İnsan sağlamlığı üçün qida təhlükəsizliyi əsas olsa da, təəssüflər olsun ki, yerli bazarda ziyanlı məhsullar satanlar az deyil. Mənşəyi bilinməyən ət və ət məhsullarının ayaq açıb yeriməsi həqiqətən də narahatlıq doğurur. İndiyə qədər tonlarla at, eşşək və ölmüş mal ətini bazara çıxarıblar.
Bildiyimiz kimi, dəfələrlə Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin əməkdaşları belə faktın qarşısını alıblar. Buna baxmayaraq, əhaliyə at əti və ölmüş mal əti satanlar yenidən fəallaşıblar. Ekspertlər hesab edir ki, Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin əməkdaşları bu sahədə ciddi mübarizə aparır, onların fəaliyyəti olmasaydı qida sahəsinə nəzarət edən qurumlar bu sahədə heç bir iş görə bilməzdilər. Bu gün də tonlarla yararsız at və ölmüş mal əti satışını həyata keçirənlər bunu nəzarətsizlikdən edirlər. İddialara görə, Azərbaycan Respublikası Qida Təhlükəsizliyi Agentliyi (AQTA) bu sahəyə ciddi nəzarət etmədiyi səbəbindən problem hələ də mövcuddur.
Sağlam Cəmiyyət Hərəkatının rəhbəri, sosioloq Elçin Bayramlı “Bakı-Xəbər”ə bildirdi ki, bu kimi hallar həmişə olub, bu gün də var: “Belə hallar həmişə var, heç vaxt da səngiməyib. Yalnız arada bir AQTA və BMCMİ-nin reydləri olanda bir neçə nəfər aşkar olunur cəzalandırılır, qalanları bir qədər kölgəyə çəkilirlər, sonra bu leş mafiyası yenidən fəaliyyətini davam etdirir. Bu işdə yaxşı qazanc var və bu sahəni heç vaxt boş buraxmazlar. Bu problemin bir tərəfi bu leş ətlərini satanlardırsa, digər tərəfi istehlakçıların özləridir. Hardan necə gəldi ət alanda, əlbəttə, onlara leş əti satacaqlar”. E.Bayramlının sözlərinə görə, qiymətin bir az ucuz olmasına aldanmaq lazım deyil, ət bazarında standart qiymətlər var, kimsə daha aşağı qiymətə satırsa bu şübhə doğrurur. “Əlbəttə, əgər heyvanı insanların gözünün qarşısında kəsib satmırlarsa. Qəssab dükanlarında belədir, adamlar görür necə heyvandır, necə kəsildi, necə doğrandı. Amma mağaza soyuducularında və bazar piştaxtalarında satılan ətin mənşəyi bilinmir. Belə ətlər zərərli bakteriya və mikroblarla zəngindir və təhlükəli xəstəliklər yaradır. Belə şəxslərə qarşı daha ciddi mübarizə aparılmalıdır. Lakin istehlakçılar bu işdə maraqlı deyillər, məsələn, belə faktlarla rastlaşanda müvafiq oqranlara xəbər vermirlər. Bizdə istehlakçı bilikləri, sosial məsuliyyət çox aşağıdır.
Ədalətli danışsaq, mənşəyi bilinməyən ətin istehlakı məsələsində günahın çoxu alıcıların üzərinə düşür. Heç kimə zorla nəsə satmırlar ki, alıcı haradan nə aldığını bilməlidir, yoxlamalıdır. Əgər heç kim şübhəli yerlərdən ət almasa belə ətlər satıla bilməz. Amma belə ətlrəin çoxu kafe və restoranlara, dönərxanalara verilir ki, orada yemək yeyənlər heç cür bilmirlər bu ətin mənşəyi nədir. Ona görə də evdən kənarda ət yeməkləri yemək məsləhət deyil.
Lakin kafe, restoran və yeməkxanalardakı vəziyyətə görə konkret AQTA günahkardır. Agentlik kəndlərdən sağlam heyvanlar gətirib hamının gözü qabağında kəsib təmiz şəraitdə satan qəssablarla mübarizə aparmaq əvəzinə belə hallarla mübarizə aparmalıdır. Mağazalardakı ətin mənşəyini, bazar piştaxtalarında qoyulmuş ətin mənşəyini, kafe, restoran və dönərxalanardakı ətin mənşəyini araşdırmalı və ciddi cəzalar tətbiq edilməlidir. Çünki bu sahədə əhaliyə qarşı açıq qida terroru gedir. Bu isə əhalinin həyatı, sağlamlığı üçün son dərəcə təhlükəlidir”- deyə E.Bayramlı qeyd etdi.
Əhaliyə at əti və ölmüş mal əti satanların yenidən fəallaşması məsələsinə və bu sahəyə hansı formada nəzarətin həyata keçirildiyinə, eləcə də mübarizə tədbirlərinə aydınlıq gətirməsi üçün AQTA-ya da sorğu göndərdik. Hələlik AQTA-dan sorğumuza cavab verilməyib. Qurumun mövqeyini də də çap edəcəyik.
İradə SARIYEVA
