Baş Prokurorluq "Tərtər işi" ilə bağlı yaydığı son bıyanatdan məlum olur ki, həmin iş üzrə təqsirləndirilərin bir çoxunun işinə xitam, hətta vətənə xəyanət ittihamı təqsirləndirilərək, barəsində hökm çıxarılanlar haqda bərahətlər də verilib.
Sitat: “Əvvəllər dövlətə xəyanət ittihamı ilə barələrində cinayət təqibi aparılmış, lakin sonradan bu hal öz təsdiqini tapmamaqla, hərbi xidmət əleyhinə olan cinayətlərə görə məhkum olunmuş 16 şəxs barəsində 16 cinayət işi üzrə verilmiş apellyasiya protestləri təmin edilərək müvafiq hökmlər ləğv edilmiş, həmçinin birinci instansiya məhkəmələri tərəfindən qeyd olunan işlərin əlavə istintaq aparılması üçün ibtidai araşdırmaya prosessual rəhbərliyi həyata keçirən prokurora qaytarılmasına dair qərarlar qəbul edilmişdir. Həmin şəxslər barəsində cinayət təqibi ilə bağlı bütün hallar hərtərəfli, tam və obyektiv araşdırılaraq yenidən yekun qərarların qəbul edilməsi təmin ediləcəkdir.
Bununla yanaşı, əvvəllər dövlətə xəyanət ittihamı ilə barələrində cinayət təqibi aparılmış, lakin sonradan bu hal öz təsdiqini tapmamaqla digər cinayətlərə görə məhkum olunmuş daha 10 şəxs barəsində 10 cinayət işi üzrə müəyyən prosessual pozuntulara yol verilməsi halları aşkar edildiyindən həmin işlər üzrə yekun məhkəmə qərarlarının ləğv edilərək işlərin əlavə istintaq aparılması üçün ibtidai araşdırmaya prosessual rəhbərliyi həyata keçirən prokurora qaytarılmasından ötrü Baş prokurorun müvafiq müavini tərəfindən məhkəmələrə apellyasiya protestləri verilib.
Eyni zamanda istintaqla mərhum Quliyev Elçin Mətləb oğlu ilə əlaqədar bütün xüsusatlar tam, hərtərəfli və obyektiv araşdırılaraq onun əməlində hər hansı cinayət tərkibi müəyyən edilmədiyindən barəsindəki cinayət təqibinə bəraətverici əsaslarla (Azərbaycan Respublikası Cinayət-Prosessual Məcəlləsinin 39.1.2-ci maddəsi) xitam verilməsi haqqında qərar qəbul edilib.
Cinayət işinin istintaqı zamanı ayrı-ayrı hərbi qulluqçulara işgəncə verməsi, onları qanunsuz azadlıqdan məhrum etməsi və vəzifə səlahiyyətlərini aşmasına əsaslı şübhələr müəyyən edilən Niftəliyev Rəşid Ağaşərif oğlu, Mikayılov Ruslan Məhəmmədəli oğlu, Maşıyev Sənan Səxavət oğlu, Qəhrəmanov Cabir Babaxan oğlu, Əzizov Polad Seyfəddin oğlu, Əliyev Elçin Kalam oğlu və Məmmədov İntiqam Şərif oğlu Cinayət Məcəlləsinin 145.3 (qanunsuz azadlıqdan məhrum etmə), 293.2 (işgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 341.2.2 (vəzifə səlahiyyətlərini aşma), 341.2.3 və 128-ci (qəsdən sağlamlığa yüngül zərər vurma) maddələri ilə təqsirləndirilən şəxs qismində cəlb edilərək barələrində həbs qətimkan tədbiri seçilib, həmçinin Əzizov Polad Seyfəddin oğlu istintaqdan gizləndiyi üçün barəsində axtarış elan edilib.
Eyni zamanda hazırda cəza çəkən Ağayev Fuad Ramiz oğlunun məhkum edildiyi hallardan başqa çoxsaylı zərərçəkmiş şəxslərə qarşı qanunsuz əməllərə yol verməsinə əsaslı şübhələr müəyyən edildiyindən Cinayət Məcəlləsinin 145.3, 293.2, 341.2.2, 341.2.3 və 128-ci maddələri ilə təqsirləndirilən şəxs qismində cəlb edilərək ona müvafiq ittiham elan edilib”.
Maraqlıdır, günahsiz insanların taleyi ilə bağlı belə yanlış qərarlar verən müstəntiq və hakimlər məsuliyyətə cəlb edilməlidirlərmi?
Vəkil Rəsul Yusifbəyli “Bakı-Xəbər”ə açıqlamasında bildirdi ki, bütün bu məsələlərin həlli hüquqi normalarla tənzimlənir: “Azərbaycanda üç pilləli məhkəmə ierarxiyası var. Yerli, Apelliyasiya və Ali Məhkəmə. Əgər hər hansı bir hakim qanunsuz olaraq kimisə dövlətə xəyanətdə və digər cinayətdə ittiham edən hökm çıxarıbsa, yuxarı instansiya məhkəməsinin borcudur ki, həmin səhvi düzəltsin. Ən son instansiya Ali Məhkəmədir. Bütün bu pozuntuları Ali Məhkəmə fiksə edərsə, həmin hakim barədə xüsusi qərardad çıxararaq göndərməlidir Məhkəmə Hüquq Şurasının sədri, eyni zamanda ədliyyə naziri okan Fikrət Məmmədovun üstünə ki, bu barədə qərar verilsin. Bütün bunlar olmursa, hökm bütün instansiyalar tərəfindən təsdiqlənibsə və sonra şəxsə bəraət verilibsə onda başqa bir hüquqi prosedur aparılmalıdır. Şəxs və ya onun qanuni nümayəndəsi məhkəmədə həmin müstəntiq, prokuror və hakim barədə iddia qaldıraraq maddi təzminat və digər tələblər irəli sürə bilər. Bura fiziki, mənəvi, maddi ziyana dair bütün tələblərini sala bilər. Dediyiniz kateqoriyaya aid şəxslər belə məzmunda şikayətlə məhkəməyə müraciət etəmək hüququna malikdirlər”.
Məhəmmədəli QƏRİBLİ
