“İkinci Qarabağ müharibəsindən sonrakı vəziyyət, insan faciələri, dağıntılar, dinc əhaliyə dəyən zərərlər üzrə materialların toplanması və təbliği” layihəsinin həyata keçirilməsi üzrə Qarabağ Azadlıq Təşkilatının (QAT) işçi heyəti Gəncəyə səfər edib. Bu barədə baki-xeber.com-a QAT-ın mətbuat xidməti məlumat verib. Bildirilir ki, Azərbaycanın ikinci böyük şəhərində müharibə zamanı əhalinin yaşadığı dəhşətlər ölçüyəgəlməzdir. Şəhərdə əhali sıxlığı ölkəmiz üzrə yüksək hədd sayılır: 1 km² 3051 nəfər. Bu isə o deməkdir ki, İkinci Qarabağ müharibəsində Ermənistan qoşunları tərəfindən şəhərə atılan bombalar, məhz, dinc sakinlərin məhv edilməsi məqsədini güdüb.
Torpaqlarımızın azadlığı uğrunda mübarizəyə hərtərəfli və mükəmməl hazırlaşmış dövlətimiz bu yolda canını fəda edən insanlarımızın xatirəsinin əbədiləşməsinə və onların ailə üzvlərinin həyatlarının təminatına böyük diqqət ayırır. Gəncə Şəhər İcra Hakimiyyəti başçısının birinci müavini Səməd Tomuyevin və icra başçısının müavini, sosial-iqtisadi inkişafın təhlili və proqnozlaşdırılması şöbəsinin müdiri Adil Tağıyevin QAT heyəti ilə görüşündə bu məsələlər barədə ətraflı danışıldı.
QAT sədri Akif Nağı həyata keçirdikləri layihə barədə şəhər rəhbərliyinə detallı məlumat verdi. Layihənin əhəmiyyətini yüksək qiymətləndirən Səməd Tomuyev bu işə yaxından dəstək olaraq, öz töhfələrini verəcəklərini bildirdi. O, erməni vandallarının cinayətləri barədə səhih məlumatları QAT heyətinin diqqətinə çatdırdı: “Bizim Gəncə şəhəri 2020-ci il oktyabrında düşmənlərimizin raket atəşlərinin hədəfinə çevrildi. Həmin dövrdə, ümumilikdə, Gəncəyə 13 raket atılıb, onlardan 5-i hərbçilərimiz tərəfindən sərrast atəşlə zərərsizləşdirilib, lakin, çox təəssüf ki, 8-i şəhərin müxtəlif məhəllələrinə düşərək partlayış törədib və dinc sakinlərimiz həlak olub. Ermənilərin cinayəti nəticəsində 26 mülki vətəndaşımız şəhid olub, onlardan 6-sı uşaqdır. 4 uşaq hər iki valideynini itirib. 3900-ə yaxın yaşayış və qeyri-yaşayış obyekti məhv edilib. Baş verənlər dövlətimizin və xalqımızın diqqət və qayğısından kənarda qalmayıb. Dağıntəlardan dərhal sonra Azərbaycan Prezidentinin sərəncamı ilə ayrılmış vəsait hesabına 89 ailə evlə təmin olunub, digər sakinlərin də mənzil problemlərinin həlli ilə bağlı müvafiq işlər intensiv şəkildə görülür. İkinci Qarabağ müharibəsində Gəncədən 118 nəfər şəhid olub, xeyli sayda yaralılarımız var. Onlar da diqqətdən kənarda qalmayıb, əksəriyyəti artıq sağalıb və digərlərinin də müalicələri davam etdirilir. Biz, şəhər rəhbərliyi şəhid ailələri ilə tez-tez görüşür, onların kədərini bölüşür, çalışırdıq ki, hər bər cəhətdən onlara həyan olaq. Biz şəhidlərimizlə əlaqədar “genceshehidləri.az” saytını yaratdıq və bütün məlumatları ictimailəşdirdik, şəhidlərimizin xatirəsinə həsr olunmuş iki kitab nəşr etdik”.
S.Tomuyev daha sonra bildirdi ki, dağılmış evlərin yerində memorial kompleks yaradılacaq. Heydər Əliyev prospekti ilə Ələsgər Rəfibəyli küçəsinin kəsişməsində tikiləcək kompleksin ərazisi təxminən 4 hektara yaxın olacaq.
Görüşdə belə bir ümumi rəy ifadə olundu ki, ümummilli məsələlərdə cəmiyyətlə hakimiyyət bir yerdə olmalıdır. Erməni quldurların Gəncəyə xaincəsinə hücumlarına görə yaşanan dəhşətlərin aradan qaldırılmasında xalqımızın və dövlətimizin sarsılmaz birliyi gücünü göstərdi. Təbii ki, bu hücumlar Ermənistan qoşunlarının zəifliyini, elə müharibənin ilk günlərindən artıq uduzacaqlarını bildiklərini sübut edən faktdır.
Şəhər icra hakimiyyətinin məsul işçisi Adil Tağıyev də bildirdi ki, qazilərin, şəhid ailələrinin sosial vəziyyətlərinin yaxşılaşdırılması Gəncə ŞİH -nin prioritet məsələsidir.
