Orta məktəblərdə hazırlıq qruplarının ləğv ediləcəyi barədə məlumat yayılıb. O da qeyd edilir ki, məktəbəqədər qruplar məktəblərdən alınıb uşaq bağçalarına veriləcək. Məlum olduğu kimi, valideynlər övladlarını orta məktəblərdəki məktəbəqədər qruplara daxil etmək üçün nə qədər əziyyətlər çəkirlər.
Əgər məktəbəqədər qrupların məktəblərdə təşkil edilməsi yanlış qərar idisə, bunu niyə tətbiq edirdilər? Söhbət ondan gedir ki, bəzi məmurların yararsız islahatlarından ən çox əziyyət çəkən uşaqlar və onların valideynləri olur. Gizlin deyil ki, indiyə qədər məktəbəqədər qruplara bağlı çeşidli qərarlar verilib, hamısı da sonradan dəyişdirilib. Qeyd etdiyimiz kimi, uşaqlarının məktəblərdə məktəbəqədər qruplara cəlb edilməsi üçün valideynlər çox böyük əziyyət çəkirlər. Təhsil Nazirliyi bir gün elan edir ki, uşaqlar məktəbəqədər qruplara elektron sistem vasitəsilə daxil olmalıdır, valideyn də min-bir əziyyətə qatlaşıb uşağını elektron qeydiyyatdan keçirir. Valideynlər uşaqlarını o sistemdən keçirmək üçün çox məşəqqətlər yaşayır, neqativliklərlə üzləşir. Halbuki, Təhsil Nazirliyinin saytında qeyd edilir ki, məktəbə hazırlıq qruplarının yaradılmasında məqsəd 5 yaşlı uşaqların məktəb təliminə hazırlığı ilə əlaqədar psixoloji dayanıqlığını artırmaq, əhatə olunduqları aləmə və təhsil mühitinə uyğunlaşdırmaq, onların ünsiyyət və birgə fəaliyyət bacarıqlarına yiyələnməsini təmin etməkdir.
Əslində isə, bəzi məmurların yanlış qərarları, “islahat” adı qoyduğu ekspermentləri sahəsində uşaqlar da, valideynlər də ciddi psixoloji problem yayaşyır.
Təsəvvür edin ki, bəziləri təhsili eksperment meydançasına çevirib. Son 10-15 il ərzində təhsil sisteminin başına min cür oyun açılıb. Kimin kefi nə istəyir onu təhsil sahəsində həyata keçirir. Sanki təhsil sistemi təcrübə bostanıdır. İndiyə qədər məktəbəqədər təhsil sistemi də daxil olmaqla təhsilin müxtəlif sahələrində yanlış qərar verənlərin, islahatlar adı ilə əllaməçilik edənlərin bir də məsuliyyətə cəlb edilməyib. Verdiyi yanlış qərarlarla nəticəsizlik mühiti yaradanların biri də sorğu suala çəkilməyib ki, niyə bunu edib dövlətin milyonlarını havaya sovurmusan? Nəzərə alsaq ki, burada ən çox uşaqlar əziyyət çəkir onda bu yanlış qərarı verənlər cəzalandırılmalıdır. Təəssüf ki, biz bunu görmürük.
Son illər təhsil sistemində qurama işlərin, nəticəsiz layihələrin geniş miqyas aldığını deyən ekspertlərin sözlərinə görə, bu ondan irəli gəlir ki, məktəblərlə bağlı qərar verənlərin xeyli bir qismi bir saat da olsun müəllimlik təcrübəsi olmayan şəxslərdir, onların uşaq psixologiyasından xəbərləri olmadığı üçün bu cür “islahatlar” aparırlar. Ekspertlər hesab edir ki, hökümət xüsusi komissiya yaratmalı və son illər təhsil sahəsində həyata keçirilən uğursuz “islahatlar”ı araşdırmalıdır.
“Baş verənlərə cavabdehlik daşıyan şəxs yoxdur”
Pedoqoq Gülyaz Əliyeva bizimlə söhbətində bildirdi ki, orta məktəblərdə hazırlıq qriplarının ləğv eidləcəyi xəbəri orta təshil sahəsində şok yaradıb. G.Əliyevanın sözlərinə görə, orta məktəblərdə məktəbəqədər hazırlıq qruplarının ləğvi yanlış qərardır və pis nəticə verə bilər: “Biz özümüz bunu yeni eşitmişik. Bizim üçün də qəribədir ki, orta məktəblərdə məktəbəqədər təhsil niyə ləğv edilməlidir. Təsəvvür edin ki, bu sahədə sanki hər şey pərakəndə və plansız halda həyata keçirilir. Qərar veriləndə də, ləğv ediləndə də onun konkret əsaslandırlması olmalıdır ki, bu qərar niyə qəbul edilib, yaxud niyə ləğv edilib. Əgər orta məktəblərdə məktəbəqədər qrupların açılması effekt verməyəcəkdisə bunu niyə açdılar? Bu işə niyə plansız yanaşılır. Bu qərarı verənlər kimdir, bilmirik, amma bizim üçün də mücərrədlik yaradır. Çox təəssüf ki, bəziləri təhsil sahəsini öz eksperment zonasına çevirib. Bu gün bir qərar verirlər son nəticəni gözləmədən sabah o qərarı ləğv edirlər. Təhsil sahəsi təcrübə meydançası deyil. Son dövrlər aparılan imtahan prosesi bilirsiz insanlar arasında nə qədər şaçqınlıq yaradır. Burada müstəqil həyata yeni addım atan gənclərin, şagirdlərin taleyi həll olunur. Cavablar yoxlanılmaq üçün bir başqasına verilir. Baş verənlərə də cavabdehlik daşıyan şəxs yoxdur. Konkret iş görülmür. Əvvəllər imtahan prosesi açıq və şəffaf idi. Uşaq imtahana gedirdi çölə əlində kitabçası ilə çıxırdı və özü nə yazdığını, nəyi düz-nəyi səhv etdiyini bilirdi. Amma indi imtahana gedir, deyir belə yazmışdım cavab başqa cür gəlib. Yalnız bir sualdan artıq düzəltməyə apeliyasiya üçün də icazə vermirlər. Sanki məktəb, təhsil sistemi təcrübə meydanına çevirilib. Sonra da təhsildən çox şey gözləyirlər”.
Məktəbəqədər təhsilə gəlincə, G.Əliyevanın sözlərinə görə, bu qruplar məktəblərdə daha yaxşı effekt verirdi, çünki orada təcrübəli müəllimlər dərs deyirdi, onlar maaş alırdılar. G.Əliyevanın sözlərinə görə, məktəbəqədər qruplar bağçalarda yox, məktəblərdə fəaliyyət göstərməlidir, çünki məktəbdəki şəraitlə bağçalardakı şərait bir deyil. “Məktəbdə təkcə dərs öyrədilmir, həm də 5-6 yaşlı uşaqlara düzgün oturmaq, sinifdə davranmaq və sair də öyrədilir. Nizam-intizam var məktəbdə. Uşaq birinci sinfə lazımı şəkildə hazırlanır. Özü də hazırlıq qruplarında 45 dəqiqə deyil, 35 dəqiqə dərs keçilir. Burada lazımı qayadalara riayət edilir”- deyə G.Əliyeva qeyd etdi.
İradə SARIYEVA
