Azərbaycanın əksər ucqar bölgələrində vəkil çatışmır. Bu məsələ Milli Məclisin ötən iclasında müzakirə olunub. Millət vəkilləri bölgələrdə vəkil çatışmazlığı olmasının səbəbi kimi “Vəkillik haqqında” qanundakı maddəni göstərib. Belə ki, testdən keçə bilməyən vəkillər üçün 3 il məhdudiyyətin olması bu sahədə çatışmazlığa səbəb olur.
Qeyd edilib ki, bu müddəa ləğv olunmalı və vəkilliyə qəbul asanlaşdırılmalıdır ki, insanlar öz hüquqlarını müdafiə edə bilsinlər: “Bununla ucqar bölgələrdə olan defisit aradan qalxar. Türkiyədə və digər başqa ölkələrdə belə müddəa yoxdur”.
Maraqlıdır, bölgələrdə vəkil çatışmazlığı doğrudan da qəbul prosesi ile bağlıdır, yoxsa başqa səbəblər var?
Əziz Qənbərov: "Bəzi bölgələrdə qara yollarla hüquqi işin həll olunması vəkilliyə olan inamı, etibarı azaldır"
Vəkil Əziz Qənbərov "Bakı-Xəbər"ə açıqlamasında qeyd etdi ki, bölgələrdə vəkil sayının az olmasının səbəbi nə imtahan prosesi ilə bağlıdır, nə də onlara yaradılan şəraitlə: "Məlumat üçün deyim ki, vəkillik fəaliyyəti bir növ sahibkarlıq fəaliyyəti sayılır. Bu səbəbdən də vəkilin özü gəlir əldə edir. Əldə edilən gəlirdən də vergi ödəyir. Regionlarda vəkillər onlarla imzalanan müqavilə əsasında fəaliyyət göstərir. Məlumat üçün onu da deyim ki, bölgələrdə vəkil sayının az olması ilə yanaşı, hüquqşünas çatışmazlığı da yaşanır. Son zamanlar məhkəmə hüquq sistemində müəyyən dəyişikliklər qeydə alınır. Ancaq regionların hüquq sistemi bərbad vəziyyətdədir. Belə ki, bəzi bölgələrdə qara yollarla hüquqi işin həll olunması vəkilliyə olan inamı, etibarı azaldır. Əminəm ki, məhkəmə-hüquq sistemində aparılan islahatlar və İnam Kərimovun Məhkəmə-Hüquq Şurasının sədri seçilməsi bu sahədəki vəziyyəti dəyişəcək".
Əliməmməd Nuriyev: "Bölgələrdə müşahidə olunan vəkil azlığının qarşısını almaq üçün Vəkillər Kollegiyası müəyyən addımlar atıb və proses davam etməkdədir"
Konstitusiya Araşdırmalar Mərkəzinin prezidenti Əliməmməd Nuriyev də bildirdi ki, regionlarda vəkil qıtlığı var: “Burada məsələ ölkədə vəkillərin sayının az olması yox, vəkil olmaq istəyən şəxslərin rayonlarda işləmək istəməməsidir. Çünki gənclərin əksəriyyəti gəlib Bakıda ali təhsil alır və sonradan paytaxtda qalırlar. Bu isə rayonda yaşayan vətəndaşların hüquqi yardıma əlçatanlığını azaldır. Həmçinin rayonlarda maddi durum aşağıdır. Vəkilə müraciət edənlər pul ödəmirlər, vəkil də bu səbəbdən Bakıya gəlir. Elə bölgələr var ki, il ərzində cəmi 1 cinayət işi ya olur, ya olmur. Buna görə vəkil gedib orada daimi işləyə bilmir. Yaxud da bölgələrdəki insanlar imkan azlığından peşəkar vəkilə müraciət edə bilmirlər. Elə regionlar var ki, orda bir nəfər vəkil olur və ya ümumiyyətlə vəkil yoxdur. Amma son illər vəkilliyin inkişafı səbəbindən bu peşəyə maraq xeyli artıb. Gənc hüquqşünaslar vəkil olmaq istəyirlər. Vəkillər Kollegiyası Dövlət İmtahan Mərkəzi ilə birgə müntəzəm olaraq vəkilliyə qəbul imtahanları keçirir. Təkcə Bakıda deyil, regionlarda fəaliyyət göstərən hüquqşünaslar da vəkil olmaq arzusundadırlar. Hesab edirəm ki, bu imtahanların sayəsində regionlarda vəkil qıtlığı problemi zamanla aradan qalxacaq. Həyata keçirilən islahatların nəticəsi özünü büruzə verəndə vəkillər tədricən regionlarda da işləmək istəyəcəklər"
Ə.Nuriyev onu da əlavə etdi ki, bölgələrdə müşahidə olunan vəkil azlığının qarşısını almaq üçün Vəkillər Kollegiyası müəyyən addımlar atıb və proses davam etməkdədir. Növbəti illərdə də vəkillərin sayının artırılması, həm peşəkarlıq, həm xidmət səviyyəsinin artırılması, həm də digər neqativ halların qarşısının alınması, məsuliyyət yükünün artırılması istiqamətində kompleks tədbirlər həyata keçiriləcək: "Son illər ölkəmizdə aparılan mütərəqqi məhkəmə-hüquq islahatları uğurla və davamlı qaydada həyata keçirilir. Vəkillər Kollegiyası bu islahatlar nəticəsində mobil, çevik və ölkə vətəndaşlarına keyfiyyətli hüquqi yardım göstərən peşəkar qurum kimi fəaliyyətini davam etdirir".
Günel CƏLİLOVA
