Nazim Bəydəmirli: “...şəxsi hesaba toplanmış vəsaitlərinin yığım hissəsi onun varislərinə çatır”
Açıqlanan sonuncu məlumata əsəsən, Azərbaycanda il ərzində 55 min 916 nəfər vəfat edib. Açıqlanan rəsmi məlumatlara görə, vəfat edənlərin 29 min 926 nəfərini kişilər, 25 min 990 nəfərini isə qadınlar təşkil edir. Onu da qeyd edək ki, vəfat edən kişilərin isə 49,8%-i və ya 14 min 905 nəfəri 65 yaşına çatmadan ölüb.
Məlumat üçün qeyd edək ki, 1 iyul 2020-ci tarixindən etibarən Azərbaycanda kişilər 65 yaşından sonra pensiyaya çıxırlar.
- “Sığorta olunub, pensiya yaşına çatmadan rəhmətə gedən vətəndaşın pulunu qaytarmaq lazımdır, çünki bu onun əməkhaqqından tutulan vəsaitlərdir”
Pensiya yaşına çatmadan vəfat edən şəxslərin Dövlət Sosial Müdafiə Fonduna ödədiyi pulların aqibəti haqqında danışan iqtisadçı-ekspert Nazim Bəydəmirli qeyd etdi ki, qanunvericiliyə əsasən, pensiya yaşına çatmayan vətəndaşların DSMF-yə, şəxsi hesaba toplanmış vəsaitlərinin yığım hissəsi onun varislərinə çatır: “Yığım hissəsi əlavə olaraq toplanılır. Vəfat edən şəxsin yaxınına ancaq sığorta hissəsi verilmir. 65 yaşa kimi, hətta kapital tam ödənilibsə belə, pensiyaçıya həmin vəsaitlər qaytarılmır. Məlumat üçün bildirim ki, pensiya qanunvericiliyi bir neçə dəfə dəyişikliyə uğrayıb. Qanunvericiliyə görə, baza, sığorta və yığım hissəsi var. Yığım hissəsi haqqında heç kəs düşünmür. Qanunvericilikdə olsa da, yığım hissəsi vətəndaşın məcburi sığorta haqqından əlavə özünün təşəbbüsü olaraq yönləndirdiyi vəsaitlərdir. Həmin vəsaitlər onun şəxsi hesabında varsa, onlar varislərə qaytarıla bilir, sığorta hissəsi isə qaytarılmır. Bu, DSMF-nin gəlirləri hesab olunur və fondda qalır. Bu nə qədər ədalətlidir, deyə bilmərəm”.
Həmsöhbətimiz hesab edir ki, sığorta olunub, pensiya yaşına çatmadan rəhmətə gedən vətəndaşın pulunu qaytarmaq lazımdır. Çünki bu onun əməkhaqqından tutulan vəsaitlərdir. Bizdə mövcud qanunvericiliyə görə, həm işəgötürən DSMF-yə pul ödəyir, həm də işçinin maaşından tutulan vəsaitlər ödənilir”.
Günel CƏLİLOVA
