“Akkord” şirkətinin Xırdalan şəhərində inşa etdiyi Abşeron Gənclər Şəhərciyində evlərini özəlləşdirən vətəndaşlarla şirkət arasında ciddi qalmaqal yaşanır. Buna səbəb vətəndaşların “kupça” aldıqdan sonra sənədlərində realdan az mənzil sahəsinin qeyd edilməsidir.
Sakinlər bildirir ki, onlarla şirkət arasında bağlanan müqavilədə evin sahəsi 83 kvadratmetr göstərilsə də, “kupça” əldə etdikdən sonra həmin rəqəm 70 kvadratmetr kimi qeyd edilir. Şikayətçi sakinlər onu da bildirirlər ki, burada digər bir qanunsuzluq kommunal xidmət haqlarının hesablanması ilə bağlıdır: “Onda belə çıxır ki, bizdən yığılan kommunal haqlarda da yanlışlıq olub. Çünki biz hər yaşayış sahəsinin kvadratına görə 25 qəpik ödəmişik. Onda bizim artıq kvadrata görə ödədiyimiz pulları geri qaytarsınlar. Biz bununla bağlı “Akkord”u məhkəməyə verməyi planlaşdırırıq. İndi biz evimizi satanda, görün onun qiyməti nə qədər aşağı hesablanacaq? Bir evdə 13 kvadrat fərq varsa, bu, bazar qiymətinə azı 10 min manat zərər kimi təsir edəcək”.
Biz sözügedən şirkətin kommunal xidmətlərini həyata keçirən şirkətlə əlaqə saxladıq. Dəstəyi götürən şəxs özünü “Fulline”nın əməkdaşı kimi təqdim etdi və bildirdi ki, bu məsələnin onlara heç bir aidiyyəti yoxdur: “Şirkət evləri tikəndə hesablamanı öz parametrlərinə uyğun aparıb. İndi özəlləşməni həyata keçirən qurum başqa cür dəyərləndirir. Məsələn, “Akkord” eyvanı yaşayış sahəsi kimi saysa da, özəlləşmədə bu qeyd edilmir. Bir eyvan da 5 kvadrat olur. Şirkət sahəni çöl divardan çöl divara ölçürsə, özəlləşmədə otaqların işəridəki sahəsi hesablanır. Fərq buna görə yaranmış olur”.
Əmlak məsələləri üzrə ekspert Nüsrət İbrahimov isə “Bakı-Xəbər”ə bildirdi ki, bu cür ziddiyyətlərə yeni tikililərdə çox rast gəlinir: “Evin sahəsinin qanunvericiliklə hesablanma qaydası var. Bunun üçün evin yalnız daxili ölçülməlidir. Yəni “plintusdan-plintusa” olan məsafə. Otaqlar arasında olan keçidlər də ümumi sahəyə daxildir. Çöl divardan-çöl divara olan yanaşma yanlışdır. Eyvana gəldikdə isə, həmin sahənin üçdə biri ümumi sahəyə aid olunur. Nə tam olaraq çıxılır, nə də tam olaraq aid edilir. Eyvanın ümumi sahəsi bölünür 3-ə, alınan rəqəm sahəyə əlavə olunur. Vətəndaş bu cür ölçü ilə verilən sənəd arasında ziddiyyət görürsə, mütləq mənada məhkəməyə müraciət etməlidir ki, evi tikən MTK-nın məsuliyyətini müəyyən edə bilsin”.
Məhəmmədəli QƏRİBLİ
