Paytaxtın ən bahalı məkanlarından biri Dənizkənarı Bulvardır ki, burada fəaliyyət göstərən restoran və kafelərin, çay evlərinin, eləcə də əyləncə obyektlərinin, uşaq oyun qurğularının qiymətləri sözün əsl mənasında əl yandırır. Sadə dildə desək, hər adam ora yaxın düşə bilmir, yəni restoranda, kafedə oturmağa maddi gücü çatmır...
Bu günlərdə Dənizkənarı Bulvar İdarəsinin dörd ildə ilk dəfə xalis mənfəət əldə etdiyi barədə xəbərə rast gəldik və təqdim edilən statistikaya diqqət yetirdik.
Qeyd olunur ki, Dənizkənarı Bulvar İdarəsi 2022-ci ildə xalis mənfəət əldə edib, bu da 2019-cu ildən bu tərəfə təqdim etdiyi hesabatlarda ilk hadisədir. Yazılanlara görə, idarə ötən il 19 mln. 398 min manat əsas əməliyyat gəlirlər əldə etməklə 2021-ci ili 41 faiz üstələyib.
Dövlət qurumunun işçilərə çəkdiyi xərcin həcmi cüzi artaraq 11 mln. 324 min manat, amortizasiya xərcləri 2 mln. 138 min manat (2021: 5 mln. 451 min manat), inzibati və s. xərcləri 5 mln. 837 min manat ( 2 mln. 645 min manat) olub. Bununla da cəmi xərcləri 2022-ci ildə 19 mln. 300 min manata çatıb. 2021-ci ildə idarənin cəmi xərcləri 19 345 min manat idi.
Beləliklə, 2022-ci ildə 102 min manata yaxın xalis mənfəət əldə edib. 2021-ci ildə İdarə 5 mln. 514 min manat həcmində zərər etmişdi.
2019 və 2020-ci illərdə isə Dənizkənarı Bulvar İdarəsi müvafiq olaraq 8 mln. 874 min manat və 7 mln. 447 min manat zərər etmişdi.
1 yanvar 2023-cü il tarixində balansında yığılmış zərər 28 mln. 633 min manat təşkil edib.
Bu qədər bahalı məkan ötən illərdə niyə ziyanla işləyib ki?
"Bu da ondan irəli gəlir ki, bu qurumlar kifayət qədər... "
Liberal İqtisadçılar Mərkəzinin sədri Akif Nəsirli “Bakı-Xəbər”ə şərhində "Ümumiyyətlə, ziyanla işləmək iqtisadi fəaliyyətlə məşğul olan bütün dövlət qurumları üçün xarakterik haldır. Bu da ondan irəli gəlir ki, bu qurumlar kifayət qədər korrupsiyaya bulaşmış qurumlardır. Burada dövlət büdcəsi xərclərinin korrupsiya yolu ilə mənimsənilməsi ilə məşğuldurlar. Bu yalnız Dənizkənarı Bulvar İdarəsinə xarakterik deyil, bu, "Azərsu" ASC və başqa qurumların fəaliyyətində də özünü göstərir. Məsələn, "Azərsu" hazırda suyu az qala vətəndaşlara və qeyri-vətəndaş abunəçilərinə Avropa qiymətlərinə satır. Amma kifayət qədər böyük zərərlə işləyir. "Azəriqaz" da həmçinin. "Bakubus" MMC hər il 40-50 milyon manat zərərlə işləyir. Onunla eyni fəaliyyətlə məşğul olan digər daşıma şirkətləri mənfəətlə işləyir, amma niyə "Bakubus" ziyanla işləyir?" deyə bildirdi.
A.Nəsirli qeyd etdi ki, ölkənin ən böyük şirkəti olan SOKAR belə ziyanla işləyir. Müsahibimizin sözlərinə görə, bunlar hamısı onu göstərir ki, bu qurumlarda çalışan rəhbərlər, məmurlar korrupsiya ilə məşğuldur. "Korrupsiyaya yolu ilə dövlət büdcəsindən oğurluqla məşğuldurlar. Konkret olaraq Dənizkənarı Bulvar idarəsinə gəlincə, 2022-ci ildə idarə əgər mənfəətlə işləyibsə, demək bütün dövrlərdə o idarə mənfəətlə işləyə bilər. Sadəcə olaraq 2022-ci ildə hansısa təsirlər hiss edib, yuxarı rəhbər orqanlardan bu quruma siqnal gəlib ki, sənin işindən narazılıq var. Ona görə də idarə götürüb 2022-ci ildə korrupsiyanı azaldıb və belə bir performans göstərib ki, bu yaxşı işləyir, artıq irəliləyiş var və sair. Demək istədiyim odur ki, digər dövlət şirkətləri, dövlət qurumları kimi, Bulvar idarəsi də korrupsiya yolu ilə dövlət büdcəsindən oğurluqla məşğuldur. Bu problemin aradan qaldırılmasının ən yaxşı yolu bu müəssisələrin özəlləşdirilməsidir. Tutaq ki, Bulvar idarəsini özəlləşdirmək olar. Amma müəyyən şərtlər daxilində, müqavilə əsasında Bulvar idarəsini özəlləşdirmək, yaxud təsərrüfat hesabıma keçirmək lazımdır"-deyə A. Nəsirli əlavə etdi.
O qeyd etdi ki, Dənizkənarı Bulvarın, Milli Parkın mənəvi dəyəri də var, bu baxımdan onu şərtlər daxilində sahibkara idarə etməyə vermək olar. O vurğuladı ki, şərtlər daxilində onun idarə edilməsi sahibkara tapşırıqlarsa, bu daha effektiv olar:"Təcrübə var ki, Bakı Bulvarı özü-özünü maliyyələşdirə bilir. Öz-özünü maliyyələşdirməyə qadir olan bir idarə əgər zərərlə işləyibsə, demək orada onlar korrupsiya ilə məşğul olublar".
Əli TURABOV
