Lənkəranda Zərifə Əliyeva, Koroğlu, K.Kazımov, Həzi Aslanov, M.Ağayev və daha bir neçə küçədə çirkab su arxlarda yığılıb qalıb. Həmin arxların yaxınlığında yaşayan insanlar üfunət iyindən evdə otura bilmədiklərini deyir. Sakinlərin dediyinə görə, son vaxtlar arxlarda təmizlik işləri aparılmadığından şəhərin mərkəzi, necə deyərlər, iylənir.
Şəhər sakini Arzu Nəbiyeva bildirdi ki, Lənkəran ötən il UNESCO-nun Yaradıcı Şəhərlər Şəbəkəsi siyahısına salınıb: “Ancaq deyəsən bu şəhəri o siyahıya salanlar şəhərin mərkəzindəki üfunətli arxlardan xəbərsiz olublar. Zibil qalıqları, ətraf həyətlərdən, məişət obyektlərindən axıdılan çirkab sular bu arxlara yığılır. Arxlar zəhərli həşəratlarla, qurd-quşla doludur. İydən arxların yanından keçmək olmur. Bura şəhərin mərkəzidir, indi görün bir az kənar küçələrdə nə baş verir”.
Sakinlərin bildirdiyinə görə, arxların dolmasının əsas səbəbi kanalizasiya sisteminin olmamasıdır: “Kanalizasiyamız yoxdur. Ayaqyolu anbarı var. Dolandan sonra maşına 50-60 manat veririk, çirkabı daşıyır. Şəhər küçələrinin kənarlarında arxlar var, qalan sular da oraya axıdılır. Bu arxlar 50-60-cı illərdə qurulub. İldə 1-2 dəfə təmizləyirlər ki, çirkab axsın. Ona görə də hər yerdə üfunət qoxur. Küçələrin hər iki tərəfindən axan çirkab suların yaratdığı qoxu və görüntü azmış kimi, yağışlı havalarda arxlar dolaraq daşır”.
Lənkəran Şəhər İcra Hakimiyyəti: “Aidiyyəti idarə vaxtaşırı şəhər mərkəzindəki arxlarda təmizlik işləri aparır”
Məsələ ilə bağlı Lənkəran Şəhər İcra Hakimiyyətindən bildirildi ki, aidiyyəti idarə vaxtaşırı şəhər mərkəzindəki arxlarda təmizlik işləri aparılır: “Ancaq vətəndaşlar təmizliyə riayət etmirlər, nəticədə arxlarda zibillik yaranır. O üfunəti yaradan səbəb də həmin zibillərdir. Yeyib yarımçıq saxladıqlarından tutmuş içki şüşəsinədək, siqaret qutusunadək atırlar. Üstəlik, çirkab sularını da arxlara axıdırlar”.
Flora Hacıyeva: “Çirkab sular torpağın eroziyasına və içməli suyun kimyəvi maddələrin təsirindən çirklənməsinə şərait yaradır”
Ekoloq Flora Hacıyeva bildirdi ki, çirkab sular torpağın eroziyasına və içməli suyun kimyəvi maddələrin təsirindən çirklənməsinə şərait yaradır: “Kanalizasiya sistemi olmayan ərazilərə verilən suyun bir çıxacaq yeri də olmalıdır. Hamıya elə gəlir ki, torpaq suyu birdəfəlik udur. Belə deyil axı. Torpağa axıdılan sular hardansa qayıdıb üzə çıxmalıdır. Bakının bir sıra rayonlarında çökək ərazilər var ki, digər yerlərin suları da ora axır. Sabunçu, Suraxanı və sair. Təbii maililik nəticəsində quyulara axıdılan sular bu ərazilərdə toplanır, bir qədər yağış yağan kimi üzə çıxır. Yaxud da torpağın alt qatlarını aşındırır, üst hissədə ağırlıq artan kimi sürüşmə baş verir”.
Günel CƏLİLOVA
