Ramazan ayı başlayandan bir sıra kafe və restoranlar iş qrafikində dəyişiklik ediblər. Məsələ ondadır ki, paytaxtda bəzi restoranlar iftar vaxtına qədər müştəri qəbulunu dayandırıblar. Bir sıra restoran sahibləri bunu gündüz saatlarında işləməyin onlara sərf etmədiyi ilə əlaqələndirirlər.
İddia edirlər ki, gündüz vaxtı gələnlərin sayı elə də çox olmadığından, axşam işləmək daha sərfəlidir. Ramazan ayı ilə əlaqədar gündüz kafe və restoranlara gələnlərin sayı elə də çox olmur. Axşam saatlarında isə iftara görə daha çox müştəri olur. Nəticədə bu cür rejimdə işləmək daha sərfəlidir, nəinki gündüz fəaliyyət göstərmək.
Ancaq problem ondadır ki, bu səbəbdən oruc tutmayan şəxslər də axşamlar kafe və restoranlara gedirlər. Nəticədə sözügedən xidmət sahələrində sıxlıq artır və bu da virusun yayılma təhlükəsini yüksəldir. Zatən, son günlər yoluxanların sayında ciddi artım var. Söhbət gündəlik olaraq virusa yoluxanların sayında müşahidə edilən artımdan gedir. Bu tərəfdən də restoranların belə iş qrafiki yoluxmanın artması üçün çox əlverişli zəmin yaradır.
“Bunun nəticəsində restoranlarda sıxlıq artacaq və bu da daha çox insanın virusa yoluxmasına şərait yaradacaq”
Məsələyə münasibət bildirən tanınmış həkim Aydın Əliyevin sözlərinə görə, kafe və restoranların bu cür rejimdə işləməsi çox təhlükəlidir: “Bunun nəticəsində restoranlarda sıxlıq artacaq və bu da daha çox insanın virusa yoluxmasına şərait yaradacaq. Ona görə də bu amil mütləq nəzərə alınmalıdır. Çünki bu, normal iş rejimi deyil. Bu gün dünyada bir nömrəli məsələ virusdan qorunmaqdır. Qorunmağın da iki yolu var. Təmas az olmalıdır və gigeyenik qaydalara əməl etmək. Pandemiya dünyaya yayılanda bunun sonu olan iki dövr var. Birinci dövr təbii dövrdür. Bu o deməkdir ki, heç bir karantin rejimi tətbiq olunmur, qayda-qanuna riayət olunmur və s. Təbiət özü seçir. Yəni kimin bədəni güclüdürsə qalır, kim zəifdirsə həyatdan gedir. Təbii ki, bununla razılaşmaq olmaz. O zaman səhiyyə sistemi nə deyirsə, insanlar onu etməlidirlər. Qalan məsələlər hökumətin işidir. Bir də biz vətəndaşların qayda-qanunlara nə qədər riayət etməyimizdən çox şey asılıdır. Başqa bir tərəfdən, insanların immun sistemi nə qədər güclü olarsa, bir o qədər qorunmaq asan olacaq. Kafelər təmasların artmasına, bu isə pandemiyanın yayılmasına şərait yaradır. Ona görə də həmin xidmət sahələrinin yalnız gecə işləməsi təhlükəlidir”.
Həkim hesab edir ki, vətəndaşlar özlərini qorumalıdırlar.
Vidadi ORDAHALLI
