Azərbaycan Milli Elmlər Akademiyası (AMEA) ətrafında ajiotaj bitmək bilmir. Hər gün bu qurum barədə bir məlumat açıqlanır. Son günlər ən çox müzakirə olunan məsələlərdən biri Ramiz Mehdiyevin istefasından sonra AMEA-ya kimin rəhbərlik edəcəyidir. Deyək ki, prezidentlik postuna iddialı olan bir neçə nüfuzlu akademikin adı çəkilir. Yayılan məlumata görə, fevralın 19-da AMEA ümumi yığıncağı keçiriləcək. Ümumi yığıncaqda Akademiyaya yeni prezident seçiləcək.
AMEA prezidenti postuna Akademiyanın birinci vitse-prezidenti Arif Həşimovun namizəd olması ehtimal edilir. Yazılanlara görə, artıq AMEA-da təhvil-təslim prosesi də başlayıb.
Digər variantlara görə isə, AMEA postina iki əsas namizəd var və akademiya əməkdaşları onların prezident olmaq üçün daha çox şansları olduğunu deyir. Əldə etdiyimiz məlumata görə, seçkilərdə namizəd olacaq şəxslərdən biri Qara dəniz Əməkdaşlıq Təşkilatının Parlament Məclisinin Baş katibi, AMEA-nın akademiki, Ümumdünya Elmlər Akademiyasının üzvü Asəf Haciyev, digəri isə texnika elmləri doktoru, professor, AMEA-nın həqiqi üzvü, AMEA-nın vitse-pezidenti, AMEA-nın İnformasiya Texnologiyaları İnstitutunun baş direktoru Rasim Əlquliyevdir. Hər iki nüfuzlu akademikin AMEA prezidenti postuna iddialı olduğu deyilir və onların da seçkidə iştirakı gözlənilir. Bütün hallarda akdemiya əməkdaşları hesab edir ki, onların hər ikisi layiqli namizəddir və AMEA-nı xilas edə bilərlər.
AMEA-dakı mənbələrimizdən əldə etdiyimiz məlumata görə, fevralın 19-da keçiriləcək ümumi yığıncaqda prezident seçkisi keçirilməyəcək, ümumi yığıncaq prezidenti əvəz edəcək şəxşi seçəcək. Mənbənin məlumatına görə, ehtimal ki, AMEA-nın yekun iclası apreldə olacaq və orada akademiya prezidenti seçiləcək.
“Arif Həşimov AMEA prezidenti postuna uğurlu namizəd ola bilər”
Fəlsəfə doktoru, Azərbaycan Gənc Alim, Doktorant və Magistrlər Cəmiyyətinin sədri İlqar Orucov “Bakı-Xəbər”ə bildirdi ki, fevralın 19-da AMEA-nın ümumi yığıncağının keçirilməsi barədə məlumat feyk məlumata bənzəyir, çünki bu, reallıqda mümkünsüz görünür. “Məndə olan məlumata görə, fevralın 19-da AMEA-nın ümumi yığıncağının keçirilməsi barədə xəbər reallığı əks etdirmir. Çünki fevralın 19-u şənbə gününə düşür. Bu baxımdan düşünürəm ki, həftənin şənbə günü AMEA-nın ümumi yığıncağının tez-tələsik keçirilməsinə zərurət yoxdur. İclası gələn həftənin başqa günləri də keçirmək olar. Bəlkə də fevralın 19-da iclas ola bilər. Amma hesab etmirəm ki, fevralın 19-da seçki keçiriləcək. Çünki seçki keçirilirsə onun yeri və vaxtı barədə AMEA üzvlərinə məlumat verilməlidir. Akademiyanın xeyli sayda müxbir və həqiqi üzvləri var, AMEA-nın tərkibi müxbir və həqiqi üzvlərdən ibarətdir. Ümumiyyətlə, səhv etmirəmsə, aprel ayının sonuncu həftəsinin 3-cü günü