"Abituriyent" jurnalının 12-ci nömrəsində yer alan məlumata görə, 9-cu və 11-ci sinif şagirdləri arasında nəinki tədris proqramını minimum mənimsəməyənlər, hətta oxuyub-yazmaqda çətinlik çəkənlər var.
Qeyd edilir ki, 9 və 11-ci sinif şagirdləri arasında oxuyub-yazmağı bacarmayanlar da var. 2022-ci ilin nəticələrinə əsasən, 9-cu sinif şagirdləri arasında 21 nəfər, 11-ci sinif şagirdləri arasında 2 nəfər oxuyub-yazmağı bacarmayıb.
Rayonlar üzrə oxumağı və yazmağı bacarmayan 9-cu sinif şagirdlərinin sayı belədir: Masallı rayonunda 4 nəfər, Goranboy, Gədəbəy və Quba rayonlarının hərəsində 2 nəfər, Abşeron, Astara, Cəlilabad, Kəlbəcər, Lənkəran, Lerik, Saatlı, Xocalı, Yardımlı rayonlarının, Bakı, Mingəçevir şəhərlərinin hərəsində 1 nəfər. 11-ci sinif şagirdlərindən oxumağı və yazmağı bacarmayanlar isə Ağdam və Qobustan rayonlarından olub.
XXI əsrdə yazıb-oxumağı bacarmayan şagirdlərin olması bir sıra suallar doğurur. 11 il məktəbə get, ancaq oxuma və yazma bilmə.
“Şagirdlər əlavə biliklərlə yüklənməməli və onlara daha çox lazım olan biliklər verilməlidir ki, qarşıdakı dövr ərzində keçirilən imtahanlarda şagirdlər çətinlik çəkməsin”
Təhsil eksperti Elçin Əfəndi bildirdi ki, orta təhsil müəssisələrində şagirdlər öz biliklərinə uyğun qiymətləndirilmir: "Təhsil müəssisələrində konkret olaraq mövcud kurikulum təhsil sistemində dərslər keçirilməsinə baxmayaraq, şagirdlər hələ də müvafiq olaraq Dövlət İmtahan Mərkəzinin keçirdiyi qəbul proqramına uyğunlaşa bilmirlər və nəticədə də məktəbdə keçirilən dərslərlə şagirdlər kifayətlənmir. Danılmaz faktdır ki, bu gün mövcud olan müsbət göstəricilər repititor və hazırlıq mərkəzlərinin hesabınadır. Əgər onlar olmasa, bu göstəricilər həddindən artıq aşağı olar. Elm və Təhsil Nazirliyinin tabeliyində 4432 təhsil müəssisəsi var. Bunların hər birində ilk növbədə pedaqoji heyət mövcud təhsil sisteminə daha yaxından bələd olmalı, şagirdlər əlavə biliklərlə yüklənməməli və onlara daha çox lazım olan biliklər verilməlidir ki, qarşıdakı dövr ərzində keçirilən imtahanlarda şagirdlər çətinlik çəkməsin. Əsas problemlərdən biri odur ki, şagirdlərin məktəb qiymətləri ilə qəbul imtahanının nəticəsi biri-birinə heç cür uyğun gəlmir. Şagirdlər öz biliklərinə uyğun qiymətləndirilmir. Ötən il 23 mindən çox abituriyent ümumi olaraq 100 bal həddini keçməmişdi. Bu da onu deməyə əsas verir ki, təhsil müəssisələrində verilən bilik konkret olaraq Dövlət İmtahan Mərkəzində keçirilən imtahanlarla üst-üstə düşmür. Bu istiqamətdə aidiyyəti qurumlar, əsasən də Elm və Təhsil Nazirliyi və onun tabeliyində olan regional təhsil idarələri daha diqqətlə çalışmalıdırlar. Keçən il "2” və "5” qiymət alanların faizi nisbətən azalıb, "3” və "4” qiymət alanların faizi isə nisbətən artıb. Qəbul imtahanlarında iştirak edən abituriyentlərin topladıqları balların paylanması strukturunda və qəbul planında baş verən dəyişikliklər qəbul olan abituriyentlərin ballarının paylanmasında da öz əksini tapıb”.
Günel CƏLİLOVA
