AĞ Partiya başqanı Tural Abbaslı koronavirusa yoluxub. Bu barədə onun özü məlumat verib. Sədr bildirib ki, ayrı-ayrı iki yerdə analiz verib: "Analizin cavabı birində pozitiv, ikincisində isə neqativ oldu. Analizlər müxtəlif nəticələr ortaya qoydu. Yəqin bu sahədə də problemlər var ki, nəticələr belə çıxdı. Dünya vaksinasiyanın nəticələrini müzakirə edir, bizsə hələ doğru-düzgün diaqnoz qoyub xəstəliyi təsbit edə bilmirik. Biz hələ xəstəliyin müəyyən edilməsi mərhələsində ilişib qalmışıq".
Doğrudan da maraqlıdır, çox baha qiymətə bu testləri edən klinikalar niyə diaqnozları məsuliyyətlə qoymur? Nəzərə alsaq ki, səhv diaqnoz sarsıntı və əlavə xərclərin ortaya çıxması deməkdir. Tural Abbaslı publik şəxs olduğu üçün problemi ictimailəşdirə bilib. İndi görün nə qədər sadə vətəndaşlar belə səhv diaqnozların qoyulmasından əziyyət çəkir. Səhv diaqnozun qoyulmasına görə klinikaların məsuliyyəti necə müəyyən edilməlidir?
Elnarə Baxış: “Digər səbəb ikinci dəfə materialın düzgün götürülməməsi ola bilər”
Tibbi Ərazi Bölmələrini İdarəetmə Birliyi (TƏBİB) Ağ Partiyanın rəhbəri Tural Abbaslının koronavirus testinin nəticəsinin pozitiv və sonradan neqativ çıxması ilə bağlı səsləndirdiyi iradlara münasibət bildirib. TƏBİB-in İctimaiyyətlə əlaqələr və marketinq şöbəsinin əməkdaşı Elnarə Baxış qeyd edib ki, bu gün insanların ən çox rastlaşdığı hal pozitiv çıxan test nəticəsinin sonrakı gündə neqativ çıxmasıdır. Onun sözlərinə görə, bu kimi hallarla bütün dünyada qarşılaşmaq mümkündür: “TƏBİB olaraq dəfələrlə bunun izahı verilib və yenidən izah etməyi özümüzə borc bilirik. Əsas səbəblərdən biri o ola bilər ki, xəstəliyin bəzi mərhələlərində proses artıq yuxarı tənəffüs yollarında silinir və aşağı tənəffüs yollarına keçir. Digər səbəb ikinci dəfə materialın düzgün götürülməməsi ola bilər. Yəni yaxma daha dərindən, udlaqdan götürülməlidir. Siyahını daha da uzada bilərik. Belə hallara Ümumdünya Səhiyyə Təşkilatının və digər tibbi qurumların tövsiyəsi ondan ibarətdir ki, şəxs test nəticəsi pozitiv çıxandan sonra 14 günlük izolyasiya tədbirinə getməlidir. Bu, həm virusa yoluxan şəxsin, həm də ətrafdakı insanların təhlükəsizliyi və sağlamlığı üçün vacibdir”.
Pərvanə Vəliyeva: “Vətəndaş çalışmalıdır ki, ekspress deyil, normal testlərdən keçsin”
“Sağlamlığa Xidmət” İctimai Birliyinin icraçı direktoru Pərvanə Vəliyevanın sözlərinə görə, bu xəstəliklə bağlı qoyulan diaqnozu digərləri ilə müqayisə etmək olmaz: “Təbiidir ki, hər bir klinika qoyduğu diaqnoza görə məsuliyyət daşımalıdır. Ancaq koronavirusla bağlı testlərdə klinikalar daha çox “Rapid” testlərdən istifadə edir. Bunlar sürətli ekspress testlərdi ki, dəqiqlikləri 75 faizdir. PCR testləri isə aydın göstərə bilir. Bir də virusun aktiv olduğu dönəmin də burda rolu var. Başqasından yoluxan adamda ilk iki gündə neqativ göstərir. Amma proses inkubasiya dönəminə düşürsə, virus boğazdan enir ağ çiyərə. Onda test pozitiv göstərə bilir. Analiz üçün materialın düzgün götürülməsinin də bu məsələdə böyük rolu var. Hətta labarotoriyaya vaxtında çatdırılmayan testlər belə səhv çıxa bilər. Buna görə də vətəndaş çalışmalıdır ki, ekspress deyil, normal testlərdən keçsin. Əgər testlərlə bağlı anlaşılmazlığı tam aradan qaldırmaq istənilirsə, kompüter tomoqrafiyasından istifadə olunmalıdır”.
Məhəmmədəli QƏRİBLİ
