Şəkinin Bideyiz kəndində "Monteferro" MMC-nin fındıq bağı salmaq üsulu etiraz doğurdu...

Əli Əlirzayev: “Kommersiya marağına görə milli sərvətimiz olan meşələrin qırılması yolverilməzdir”

img

Şəkinin Bideyiz kəndində fındıq bağları salınır. Ancaq yerli camaat deyir ki, bunun müqabilində ərazidəki meşələr kütləvi şəkildə məhv edilir. Hətta qiymətli ardıc ağacları belə təhlükədən qorunmayıb.

32 il sözügedən meşələrin qorunmasında çalışmış Namiq Zakirovun sözlərinə görə, meşələr icarəyə verilir, amma sonra ona nəzarət edilmir. Hazırda sözügedən meşədə ağacların qırılması davam edir. Ərazidəki meşələr “Monteferro” MMC-yə icarəyə verilib. Ancaq MMC fındıq bağlarını boş ərazidə salmaq əvəzinə, meşələri məhv edir. N.Zakirov deyir ki, ərazidə 150 cinsdə ağac növü var. O qeyd edib ki, 2017-ci ildə meşədəki ərazilər icarəyə veriləndə sevinib. Fikirləşib ki, boş və yararsız ərazilərdə yeni meşə örtüyü salınacaq. Ancaq onun bununla bağlı gözləntiləri özünü doğrultmayıb: “Gəldilər boş əraziləri kənarda qoydular. Suvarma sistemləri yaxşı olsun, onların özləri üçün yaxşı olsun deyə ağır texnikanı meşələrə saldılar. Hələ də meşələrin dərinliklərində ağacların qırılması prosesi davam edir”.

Eyni zamanda, kənd sakinlərinin örüş yerləri əllərindən alınır. Elə vəziyyət yaradıblar ki, kənd sakinləri qoyun-quzu otarmağa yer tapa bilmirlər. Kənd sakinləri deyirlər ki, ərazidə meşələrin qırılması səhralaşma risqini artırır.

Məsələ ilə əlaqədar “Monteferro” MMC-nin mövqeyini öyrənmək istəsək də, zənglərə cavab verən olmadlı.

  • “Görünür, Şəkidəki yerli icra orqanları nəyəsə görə bütün bunlara göz yumurlar”

Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-alim, professor Əli Əlirzayevin fikrincə, kommersiya maraqlarına görə milli sərvətimiz olan meşələri qırğına vermək olmaz: “Azərbaycanda meşələrin ərsəyə gəlməsi böyük vaxt tələb edir. Fındıq bağlarından ötrü meşələrin məhvi yolverilməzdir. Fındıq bağları salınırsa, o zaman zəhmət çəkib onu boş ərazilərdə salsınlar. Buna görə meşələri məhv etmək doğru deyil. Çünki Azərbaycanın meşə resursları çox deyil. Bu baxımdan meşə massivlərini göz bəbəyi kimi qorumaq lazımdır. Meşələr erroziyanın qarşısını alır. Meşələrdən öz təyinatına görə istifadə etmək lazımdır. Kommersiya marağına görə milli sərvətimiz olan meşələrin qırılması yolverilməzdir. Görünür, Şəkidəki yerli icra orqanları nəyəsə görə bütün bunlara göz yumurlar. Bu düzgün deyil. Elə milli sərvətlər var ki, onların yerini heç nə ilə doldurmaq olmur. Ona görə də sözügedən məsələ araşdırılmalı və günahkarlar cəzalandırılmalıdır”.

Professor hesab edir ki, meşə massivlərinin qorunmasına xüsusi diqqət edilməlidir.

Vidadi ORDAHALLI

Son xəbərlər