Bakıda insanların ən çox üz tutduğu müqəddəs yerlərdən biri də Mir Mövsüm Ağa ziyarətgahıdır. Digər ziyarətgahlardan fərqli olaraq, bu Ağanı ziyarət etmək istəyənlər onun Şüvəlanda dəfn olunduğu məzara üz tutur, oranı nicat yeri bilirlər.
Qeyd etdiyimiz müqəddəs yerə gedənlər nəzir paylayır və ya qurban kəsirlər. Əvvəllər Mir Mövsüm Ağa ziyarəhgahında qurban kəsmək istəyən şəxs ya özü ilə qurbanlıq heyvan aparıb orada kəsirdi, ya da elə ordan alırdı. Ancaq indi vəziyyət dəyişib. Belə ki, son zamanlar ziyarətgaha gedən vətəndaşlar sosial şəbəkələrdə qeyd edir ki, onlar dini məkana qurbanlıq heyvan aparsalar da, ziyarətgah vəzifəlisi kənardan gətirilən heyvanın kəsilməsinə icazə vermir, ziyarətgahda yalnız burada saxlanılan heyvanların qurban kəsilə biləcəyini qeyd edirlər. Ziyarətgah daxilində isə heyvanların qiymətinin baha olduğu vurğulanır.
Ziyarətgah çalışanlar qeyd edir ki, qurban kəsiləcək qoyunun yaşı 6 aydan aşağı olmamalıdır: “Din icazə vermir ki, 6 aylıq quzunu kəsəsən. Həm ziyarətgahda, həm də yol qırağında qurbanlıq heyvanlar var. Hər kəs öz evindən, rayondan da qoyunlar gətirir. Təkcə qoyun deyil, dana yaş yarımlıq olmalıdır, dəvə 4 yaşından yuxarı olmalıdır. Bura gətirilən heyvanlar əgər 7 aydan kiçikdilərsə, kəsmək olmaz. Şəriət buna icazə vermir. Əvvəl 6 idi, hazırkı fətvaya görə, 7 aydan aşağı olmamalıdır. Bizdə burada qapıda yazıb vurublar ki, 7 aydan kiçik heyvanları qurban kəsmək olmaz. Əgər bu şəxs qurban kəsdirirsə, savab qazanmaq istəyir. Amma 7 aydan kiçik heyvanı kəsirsə, demək ki, günah qazanır. Ola bilər ki, çəkisi az, yaşı çox olsun. Amma burdakılar heyvanı tanıyırlar, yaşını bilirlər”.
Ziyarətgah işçisi onu da qeyd edir ki, qurbanlıq heyvanın əti aparılacaqsa xidmət ödənişlidir: “Əgər özünlə aparacaqsansa, kəsim ödənişlidir, 5 manat ödəniş etməlisən. Əgər yarısını və bütöv burada qoyursansa, pulsuzdur. Qiymətlər heyvanın çəkisindən asılıdır”.
Ilahiyyatçı Cəmşid Əliyev qeyd etdi ki, ziyarətgahların biznes obyekti kimi işlədilməsi düzgün deyil: “Mir Mövsüm Ağa ziyarətgahına gedən şəxs orda niyyət edib, hansısa arzularının gerçək olmasını istəyir. Bunun üçün həmin dini məkanda nəzir paylayanlar az deyil. Məlumdur ki, ziyarətgahın nəzdində qurbangah var. Kim istəsə, gəlir burada alır, kim istəsə başqa yerdən aldığı qurbanı gətirib burada tamamilə təmənnasız kəsir. Ancaq son vaxtlar başqa yerdən qurbanlıq heyvanın gətirilib orda kəsilməsinə icazə verilməməsi düzgün deyil. Bunu edən şəxslər artıq qazanc haqqında düşünür. Dini məkanda biznes haqqında düşünmək, ora ibadət üçün gələn şəxslərdən artıq pul almaq insanlığa sığmır. Ümumiyyətlə, qurbanlıq o deməkdir ki, insanlar Allahın xoşuna gələcək bir əməli icra edirlər. Qurban kəsmək və onu paylaşmaq sosial bərabərliyə ən gözəl nümunələrdən biridir”.
Günel CƏLİLOVA
