Kütləvi Ramazan mərasimləri üzərindən qadağalar ortadan götürülsə... Müsəlman ölkələrinin çətin, lakin zəruri qərarları...

Dəyanət Osmanlı: “Ramazan ayında kütləvi mərasimlərin, iftar məclislərinin təşkil edilməsi güclü yoluxmaya yol aça bilər”

img

İki ildir ki, Ramazan ayı pandemiya ilə müşayiət olunur. Bildiyimiz kimi, Ramazan ayı özünün ənənəvi kütləvi tədbirləri ilə zəngin olub, amma koronavirus pandemiyası ilə əlaqədar, demək olar ki, bütün müsəlman ölkələrində kütləvi tədbirlərin keçirilməsi qadağan edilib.

Əlbəttə, düzgün qəbul edilən bu qərarın bu Ramazanda da qüvvədə qalması müsbət haldır, o baxımdan ki, pandemiyanın yayılma risqini azaldır.  Ramazan ayında insanların bir yerə toplanması, kütləvi şəkildə iftar məclislərində iştirakı, get-gəllər şübhəsiz ki, pandemiyanın artma həlqəsini daha da genişləndirmiş olar. Bu baxımdan iftar məclislərinin və digər bu kimi yığıncaqların keçirilməsi qəbuledilməzdir. Pandemiya şəraitində, virusun tüğyan etdiyi bir vaxtda bu cür tədbirlərdən imtina etmək ən optimal yoldur. Onsuz da ürəyində rəhm və Allah sevgisi olanlar öz nəzir-niyazlarını verirlər, yaxşılıqlarından qalmırlar. 

Bəziləri hesab edirlər ki, Ramazan ayında iftar məclislərinə icazə verilməli, insanlar bir-birini iftar süfrəsinə dəvət etməlidirlər. Onu da deyək ki, iftar məclislərinə gəlib-gedənlərin sayına nəzarət etmək mümkünsüz bir haldır.

Ekspertlər deyirlər ki, bütün müsəlman ölkələrində Ramazan ayında pandemiya ilə bağlı qadağalar mövcuddur. Onların sözlərinə görə, hansı müsəlman ölkəsində ki, keçən il Ramazan ayında pandemiya ilə bağlı qadağalar yumşaldılıb, yaxud götürülüb, həmin ölkədə yoluxma halları çoxalıb.

Dünya Səhiyyə Təşkilatının (DST) regional direktoru Əhməd əl-Mandari müsahibəsində deyib ki, ötən il Ramazan vaxtı qaydalara əməl olunmaması, komendant saatının tələsik qaldırılması, ibadət yerlərinin yenidən açılmasının fəsadı sonradan aylarla özünü göstərdi: “Ötən Ramazanda baş verənlərin təkrarlana biləcəyindən çox narahatıq”.

Onu da qeyd edək ki, müsəlman dünyasında məhdudiyyətlər və qadağalar fərqlənir, bir sıra ölkələrdə xeyriyyə məqsədilə verilən iftarlar qadağan olunub. Səudiyyə Ərəbistanında məscidlərin sahur və iftar yeməkləri verməsi yasaqlanıb.

Türkiyə hökuməti yeni qadağaları açıqlamalıdır. Martın 29-dan ölkədə həftəsonu karantin elan olunub, Ramazan dövründə restoran və kafelərin işləməyəcəyi bildirilib. İordaniya və Tunisdə gecə vaxtı komendant saatı elan olunduğundan, kütləvi ibadətlərə icazə yoxdur. İraqda bir neçə həftədir oxşar komendant saatı tətbiq olunub.

Müsəlmanların ən sıx məskunlaşdığı İndoneziyada hökumət Ramazanda milyonlarla insanın böyük şəhərlərdən doğma kəndlərinə getməsinə məhdudiyyət qoyub.

Ekspertlər deyirlər ki, Ramazan ayında koronavirusla bağlı kütləvi iftar məclislərinin qadağan edilməsi davam etdirilməlidir.

  • “Təkcə bizdə deyil, başqa müsəlman ölkələrində də Ramazan tədbirləri ilə bağlı qadağalar mövcuddur”

“Türk Dünyası İnfo” İctimai Birliyinin rəhbəri, Atatürk Mərkəzinin baş redaktoru Dəyanət Osmanlı bizimlə söhbətində bildirdi ki, Ramazanda kütləvi yığıncaqların keçirilməsi ilə bağlı qadağaların qüvvədə saxlanması vacibdir: “Ramazanda iftar məclislərinin, mərasimlərin təşkil edilməsi hazırkı pandemiya şəraitinə uyğun deyil. Hesab edirəm ki, Ramazan ayında kütləvi mərasimlərin, iftar məclislərinin təşkil edilməsi güclü yoluxmaya yol aça bilər, insanlar bu tədbirləri təşkil etməkdən çəkinməlidirlər. Odur ki, qadağaların davam etdirilməsinin daha böyük fayda verəcəyi qənaətindəyəm. Təsəvvür edin ki, iftar məclislərinə insanların kütləvi getməsi yoluxmanın artmasına nə qədər təsir edə bilər. Pandemiya dövründə kütləvi yığıncaqların, iftar məclislərinin təşkili yolverilməzdir. Məncə, insanlarımız buna daha böyük anlayışla yanaşmalı, hər kəs öz ailəsi çərçivəsində Ramazan sevinclərini yaşamalıdır. Bu gün təkcə bizdə deyil, başqa müsəlman ölkələrində də Ramazan tədbirləri ilə bağlı qadağalar mövcuddur. Əlbəttə, qadağanın səbəbi pandemiyadır. Hər kəs qadağalara əməl etməlidir ki, yoluxma sayı artmasın” - deyə müsahibimiz vurğuladı.

İradə SARIYEVA

Son xəbərlər