Bu gün himenoplastika əməliyyatı (qızlıq pərdəsinin bərpası) ölkə gündəminin əsas müzakirə mövzusuna çevrilib. Müəyyən səbəblərdən evlənməzdən öncə bakirəliyini itirən qızlar çarəni cərrahi yolla bərpa etməkdə axtarırlar.
Qeyd edək ki,Azərbaycanda bakirəliyin bərpa olunması qanunla qadağan olunsa da, bəzi özəl klinikalarda bu prosedur həyata keçirilir. Qiyməti isə heç də ucuz deyil. Belə ki, əməliyyatın qiyməti 600 manatdan 1500 manata qədərdir. Məbləğ əməliyyatın toydan neçə gün əvvəl keçirilməsindən asılıdır.
Qanunla qeyd edilən prosedurun həyata keçirilməsi qadağan olunsa da, bu əməliyyatı edən həkimlər kifayət qədərdir. Azərbaycanda açıq şəkildə sosial şəbəkələr üzərindən özəl klinika cərrahları tərəfindən bu əməliyyata onlayn müştəri yığılır. Elan verən həkimlər kimi, müştəri sayı da çoxdur. Əməliyyatla bağlı çağırış və tələblər son 5 ildə daha aktivləşib. Buna qədər isə ölkəmizdə hər kəs bu əməliyyatdan xəbərsiz idi.
Maraqlı məqam ondan ibarətdir ki, onlayn şəkildə bakirəliyin bərpası ilə bağlı elan paylaşanların nə kimi cinayət törətdiklərindən xəbərləri varmı? Bu işi edən həkimlər cinayət məsuliyyətinə cəlb oluna bilərmi?
Əsabəli Mustafayev: “Əməliyyat üçün müştəri yığan həkimlərə vəzifə səlahiyyətlərini aşma, insanın həyatını təhlükədə qoyma və sair normaları tətbiq etmək olar”
Vəkillər Kollegiyasının üzvü Əsabəli Mustafayevin sözlərinə görə, bu əməliyyat Səhiyyə Nazirliyi tərəfindən qadağan olunubsa, mülkiyyət formasından və tabeliyindən asılı olmayaraq, hamısına şamil olunmalıdır: “Bəzi klinikalar o qədər harınlaşıblar ki, bunu reklam da edirlər, daha gizlətmirlər. Aidiyyəti qurumlar bu məsələni araşdırmalı və hüquqi qiymət verməlidirlər. Onu da qeyd edim ki, qanunda himenoplastika əməliyyatını edənlərlə bağlı məsuliyyət yoxdur. Amma araşdırmanın nəticəsinə uyğun olaraq, əməliyyat üçün müştəri yığan həkimlərə vəzifə səlahiyyətlərini aşma, insanın həyatını təhlükədə qoyma və s. normaları tətbiq etmək olar. Ola bilsin ki, belə elanlar yenidir. Praktikada bu əməllər olmayıb. Ona görə istintaqın hansı normanı seçəcəyini demək çətindir”.
Pərvanə Mustafayeva: “Bakirəliyin bərpası qanunvericilik tərəfindən qadağan edilir, onu edənlər cinayət məsuliyyətinə cəlb olunmalıdırlar”
Ginekoloq-həkim Pərvanə Mustafayeva bildirdi ki, bakirəliyin bərpası qanunla qadağandır: “Rəsmi olaraq bakirəliyin bərpası qanunvericilik tərəfindən qadağan edilir. Onu edən həkimlər cinayət məsuliyyətinə cəlb olunmalıdırlar. Bu cinayətdir, qanunvericiliyə ziddir. Ümumiyyətlə, bu tip reklamlar, elanlar yolverilməzdir və qanunsuzdur. Onun reklamını ictimailəşdirənlər də ciddi nəzarətdən keçməlidirlər”.
Günel CƏLİLOVA