AMEA-nın illik yığıncağının keçirilmə zamanıdır. Bu, nizamnamədə də yazılır. Təbii ki, ümumi yığıncaq fövqalədə də keçirilə bilər, bu da istisna deyil. AMEA-ya kimin rəhbərlik edəcəyi məsələsinə gəlincə, təbii, akademiyanın prezidenti yoxdursa avtomatik olaraq rəhbərlik birinci vitse-prezidentə keçir, prezident səlahiyyətlərini o icra edir. AMEA-nın birinci vitse-prezidenti vəzifəsi də Rəyasət Heyətinin qərarı ilə Arif müəllim Həşimova həvalə olunub. Belə məqamda, təbii ki, rəhbərlik birinci vitse-prezidentə keçir. Ramiz Mehdiyev istefa ərizəsi verib, bildiyim qədər hələ ki, onun istefa ərizəsi qəbul olunmayıb. Bu, cənab Prezidentin səlahiyyətində olan məsələdir və təbii ki, buna heç kəs qarışa bilməz. Bu baxımdan, akademiya prezidentinin səlahiyyətlərinə xitam verildikdən və cənab Prezidentin Sərəncamı ilə o vəzifədən kənarlaşdırıldıqdan sonra artıq birinci vitse-prezident onun səlahiyyətlərini icra edəcək. Qeyd etdiyim kimi, birinci vitse-prezident də akademik Arif Həşimovdur. O ki qaldı adları çəkilən namizədlərə, mən uzun illərdir Arif Həşimovu tanıyıram. Akademiyanın vitse-prezidenti vəzifəsində olub, zamanında onunla bərabər işləmişik, peşəkar bir insandır. Eyni zamanda Arif müəllim dövlətçi bir şəxsdir. Mən sözün həqiqi mənasında Arif müəllimin akademiyanın prezidenti olmasına çox sevinərdim. Çünki bəzi söz-söhbətlər formalaşır ki, akademiyanın prezidenti gənc olmalıdır, akademiyanın idarəetməsi gəncləşməlidir. Arif müəllimin 72 yaşı var və həyatının çox böyük hissəsi akademiya ilə bağlı olub, bütün prosesləri bilən adamdır, işlərin içində olub, idarəetməni yaxşı bilir. Ona görə də, düşünürəm ki, Arif Həşimov AMEA prezidenti postuna uğurlu namizəd ola bilər. O, dəqiq elmlər sahəsində mütəxəssisdir, fizikdir, bütövlükdə çox uğurlu kadrdır.
Əslində hesab edirəm ki, AMEA-nın prezidentinin, tutalım, 35 yaşında bir şəxs olması hər halda düzgün deyil. Akademiya prezidenti oturuşmuş adam olmalıdır. Ramiz Mehdiyev kimi 84 yaşında yox təbii ki...Burada söhbət Ramiz Mehdiyevin fiziki yaşından getmir, onun intriqabaz, bu kimi məsələlərlə məşğul olmasından gedir. Bu baxımdan hesab edirəm, akademiyanın rəhbəri Azərbaycan elminin gələcəyini düşünən adam olmalıdır”. İ.Orucovun sözlərinə görə, o da elmin içində olan adam olmalıdır. O hesab edir ki, bu nöqteyi-nəzərdən A.Həşimov yaxşı namizəddir.
Amma burada incə bir məqam var, söhbət kimin prezident olmağından getmir, əsas məsələ bu sistemin mexanizmlərinin hazırlanmasıdır. O qeyd edir ki, vacib idarəçilik mexanizmi olmadan, AMEA-ya kimin rəhbərlik etməsindən asılı olmayaraq idarəçilik alınmayacaq. O qeyd edir ki, AMEA-da ciddi yeniliklər, islahatlar aparılması, nailiyyətlər əldə edilməsi üçün mexanizm dəyişdirilməlidir.
İradə SARIYEVA
