Ayrı-ayrı sahibkarlardan gələn məlumatlara görə, AQTA rəhbərliyi xüsusi karantin şərtlərini özü “kəşf” edərək restoranlarda tətbiq etməyə başlayıb. Belə ki, Nazirlər Kabineti yanında Operativ Qərargah tərəfindən təsdiqlənməyən, ictimaiyyətə, iş adamlarına elan olunmayan “qaydalar” AQTA-nın timsalında həyata keçirilir.
Bu da pandemiya səbəbindən onsuz da işləri zəifləyən, sərt karantin dövründə kifayət qədər iqtisadi zərbələr alan sahibkarların narazılığına gətirib çıxarır. Obyekt sahiblərinin sözlərinə görə, AQTA əməkdaşları karantin “ovuna” çıxaraq ayrı-ayrı restoranların mətbəxlərində koronavirusa qarşı “mübarizə” aparırlar. Belə ki, Q.Təhməzlinin nümayəndələri restoranların mətbəxlərinə qəfil hücum edərək, “əməliyyat” nəticəsində ya tibbi maskası nisbətən aşağı olan aşpazları, ya başında papaq olmayan işçiləri cərimələyir, ya da ara məsafənin gözlənilməsi ilə bağlı özündən əndrabadi qərarlar çıxarır. Məsələn, AQTA əməkdaşları yoxlama apardıqları restoranlarda tələb qoyurlar ki, 4 kvadratmetrlik yerdə 3 nəfərdən artıq şəxs ola bilməz, yaxud 2000 kv-metrlik məkanda 50 nəfərdən çox insan qəbul edilə bilməz.
Sahibkarlar ölkə rəhbərliyinə şikayət edirlər ki, AQTA rəhbərliyi bu rəqəmləri özündən çıxarıb, heç bir təlimat kitabçasında, yaxud Operativ Qərargahın məlumatında belə tələblər yoxdur. Üstəlik, qurum əməkdaşları ilk növbədə obyekt sahiblərini qabaqcadan məlumatlandırmalı, ən azı qaydalarla tanış etməlidirlər. Kafe sahibləri deyirlər ki, gözlənilmədən AQTA işçiləri mətbəxə daxil olur, yoxlama aparır, hansısa aşpazı əlcəksiz və ya maskasını çənəsinə bir qədər düşmüş aşkarladısa, obyekti böyük məbləğdə cərimələyir. Kafe, restoran sahibləri deyir ki, belə “əməliyyatlar” yalnız qıraqda-bucaqda olan, özünü zorla saxlayan obyektlərə edilir. Şəhərin tanınmış brend restoranlarına isə “gözün üstə qaşın var” deyən yoxdur. Biz doğrudan da “Mado”, “Cafe City” və digər brend restoranlarda oturmağa yerin belə olmadığını müşahidə edirik. O halda AQTA-nın bu ayrıseçkiliyinin kökündə nələr dayanır?
AQTA-nın şöbə müdiri Mansur Piriyev “Bakı-Xəbər”ə açıqlamasında bildirdi ki, bu cür məlumatların yayılması əsassızdır: “Biz qurum olaraq fəaliyyətimizdə qanunvericiliyin tələblərinə tam riayət edirik. Sizin toxunduğunuz mövzuya tam aydınlıq gətirmək üçün, xahiş edərdim ki, bizim qurumun rəsmi saytına daxil olub məlumatlarla yaxından tanış olasınız. Biz orada hansı restoran və ya kafelərdə reydlərin aparıldığı və görülən tədbirlər barədə ətraflı məlumat veririk. Siyahı ilə tanış olsanız görəcəksiniz ki, heç bir ayrıseçkiliyə yol verilmir. Bizim qurumun reyd keçirərək cərimələdiyi restoran və kafelərin sırasında tanınmış bredlərin də adına rast gələcəksiniz. Bizim təqdim etdiyimiz siyahını hansısa media qurumları özləri istədikləri kimi xəbərə çevirirlərsə, bu bizə aid məsələ deyil. Bir çox hallarda xəbər təqdimatında hansısa restoranın adı başlığa çıxarılır və bu da müəyyən çaşqınlıq yaradır. Reydlər mütəxəssislərimizdən ibarət monitorinq qrupları tərəfindən həyata keçirilir. Belə qruplar bütün ölkənin rayonları üzrə yaradılıb. Eyni zamanda bizim qaynar xəttimiz mövcuddur. Ora pandemiya qaydalarının pozulması ilə bağlı çoxsaylı şikayətlər daxil olur. Həmin siqnallara uyğun da reydlər təşkil edirik. Hansısa kafe və ya restoran pandemiya qaydalarına riayət etmədiyi üçün cərimələnibsə, təbiidir ki, qurumdan razı qalmayacaq. Ancaq hamılıqla çalışmalıyıq ki, qaydalara əməl edək”.
Məhəmmədəli QƏRİBLİ
