Azərbaycanın rayonlarında əkin mövsümü başladığından, kiçik pay torpaqlarına malik kəndlilər ənənəvi problemin davam edəcəyindən qayğılanırlar. Söhbət suvarma suyunun çatışmazlığından gedir.
Məsələ burasındadır ki, bir çox rayonlarda ucsuz-bucaqsız torpaqları qamarlayıb ələ keçirən imkanlı şəxslər, məmurlar əkin-biçin mövsümü boyu suvarma sularını öz sahələrinə yönəldirlər. Nəticədə bu "su əjdahaları”nın ucbatından nisbətən kiçik pay torpaqları olan kəndlilər əkib-becərə bilmirlər.
Şəmkir rayonunun Könüllü kəndinin sakinləri də əkin sahələrini suvara bilməmələrindən əziyyət çəkirlər. Əsas gəlirləri təsərrüfatdan olan kənd sakinləri bildirir ki, susuzluq səbəbindən cari ildə sahələrdən məhsul götürə bilməyəcəklər.
Sakinlərin sözlərinə görə, sözügedən problemlə bağlı aidiyyəti qurumlara müraciət etsələr də, məsələnin həlli hələ ki, mümkün olmayıb: “Sahə lazımı səviyyədə suvarılmadığı üçün məhsuldarlıq bu il aşağı olacaq”.
Onu da qeyd edək ki, Könüllü kəndi Şəmkir rayonunun ən böyük kəndlərindən biridir. Bu kənddə təxminən 5300-ə yaxın insan yaşayır. Yaşayış massivinin 1858 hektr əkin sahəsi var. Gəncə şəhəri və Göygöl rayonunu içməli su ilə təmin edən Şəmkir Dərya çayı Könüllü kəndinin yaxınlığından keçir. Buna baxmayaraq, kənd sakinləri su sarıdan əziyyət çəkir.
Kənd sakinləri bildirir ki, çaya qeyri-qanuni borular salınıb. Bu borular səbəbindən kəndin əkin sahələrinə su çatmır. Sakinlər onu da qeyd edir ki, məlum problemin həll olunması üçün aidiyyəti qurumlara müraciət etsələr də, heç bir nəticə olmayıb.
Şəmkir Suvarma Sistemləri İdarəsi: “Şəmkir Su Anbarında su ehtiyatı az olduğu üçün suyun verilişində ciddi çətinlik yaranıb”
Şəmkir Suvarma Sistemləri İdarəsindən bildirildi ki, hava ilə bağlı olaraq Şəmkir Su Anbarında su ehtiyatı az olduğu üçün suyun verilişində ciddi çətinlik yaranıb: “Çətinliklərə baxmayaraq, biz növbəli qrafik əsasında su verilişi həyata keçirilir”.
Flora Hacıyeva: “Kəndli əkin sahəsini, bostanını, meyvə ağaclarını suvara bilmir deyə, əkib-becərməkdən əl çəkib”
Ekoloq Flora Hacıyeva qeyd etdi ki, suvarma problemi təkcə bir rayonda, bir-iki kənddə deyil. Əksər bölgələrdə eyni vəziyyətdir: “Son illərdə su təsərrüfatının bərbad idarə olunmasının nəticəsi göz qabağındadır. Dövlət büdcəsindən ən çox vəsait su təsərrüfatlarına ayrılır, lakin bu vəsaitin hara, necə xərcləndiyi bilinmir. Kəndli əkin sahəsini, bostanını, meyvə ağaclarını suvara bilmir deyə, əkib-becərməkdən əl çəkib”.
Günel CƏLİLOVA
