Bir neçə gün əvvəl Türkan Quliyeva adlı sosial şəbəkə istifadəçisi “Kapital Bank”ın vətəndaşa münasibəti barədə “Facebook”da paylaşım edərək narazılığını dilə gətirib.
Xanım yazaraq qeyd edib ki, bankın Yasamal filialında onun onkoloji xəstə olan valideyninin kartı yenilənməyib, səbəb olaraq isə xərçəng xəstəsi olması göstərilib: “Mən “Kapital Bank”ın biabırçı xidməti barədə sizə məlumat vermək istəyirəm və köməyinizi xahiş edirəm. “Kapital Bank” bu gün kart yenilənməsi ilə bağlı bankın Yasamal filialına yaxınlaşan anama bütün bank şərtlərini ödəməyinə baxmayaraq, kart təhvil verilmədikdən əvvəl “siz xərçəng xəstəsisiniz, sizin kartınızı yeniləyə bilmərik.”, – deyərək kartı yeniləməkdən imtina edib”.
T.Quliyeva yaranmış problem səbəbilə özünün də bankla əlaqə saxladığını, lakin qurumun şikayəti əsassız hesab etdiyini diqqətə çatdırıb: “Maddi faktorlar bir kənara, onsuz da xərçəngdən əziyyət çəkən birinə bunu demək hansı professionallığa, hansı insanlığa sığır? Mən bu barədə kimə, necə şikayət edə bilərəm? Bank şikayətimi əsassız hesab edir”.
Maraqlıdır, xəstəlik daşıyıcısı olan şəxsə niyə kredit və ya bank kartı verilmir?
“Kapital Bank” - Pərviz Sədrəddinov: “Məsələ ilə bağlı artıq ətraflı araşdırma aparılır və müraciət edən şəxsə nəticə haqqında məlumat təqdim olunacaq”
“Kapital Bank”ın İctimaiyyətlə əlaqələr şöbəsinin rəisi Pərviz Sədrəddinov bildirdi ki, məsələ ilə bağlı artıq ətraflı araşdırma aparılır və müraciət edən şəxsə nəticə haqqında məlumat təqdim olunacaq: “Müştəri məlumatlarının konfidensiallığı qaydalarına uyğun olaraq, müştərinin şəxsi məlumatları yalnız onun özünə təqdim edilə bilər. Müştəri uyğun bilərsə, nəticə barədə məlumatı özü ictimaiyyətə təqdim edə bilər”.
Əkrəm Həsənov: “Qanunvericiliyə əsasən, kredit üçün müraciət edən şəxs meyarlara uyğundursa, ona kredit verilə bilər, onun hər hansı xəstəlik daşıyıcısı olub-olmadığı önəmli deyil”
Bank sahəsi üzrə ekspert Əkrəm Həsənov qeyd etdi ki, qanunvericiliyə əsasən, kredit üçün müraciət edən şəxs meyarlara uyğundursa, ona kredit verilə bilər, onun hər hansı xəstəlik daşıyıcısı olub-olmadığı önəmli deyil: “Ancaq onu da nəzərə almaq lazımdır ki, banklar öz mənfəətini düşünərək kredit verməyə bilər. Məlumdur ki, bank əmanətçilərin pulunu kredit şəklində verir. Bank əmanətçilərin pulunu geri qaytarmaq üçün risqləri nəzərə alır. Bu baxımdan öz daxili qaydalarını müəyyən edərək, risqi nəzərə alaraq, kredit verməyə bilər.
Həmçinin, nəzərə almaq lazımdır ki, onkoloji xəstəliklər təhlükəli xəstəliklər kateqoriyasına şamil edilir. O da bəllidir ki, bu xəstəliklərin müalicəsi üçün tələb olunan dərmanların satış qiyməti də bahadır. Ola bilər ki, şəxs dərmanlarını ala bilmək məqsədilə banka kredit üçün müraciət edib. Lakin bank əməkdaşı ona yardım etməyib. Qeyd etdiyim kimi, bank risqləri nəzərə alaraq kredit verməyə bilər. Bu, bankın daxili siyasətidir. Ancaq bank işçisinin kobud şəkildə vətəndaşa xərçəng xəstəsi olduğu üçün ona kredit verilmir deməsi düzgün deyil”
Günel CƏLİLOVA
