Kənd yerlərindən axan arxların, çay və su hövzələrin çox zaman yerli sakinlər tərəfindən çirkləndirildiyi barədə məlumatlar alırıq. Sakinlər zibil qablarının, tullantı yerlərinin olmadığını bəhanə gətirərək su arxlarını antisanitariya mənbəyinə çevirirlər.
Bu məsələdə obyektlər, mağazalar, kafe və restoranlar, ictimai iaşə müəssisələri də “xüsusi aktivlik” göstərir, onlar da tullantıları su arxlarına, kanallara atırlar. Bu barədə kifayət qədər informasiyalar var, biz özümüz də dəfələrlə bu problemi işıqlandırmışıq. Son günlər bu barədə mətbuatda yayılan məlumat isə Xaçmazın Arzu kəndi ilə bağlıdır. Mətbuatın yazdığına görə, Arzu kəndi əməlli-başlı çirkab içindədir. Qeyd edilir ki, kənd boyu uzanan suvarma kanalı əsl antisanitariya mənbəyidir. Belə ki, kənddə zibillik üçün xüsusi sahə olmadığına görə əhali məişət tullantılarını birbaşa kanala atır. Sakinlər illərdir bu problemdən əziyyət çəkdiklərini deyirlər. Onlar mətbuata şikayət ediblər ki, məsələ ilə əlaqədar qurumlar maraqlanmır.
Məsələ ilə bağlı mətbuata açıqlama verən Xaçmaz Rayon “Yergüc” Sudan İstifadə Edənlər Birliyinin sədri Niftəli Əspəndiyev bildirib ki, kanalı dəfələrlə təmizləsələr də, problemi tam aradan qaldırmaq mümkün olmayıb. Çünki kənddə zibillik üçün xüsusi sahə və zibil qutuları yoxdur. N.Əspəndiyev onu da əlavə edib ki, kanalın üzərində tikilən obyektlər də içini texnika ilə tam təmizləməyə imkan vermir.
“Bələdiyyənin özünün pulu yoxdur ki, bu işləri öz hesabına edə”
Sakinləri narahat edən və hələ də aradan qaldırılmayan problemlə bağlı Arzu kənd bələdiyyəsinin nə kimi işlər görəcəyini öyrənmək məqsədilə bələdiyyə sədri Faiq Məhərrəmovla əlaqə saxladıq. F.Məhərrəmov “Bakı-Xəbər”ə bildirdi ki, kanal bələdiyyənin deyil, Xaçmaz Rayon “Yergüc” Sudan İstifadə Edənlər Birliyinin balansındadır. Sözügedən qurum da vaxtaşırı ərazinin təmizlənməsi istiqamətində bələdiyyə ilə birgə fəaliyyət göstərir, işlər görür. F.Məhərrəmovun sözlərinə görə, Xaçmaz Rayon “Yergüc” Sudan İstifadə Edənlər Birliyi keçən il kanalı təmizləsə də, yenə bu il analoji hadisə yaşanıb. “Bu kanal Hacəlibəy kəndinin evlərinin arxasından, Arzu kənd sakinlərinin evlərinin önündən keçir. Təsəvvür edin ki, kanal boyu mağazalar, obyektlər tikilib, elə obyekt var lap kanala yaxın inşa olunub. Biz bələdiyyə olaraq kanalın zibillənməsinin qarşısının alınması üçün kifayət qədər maarifləndirici işlər aparmışıq, plakatlar, bildirişlər, elanlar yapışdırmışıq, ticarət obyektlərinə xəbərdarlıq etmişik. Xeyri olmayıb. Bütün mağazalar kanalın qırağında yerləşir. Keçən il Xaçmaz Rayon “Yergüc” Sudan İstifadə Edənlər Birliyi kanalı təmizləmişdi. Ticarət obyektləri, mağazalar, binalar kanalın zolağında yerləşdiyi üçün zibilləmələr baş verir. Bu tikintilərə o zaman icazəni düzgün verməyiblər. Bu problemi qanunsuz tikililər də yaradır. O mağazalardan çıxan zir-zibili, kimin əlinə nə gəldi, butulka-filan, hamısını kanala atırlar. Biz keçən il onlara ciddi xəbərdarlıq etmişik. Ora zibil atanları görmürük, amma yoldan keçənlər zibil tullayır. Kanala zibil atanların öhdəsindən gəlmək olmur”.
“Yergüc” Sudan İstifadə Edənlər Birliyinin yeni rəhbərliyinin çox məsuliyyətli və işgüzar olduğunu deyən bələdiyyə sədri hesab edir ki, qurum əlindən gələni edir.
Kanalı zibilliyənlərə qarşı hər hansı bir inzibati tədbirlərin, cərimə sanksiyalarının tətbiq edilib-edilmədiyinə gəlincə, Arzu kənd bələdiyyəsinin sədri qeyd etdi ki, ötən il bütün mağazaların, obyektlərin qarşısına cərimə barədə bildirişlər vurublar: “Bizim kanalı zibilliyən şəxslərin, obyektlərin cərimələnəcəyinə dair bildirilişlərimizdən sonra çirkləndirmə prosesi bir qədər səngisə də, sonra yenə də yoldan keçən ora zibil atır, kimlərsə axşam saatlarında atıb çıxıb gedir. Kamera yoxdur, ona görə görmək olmur”.
Qeyd edək ki, camaatın kanala zibil tullamaqlarının səbəbini tullantılar üçün kənd ərazisində ayrıca yerin olmaması və zibil qutularının quraşdırılmaması ilə əsaslandırmaq istəyirlər. İddia edirlər ki, yerli bələdiyyə bu qutuları təşkil etmir. Bu məsələyə gəlincə, F.Məhərrəmovun sözlərinə görə, bələdiyyə zibilin daşınması üçün ayda evbaşına 50 qəpikdən pul yığırmış, camaat bir-iki ay 50 qəpik zibil pulu versə də, sonra kütləvi olaraq ayda 50 qəpiyi verməkdən imtina ediblər. “Bələdiyyənin özünün pulu yoxdur ki, bu işləri öz hesabına edə. Biz 8 aydır maaş almırıq. İşçilərimiz üçün də çox çətindir. Kənd bələdiyyəsinin elə bir vəsaiti yoxdur ki, bu işləri edək. Əvvəllər mən bələdiyyə üzvüydüm, Çingiz müəllim bələdiyyə sədri idi. O vaxt o traktor tutmuşdu və o traktor zibili daşıyıb atırdı. Bələdiyyə hər ay evbaşına 50 qəpik zibildaşıma pulu yığırdı, onu da camaat bir-iki ay verdi, sonra vermədi”.
Bələdiyyə sədri qeyd etdi ki, kanalın zibillənməsində vətəndaş məsuliyyətsizliyi, sahibkarların qaydalara riayət etməməsi amili dayanır: “Burada vətəndaş məsuliyyətsizliyi də özünü göstərir. Sakinlər gecə qaranlıqda çıxıb zibili kanala atırlar, izləmək olmur. Amma yenə də deyirəm, biz imkan daxilində üzərimizə düşənləri edirik”- deyə F.Məhərrəmov qeyd etdi.
İradə SARIYEVA
