Mənzil İnşaatı Dövlət Agentliyi (MİDA) tərəfindən inşa edilən güzəştli evlərin satışının ikinci mərhələsi başa çatdı. Agentliyin məlumatına görə, 442 mənzilin seçimində 8939 nəfər iştirak edib.
Məlumat üçün bildirək ki, Prezident İlham Əliyev 2016-cı ildə MİDA-nı bu məqsədlə yaratdı. Agentliyin yaradılması ilə bağlı Fərmanda da qeyd olunur ki, məqsəd Azərbaycan Respublikası vətəndaşlarının yaşayış sahələrinə olan ehtiyacını ödəmək, onların mənzil-məişət şəraitini yaxşılaşdırmaqdır.
Prezident İlham Əliyevin bu addımı cəmiyyətdə böyük sevinclə qarşılandı. Çünki bu, mənzilə ehtiyacı olanlar üçün ev almaq imkanının yaranması demək idi. Ehtiyacı olanlar böyük ümidlə güzəştli mənzillərin inşasının başa çatdırılması və satışa çıxarılması gününü gözlədilər.
Qeyd edək ki, Agentlik güzəştli mənzillərin satışı ilə məşğul olur. Onun satdığı mənzillərin qiyməti real bazar qiymətindən 2 dəfə ucuzdur. Buna görə də, hər il mənzil seçimi ilə bağlı müraciətlər həddindən artıq olur. Martın 30-da Yasamalda yeləşən kompleks üçün ikinci satış mərhələsində bir mənzil uğrunda 20 nəfər mübarizə aparıb.
Mənzil İnşaatı Dövlət Agentliyi sonuncu onlayn satışdan sonra rəsmi olaraq iki məlumat paylaşıb. Birincisi elə də ictimai əhəmiyyət kəsb etməyən press relizdir, digəri isə satışla bağlı statistikadır.
MİDA-nın rəsmi statistikası sosial mediadakı narazılıqlar və mənzil seçimi ilə bağlı 2-3-4-5 saniyə məsələləri ilə uzlaşmır. Maraqlıdır, MİDA-nın açıqladığı statistik rəqəmlər bu mövzuda yaranan şübhələrə son qoydumu?
Osman Gündüz: “MİDA hər bir iddiaçının satışla bağlı real vəziyyətini əks etdirən log faylları açıqlamalı, botlarla bağlı məsələyə aydınlıq gətirməlidir, əks halda...”
İKT sahəsi üzrə ekspert Osman Gündüz “Bakı-Xəbər”ə açıqlamasında bildirdi ki, MİDA-nın açıqlamasına görə, mənzil seçimi 6-cı saniyədən sonra başlayıb. Bir çoxları isə iddia edir ki, 2-3-4-5 saniyə ərzində sistemə daxil olub, lakin seçim üçün mənzil tapmayıb: “Bu baxımdan düşünürəm ki, MİDA-nın rəsmi statistikadakılar və irəli sürülən iddialara aydınlıq gətirməsi doğru olardı. Bununla bağlı daha ətraflı data açıqlanmalıdır. MİDA hər bir iddiaçının satışla bağlı real vəziyyətini əks etdirən log faylları açıqlamalı, botlarla bağlı məsələyə aydınlıq gətirməli, "Güzəştli mənzil " sisteminin botlara qarşı nə dərəcədə güvənli olmasına ağlabatan bir açıqlama verməli, ümumiyyətlə ictimai əhəmiyyət kəsb edən bütün məlumatları açıqlamalıdır”.
Nadir Əzizov: “Mənzil seçimi başlamamışdan bir neçə gün əvvəl informasiya texnologiyaları üzrə mütəxəssislərlə görüşdüm, onlar bu iş üçün 5000 manat istədilər”
Mənzil almaq şansını itirən Nadir Əzizov qeyd etdi ki, mənzil seçimi başlamamışdan bir neçə gün əvvəl informasiya texnologiyaları üzrə mütəxəssislərlə görüşüb: “Onlar komanda şəklində işlədiklərini dedilər və mənə kömək etmələri üçün 5000 manat istədilər. Hətta biri var idi, dedi ki, seçimdə mənzil qazanacağına sənə 99 faiz qarantiya verirəm və buna görə məndən mənzili əldə edəndən sonra 10 min manat ödəməyimi istədi. Heç mənzilin ilkin ödənişi bu qədər deyil”
Şikayətçinin sözlərinə görə, klaviaturada bir dəqiqədə 40-50 söz yazmağı bacaran adamın mənzil seçimini ən azı 14-15 saniyədə həyata keçirməsi mümkündür. Lakin mənzil 6 və ya 7 saniyəyə seçilirsə, deməli həmin adamlar hansısa "proqramdan" istifadə ediblər.
Elnur Fərzəliyev: “Lotereya oyunu deyil ki, kimin şansı varsa, o da mənzil sahibi olsun”
Əmlak eksperti Elnur Fərzəliyev qeyd etdi ki, müraciətin kateqoriyalar üzrə bölünməsi, satışın da kateqoriyalar üzrə aparılması daha effektiv ola bilər: “Hər dəfə müəyyən narazılıqlar baş verir, problemlər yaranır. Bəzən internet çökür, bəzən mənzillər tez satılır. Budəfəki satışda da saniyələr ərzində 442 mənzil satıldı. Həmin satışda 8939 nəfər iştirak edib. Bu layihədən mənzil almaq üçün sürətli internetin olması vacib şərtdir. Ümumi statistik rəqəmə baxsaq, 8939 nəfərin eyni anda düyməyə basması, 442 nəfərin mənzil ala bilməsi real ola bilər. Texnologiya dövründə yaşayırıq. Əgər satış onlayn aparılırsa, o zaman bir düyməyə basmaqla mənzil sahibi olmaq mümkündür. Müraciət edənlərin sayını ortalama 9 min götürsək, onun 0.5 faizi, yəni 442 nəfər mənzil ala bilib. Bu da mənzil ala bilməyən vətəndaşların haqlı narazılığına səbəb olur. Həmin binalardan mənzil ala bilmək üçün bəlli kateqoriyalara aid insanlar müraciət edə bilir. Lakin müraciəti qəbul olunmuş vətəndaşların hər birinin satışda eyni vaxtda iştirak etməsi sonda bu cür narazılığa səbəb olur. Mənzil almaq istəyən çox, mənzil sayı isə məhduddur.
Lotereya oyunu deyil ki, kimin şansı varsa, o da mənzil sahibi olsun? Uzun müddət satışda iştirak edib mənzil sahibi olmayan vətəndaşlar da var. Onlar düşünür ki, bu mənzili ala biləcək vəziyyətim olduğu halda ala bilmirəmsə, burada şübhəli məqamlar var. Bu, gözəl layihədir. Çünki qiymətlər çox münasibdir. Kompleks də yaxşıdır, görünüş də. Satış formasına da düzəliş etsələr, daha uğurlu olar”.
Günel CƏLİLOVA
