki, bu sahədə problemlər də var. Bizdə tibb təhsilini bitirənlər məcburdur ki, rezidentrura təhsili üçün başqa ölkələrə getsinlər. Bu ölkələr də əsasən Türkiyə və Almaniyadır. Həkimlərimizin bu ölkələrə daha çox üz tutmasının bəlli səbəbləri də var. Azərbaycanda həkimlərə diqqət və qayğı çox aşağı səviyyədədir. Xarici həkimlərin maaşları 5 qat artıq verildiyi halda, Azərbaycanda koronavirusdan ölən həkimlərin ailələrinə heç kompensasiya da ödənilmir.
Onu da deyim ki, Almaniyada müəyyən qədər həkim çatışmazlığı var, Türkiyə ilə dilimiz eyni, oxşarlıqlarımız çox olduğundan həkimlərimiz daha çox bu ölkələrə axın edir. Lakin Fransa, İngiltərə kimi ölkələrə də axın var"
A.Qeybullanın sözlərinə görə, xarici ölkədə işləmək və yaşamaq məqsədilə qalanlar üçün Azərbaycanda lazımi şərait yaratmalıyıq ki, onlar ölkəmizə qayıtsın.
Müşfiq Məmmədli: "Həmin həkimlərin tibb sahəsində bilik-bacarıqlara yiyələndikdən sonra onu ölkəmizdə tətbiq etməsinə şərait yaradılmalıdır"
Milli Məclisin Səhiyyə Komitəsinin üzvü, deputat Müşfiq Məmmədli "Bakı-Xəbər"ə açıqlamasında qeyd etdi ki, gənc həkimlərin regionlarda işə cəlb olunmasına daha çox ehtiyac var: "Azərbaycandan Almaniyaya gənc həkimlərin axınını biz də müşahidə edirik. Gənc həkimlərin Almaniyanın səhiyyəsində yeni bilik-bacarıqlar əldə etməsi, sosial baxımdan bu ölkəyə üstünlük verməsi təbii haldır. Hər bir mütəxəssis irəli can atır. Əsas odur ki, həmin həkimlərin tibb sahəsində bilik-bacarıqlara yiyələndikdən sonra onu ölkəmizdə tətbiq etməsinə şərait yaradılsın. İnanıram ki, zamanla əks istiqamətdə axını müşahidə edəcəyik".
Pərvanə Mustafayeva: "Almaniyanın istənilən bölgəsinə, rayonuna getsəniz, Azərbaycandan gedən həkimlərlə rastlaşmaq mümkündür"
Həkim ekspert Pərvanə Mustafayeva "Bakı-Xəbər" ə açıqlamasında bildirdi ki, həkimlərin axınının isə çox elementar səbəbi var. Burada kllinikada işləyib 300 - 400 manat maaş ala bilmək üçün gərək 30-40 min manat pul verəsən ki, səni işə götürsünlər. Xaricdə isə tam fərqlidir. Həkimlər ya əvvəlcə Türkiyəyə gedib uzmanlıq alırlar, ya da birbaşa Almaniyaya gedib orada işləyirlər. Maaşları təxmini olaraq, 5000 - 8000 avro aralığındadır. Həyat şəraitləri isə bundan da yaxşıdır: "İstənilən halda onların hamısına vətəndaşlıq verilir. Almaniyanın isə tibbə ehtiyacı var. Çünki Avropada təhsil alan gənclər tibbi oxumaq istəmirlər. Düşünürlər ki, bu daha əziyyətlidir. Əvvəllər bu boşluğu Türkiyə, indi isə Azərbaycan həkimləri doldurur. Hər il ən azı 150-200 nəfər həkimimiz oraya gedir. Almaniyanın istənilən bölgəsinə, rayonuna getsəniz, Azərbaycandan gedən həkimlərlə rastlaşarsınız.
Türkiyədə isə bu bir az daha çətindir. Çünki orada tibb Amerika sistemidir. Uzmanlıq almaq üçün əlavə imtahanlar verirlər, diplomun təsdiqini edirlər və daha sonra 5 il uzmanlıq oxuyurlar".
Günel CƏLİLOVA
