Ölkə başçısının müvafiq sərəncamına əsasən, əhalinin mərhələli şəkildə icbari tibbi sığorta sisteminə keçidi təmin olunur. Bu o deməkdir ki, hər bir sakin dövlət səhiyyə müəssisələrində müayinə və müalicə prosedurundan pulsuz yararlanmalıdır.
Ancaq bu hal, deyəsən, Göyçay Rayon Mərkəzi Xəstəxanasına şamil edilmir. Rayon sakinlərinin məlumatına görə, xəstəxanaya müraciət edən zaman bəzi həkimlər tərəfindən aparılması lazım olan müayinələr adıçəkilən bölgədə fəaliyyət göstərən özəl Bioloji Klinikaya yönləndirilir.
Sakinlər onu da qeyd edirlər ki, Rayon Mərkəzi Xəstəxanasında həkimlər tibbi aparatların düzgün işləmədiyini bəhanə edərək, xəstələri özəl tibb klinikasına göndərirlər. Xəstə özəl tibb müəssisəsində UZİ-dən keçməsə, eyni zamanda, analizləri də həmin klinikada verməsə, həkim xəstələrə müalicə yazmır. Son zamanlar Bioloji Klinikaya göndərişlərin sayı artdığı üçün həmin özəl klinika da vəziyyədən istifadə edərək qiymətləri qaldırıb.
Onu da qeyd edək ki, özəl klinikaya daha çox ginekologiya şöbəsinin xəstələri göndərilir. Hamilə qadınlar qan analizi verilməsi üçün adıçəkilən özəl klinikanın laboratoriya şöbəsinə göndərilirlər. Özəl klinikada isə istənilən analizin qiyməti 55 manatdır. Təbii ki, bu da vətəndaşların büdcəsinə uyğun deyil.
Göyçay Rayon Mərkəzi Xəstəxanası - Elçin Bilalov: “...heç bir aidiyyəti yoxdur”
Göyçay Rayon Mərkəzi Xəstəxanasının baş direktoru Elçin Bilalov qeyd etdi ki, məsələnin onlara heç bir aidiyyəti yoxdur.
TƏBİB – Elnarə Baxış: “Məsələ ilə bağlı araşdırma aparıldıqdan sonra məlumat veriləcək”
Tibbi Ərazi Bölmələrini İdarəetmə Birliyinin (TƏBİB) İctimaiyyətlə əlaqələr və marketinq şöbəsinin əməkdaşı Elnarə Baxış bildirdi ki, məsələ ilə bağlı araşdırma aparıldıqdan sonra məlumat veriləcək.
Günel CƏLİLOVA
