Məlumdur ki, bütün bayramlar ərəfəsində bayramqabağı ənənəvi yarmarkalar təşkil olunur. Təbii ki, bu yarmarkaların keçirilməsi insanların bayram alış-verişini daha sərfəli etmələrinə hesablanıb. Amma gəlin görək, belədirmi?
Azərbaycan əhalisi Novruzu xüsusi təntənə ilə qarşılayır. Bütün evlərdə səməni göyərdilir, şəkərbura, paxlava bişirilir. Qapıya papaq atılanda da şirniyyatla doldurulub geri qoyulur. Şirniyyatları isə qozsuz, ləpəsiz təsəvvür etmək mümkün deyil. Bu halda insanları daha ucuz məhsullar əldə etmək maraqlandırır. Hər il Bakı Şəhər İcra Hakimiyyəti tərəfindən metro stansiyaları yaxınlığında qurulan bayram yarmarkalarında qiymətlərin sərfəli olduğu deyilsə də, istehlakçılar bunun əksini bildirir. Onlar qeyd edir ki, bayram yarmarkalarında satışa çıxarılan məhsulların əksəriyyəti qiymətdə baha, keyfiyyət baxımından sərfəli deyil.
Alıcılar bildirir ki, yarmarkalarda satılan əksər məhsulların qiyməti marketlərlə müqayisədə sərfəli deyil.
“Dövlət orqanlarının qiymətə müdaxilə etməyə ixtiyarı yoxdur, heç kim kəndliyə deyə bilməz ki, sən kartofu bu qiymətə sat”
Azad İstehlakçılar Birliyinin (AİB) sədri Eyyub Hüseynov bildirdi ki, mütəmadi olaraq yarmarkalarla bağlı birliyə şikayət daxil olur: “İstehlakçı şikayətləri içində tərəzilərin düz işləməməsi, artıq qiymət, malların təhlükəsizliyinin təmin olunmaması məsələləri də var. Bir çox ölkələrdə yarmarkalar görmüşəm. Bu, əhalinin razı qaldığı bir yarmarka olur, lakin Azərbaycanda bunun istehlakçıları qane etməyən variantı baş verir. İstehsalçılardan da bizə çox sayda şikayətlər gəlir. Onlar bildirirlər ki, yarmarkaya məhsul gətirib satmağa məcbur edilirlər. Əksər hallarda arzuolunmayan malların ora gətirilməsi barədə bizə telefon zəngləri daxil olur. Yaxşı təşkil olunmuş yarmarka olsa, düşünürəm ki, istehlakçıların da, dövlətin də maraqları təmin olunar. Neçə ildir bu proses gedir. Biz hələ də müasir, yaxşı yarmarka qura bilmirik”.
Ekspertin sözlərinə görə, əslində yarmarkaları Kənd Təsərrüfatı Nazirliyi deyil, bələdiyyələr təşkil etməlidir: “Bunun üçün bələdiyyələr gedib rayonlarda iş aparmalı, lazımi təəsrrüfatlarla müqavilələr bağlamalı, öz ərazilərində yerlər ayırmalıdır. Bu işdə əsas bələdiyyələr fəal rol oynamalıdır. Kənd Təsərrüfatı Nazirliyi mümkün olanları edir, lakin effektli nəticələr əldə olunmur. Dövlət orqanlarının qiymətə müdaxilə etməyə ixtiyarı yoxdur. Heç kim kəndliyə deyə bilməz ki, sən kartofu bu qiymətə sat. Bizə illər boyu daxil olan şikayətlərdə belə hallar var. Dövlət məmuru yarmarkada gəzəndə məhsulu bir qiymətə qoyurlar, o gedəndə ayrı qiymət olur. Kəndçi 5 manatlıq malını 3 manata verərmi? Məcburiyyət altında bəzən elə edirlər. İstehlakçılar bəzən şikayət edirlər ki, yarmarkalar adi bazar qiymətlərindən baha olur. Kəndçi də istəmir ki, zərərə düşsün. Dövlət qurumlarının bu işdə əsas vəzifəsi çox rahat bir şəkildə logistika yaratmaqdır. Bu, mal istehsalçılarına heç yerdə heç kimə əlavə xərc ödəmədən məhsullarını bazara çıxarmaq imkanı verəcək”.
Günel CƏLİLOVA
