Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev bildirib ki, bəzən elə hallar olur, məcburi köçkünlərin mənzilləri öz adlarına olmur, yataqxanada yaşayırlar. Komitə sədri bildirib ki, məcburi köçkünlər üçün verilən mənzillərdə yaşamayanların monitorinqi davam etdirilir.
“Adətən, köçürülmə zamanı yataqxanalarda yaşayan məcburi köçkünlər nəzərə alınır. Ancaq biz sonradan görürdük ki, onlar həmin evlərdə yaşamırlar. Ona görə də 510 belə halla bağlı məhkəmə müraciətimiz var. Məhkəmə qərarı çıxardıqca bizdə siyahısı olan məcburi köçkün, şəhid və qazi ailələri həmin mənzillərə yerləşdirilir. Bu asan məsələ deyil. Bu hallar Bakıda və rayonlardakı qəsəbələrimizdə var”.
Komitə sədrinin sözügedən açıqlaması indiyə qədər çoxlarına məlum olan bir neqativ halın rəsmi etirafıdır. Doğrudan da, neçə illərdir ki, bu barədə cəmiyyətdə söz-söhbətlər gəzirdi, lakin həmişə rəsmi qurumlar tərəfindən inkar olunurdu.
“Onların məhkəməyə verilməsinin müsbət tərəfi odur ki, məhkəmədə çox maxinasiyaların üstü açılacaq...”
İqtisadçı ekspert Akif Nəsirli bizimlə söhbətində bildirdi ki, bu sahədə kifayət qədər neqativ hallar mövcuddur:“Ümumiyyətlə, digər dövlət qurumlarında olduğu kimi, “Qaçqınkom”da da bu məsələ indiyə qədər qeyri-şəffaf proses olaraq həyata keçirilib. Qaçqınların, məcburi köçkünlərin mənzil sahəsi ilə təmin edilməsi məsələsində anarxiya hökm sürüb. İnsanlar iddia edirlər ki, qaçqınların 90 faizindən çoxu mənzilləri rüşvət qarşılığında alıb. İddialara görə, kimi 5, kimi 10, kimi 15 min manat verib bu mənzillərə sahib olublar. Yəni qiymət yaşayış sahəsinin yerləşdiyi əraziyə uyğun müəyyən edilib. Orada 5-10 faiz qaçqın-köçkünə “Qaçqınkom” pulsuz ev verib. Bunu, demək olar ki, çox adam danışır. Qaçqın və məcburi köçkünlərə mənzillərin verilməsində qeyri-şəffaflığa yol verilib, başqa yerdə evi olana ev verilib. Amma onların da xeyli bir qismi o evlərdə yaşamır. Monitorinq aparmağın ən düzgün yolu ev alan vətəndaşları dindirməkdir, onlar hamısını özləri deyəcək. Aydın olacaq ki, mənzilə görə nə qədər adamdan püşvət alıblar. Bu gün komitə mənzil alıb, lakin içində yaşamayan 510 nəfəri məhkəməyə verib. Yəqin ki, onların bəzilərini evi geri almaq tələbi ilə məhkəməyə veriblər. Onların məhkəməyə verilməsinin müsbət tərəfi odur ki, məhkəmədə çox maxinasiyaların üstü açılacaq, kimin kimə nə qədər rüşvət verdiyi ortaya çıxacaq. Beş adam deməsə də, iki adam danışacaq. Biri deyəcək ki, mənzili pulla almışam, orada yaşamıram, yaxşı edib kirayəyə vermişəm. Bu hallar da ola bilər. Bu məsələdə günahkar yalnız rüşvət verib mənzil alanlar deyil, əslində günahlar rüşvət alanlardır. Tutaq ki, 510 nəfərdən mənzili geri alıdılar, amma o mənzilləri onlara düşmədiyi halda verən məsul şəxslərə qarşı nə tədbir görülməlidir? Dövlət qurumunun mənzil bölgüsündə qeyri-şəffaflığa yol verən vəzifəli şəxsləri cəzalandırılmalıdır. Hesab edirəm ki, bu məsələnin geniş araşdırılması çox gizlin maxinasiyaların üzə çıxmasına səbəb olacaq”.
A.Nəsirlinin sözlərinə görə, görünən odur ki, bu gün Rövşən Rzayev Əli Həsənovun dövründə olanların üstünü açmaq istəyir. A.Nəsirli deyir ki, burada təkcə mənzil məsələsi deyil, eyni zamanda yardım və digər məsələlər var. “Burada hələ ki, qaçqınların yardımı var, hələ o yardım dayanmayıb. Qaçqın statusu götürülsə də, hələ dövlətin təminatındadırlar. Digər məsələlərdə də qeyri-şəffaflıq hökm sürəcək. Dövlət Komitəsində şəffaflıq yaratmaq lazımdır və qaçqınlara qeyri-qanuni mənzil verən dövlət məmurları ciddi şəkildə cəzalandırılmalıdır. Cərimə və başqa şeylə canlarını qurtarmaq yox, barələrində canəyət işi qaldırıb onları həbs etmək lazımdır”- deyə A.Nəsirli vurğuladı.
İradə SARIYEVA