Şəhər ictimaiyyətinin, qazilərin, şəhid ailələrinin iştirakı ilə keçirilən toplantıda da gəncəlilər erməni vəhşiliyini şiddətlə qınadılar. QAT Gəncə şöbəsinin rəhbəri Mətləb Təhmasinin moderatorluğu ilə baş tutan toplantıda icra hakimiyyətinin “Vətən müharibəsi iştirakçıları və şəhid ailələri ilə işin təşkili” şöbəsnıni müdiri Ayxan Babayev, Gəncədən MM-in deputatı Müşfiq Cəfərovun köməkçisi Sahib Əmiraslanov, Azərbaycan Yazıçılar Birliyinin (AYB) Gəncə şəhər şöbəsinin rəhbəri Xəzangül Hüseynova, QAT Qadınlar Şurasının üzvü Yeganə Ələkbərova və başqaları iştirak edirdilər.
Çıxış edənlər Gəncə faciəsinin ermənilər tərəfindən insanlığa qarşı cinayət olduğunu yekdilliklə təsdiqlədilər və bildirdilər ki, bu qanlı hadisələr haqda faktların dünya miqyasında ictimailəşdirilməsi günümüzün aktual məsələsidir. Çünki, erməni faşizmi dincəlmək bilmir, xalqımıza, dövlətimizə qarşı iftiralar atmaqda davam edir, torpaqlarımızın işğalını, millətimizə qarşı soyqırımı törətmək üçün müxtəlif planlar qurur.
Xəzangül Hüseynova toplantıya əliəsalı gələn qaziyə xitabən dedi ki, hamı bu ağrı-acını çəkir, bu layihənin həyata keçirilməsi bizim gücümüzü-qüdrətimizi birə-beş artırır, yəni hamımız bir nəfər kimi bu işə öz töhfəmizi verməliyik:”İraq olsun, birdən hamımız əlimizə əsa alsaq, onda axırımız necə olar? Axı, ermənilərin çalışdıqları da budur!”
Sahib Əmiraslanov və Ayxan Babayev də tədbirin əhəmiyyətini yüksək qiymətləndirərək, bildirdilər ki, baş verənləri dünya ictimaiyyətinin nəzərinə çatdırmaq, onları erməni faşizminin təhlükəsinə inandırmaq çətin, ancaq mühüm işdir. Buna görə də bu işə ürəkdən qoşuluruq, sözlə, gözəl münasibətlə, faktları bildirməklə layihənin icrasında iştirak etməyə hazırıq.
Yeganə Ələkbərova çıxışında qeyd etdi ki, QAT-ın indi həyata keçirdiyi layihə xalqımızın 30 ildir apardığı mübarizənin davamıdır.
Toplantıda iştirak edən QAT Samux şöbəsinin sədri, qazi İlham Xəlilov, qazi anası Təranə Zeynalova, Vətən müharibəsinin iştirakçıları - ehtiyatda olan polkovnik Aydın Şıxəliyev, Gəncə Dövlət Dram Teatrının gənc aktyoru, qazi Şahmar Məmmədov, 2-ci qrup müharibə əlili Seymur Məmmədov, Elmir Verdiyev, Hüsniyyə Əsgərova və başqaları çıxış edərək fikirlərini bölüşdülər. Çıxışçılar erməni vəhşiliyini ifşa etməklə yanaşı erməni barbarlığına qarşı əlbir mübarizənin vacibliyini qeyd etdilər.
Gəncə faciələrinin tədqiqi göstərir ki, əhalinin sıx yaşadığı ərazilərə ermənilər tərəfindən atılan "Toçka-U", "Smerç", "Skad" və digər tipli dağıdıcı raketlərlə hücumun həyata keçirilməsi çoxlu sayda dinc insanın qətlə yetirilməsi məqsədini daşıyıb. Bu isə bir çox beynəlxalq hüquqi aktların kobud surətdə pozulması deməkdir. Bu sənədlər sırasında 1949-cu il 12 avqust tarixli Müharibə zamanı mülki şəxslərin müdafiəsinə dair dördüncü Cenevrə konvensiyası, 1974-cü il Qadın və uşaqların fövqəladə hallarda, silahlı münaqişələr dövründə müdafiəsi haqqında Bəyannamə, 1989-cu il Uşaq hüquqları haqqında konvensiyaya, 2000-ci il Silahlı münaqişələr dövründə uşaqların müdafiəsindən bəhs edən uşaq hüquqları haqqında konvensiyaya əlavə protokol, 1907-ci il Quru müharibəsi qanunları və adətləri haqqında Haaqa konvensiyası, 1977-ci il Beynəlxalq silahlı münaqişə qurbanlarının müdafiəsinə dair Cenevrə konvensiyalarına I əlavə protokolu və digərləri var.
Azərbaycan Respublikasının Qeyri-hökumət Təşkilatlarına Dövlət Dəstəyi Agentliyi tərəfindən maliyyələşdirilən və QAT-ın həyata keçirdiyi layihə üzrə toplanan faktlar beynəlxalq sənədlərə istinadən beynəlxalq aləmdə yayılacaq.
Baki-xeber.com
